• Slider One

    የምስል ተጓዳኝ መልዕክት

  • Slider Two

    የምስል ተጓዳኝ መልዕክት

  • Sldier Three

    የምስል ተጓዳኝ መልዕክት

ታሪክን የኋሊት፣ታህሳስ 27፣2009

የፕራግ ፀደይ

ከ2ኛው የዓለም ጦርነት በኋላ የቀድሞው ቼኮዝሎቫኪያ በዘመኑ ምሥራቃዊ ኃያል በሶቪየት ኅብረት ተፅዕኖ ሥር አዳሪ ሆነች፡፡

ከ49 ዓመታት በፊት በዛሬዋ ዕለት በለዘብተኛ ፖለቲካዊ አቋማቸው ይታወቁ የነበሩ አሌክሳንደር ዱብቼክ የዘመኑ የቼኮዝሎቫኪያ ኮሚኒስቶች የፖለቲካ ማኅበር ዋና ፀሐፊ ሆነው መመረጣቸው አገሪቱ ከሶቪየቶች ተፅዕኖ ለመላቀቅ የሚያስችላት ዕድል ፈጠረ፡፡

በመላ አገሪቱ ሰላማዊ የለውጥ ንፋስ መንፈስ ጀመረ፡፡ ዱብቼክ የተለያዩ ለውጦችን ሥራ ላይ ማዋል ጀመሩ፡፡

የንግግርና ኃሳብን በነፃ የማስተላለፍ መብትን ፈቀዱ፡፡ በመገናኛ ብዙሃን ላይ ተጭኖ የነበረውን ጥብቅ ቁጥጥር አላሉት፡፡

የዜጐችን የሰብዓዊ መብት እናረጋግጣለን እንደልባችሁ ተንፍሱ እነሆ ዴሞክራሲ አሉ፡፡ በእዝ ተቆፍድዶ የነበረው ምጣኔ-ሐብት ወደ ነፃ የግብይት ሥርዓት እንዲያመራ ፈር ቀደዱ፡፡

ዱብቼክ ሌሎች የለውጥ ኃሳቦችንና ማሻሻያዎችን ሥራ ላይ ለማዋል ተነሱ፡፡

ሰላማዊው የለውጥ ውጥን በታሪክ የፕራግ ፀደይ የሚል መጠሪያ ተሰጠው፡፡የዱብቼክ የለውጥ ኃሳብ በዘመኑ የሶቪየት መሪዎች ዘንድ አልተወደደላቸውም፡፡

 

ነገሩ ያላማራቸው የቀድሞዋ የሶቪየት መሪ ሊዮኔድ ብሬዤኔቭ ዱብቼክን በአፋጣኝ ወደ ሞስኮ አስጠርተው ገሰጿቸው፡፡

በብርቱም አስጠነቀቋቸው፡፡

“ይሄን ለውጥ ለውጥ የምትለውን ነገር ወዲያ ተወው!” ሲሉ አስፈራሯቸው፡፡ ሊዮኔድ ብሬዤኔቭ በዛቻና ማስጠንቀቂያ ብቻ ሳይወሰኑ በዘመኑ በሞስኮ የሚዘወረውን የዋርሶ ቃል ኪዳን ወታደራዊ ኃይል ወደ ቀድሞዋ ቼኮዝሎቫኪያ አዘመቱ፡፡

ከቀድሞዋ የጀርመን ዴሞክራሲያዊ ሪፐብሊክ፣ ከቡልጋሪያ ከፖላንድና ከሃንጋሪ የተወጣጡ 200 ሺህ የቃል ኪዳን ድርጅቱ ወታደሮች ቼኮዝሎቫኪያን ወረሩ፡፡

በሺዎች የሚቆጠሩ የዋርሶ ታንኮች ወደ አገሪቱ እየተንደረደሩ ዘለቁ፡፡ የዱብቼክ የለውጥ ኃሳቦች በሶቪየቶች ጫናና በዋርሶ ወረራ ተቀለበሰ፡፡

ግን ይሄ ለሁል ጊዜም አልነበረም፡፡ ከፕራግ ፀደይ መጨናገፍ 20 ዓመታት በኋላ ሚሐየል ጐርቫቾብ የክሬምሊን አለቃ ሆነው በለውጥ አራማጅነት መጡ፡፡

የቀድሞዋ ቼኮዝሎቫኪያም ያኔ በራሷ መንገድ የመጓዝ ነፃነቷን አገኘች፡፡ ቼኮችና ስሎቫኮች በየራሳችን መኖር እንሻለን ባሉም ጊዜ የቀድሞዋ ቼኮዝሎቫኪያ አንዲት ሲኒ ሳትሰበር እና ኮሽታ ሳይሰማ ቼክ ሪፐብሊክና ስሎቫኪያ የሚባሉ ስያሜዎችን በመያዝ በሰላም የየራሳቸው ነፃ አገር ሆኑ፡፡

የኔነህ ከበደ

በማኅበረ ሰብ ገጾች ያጋሩ

Submit to FacebookSubmit to Google PlusSubmit to TwitterSubmit to LinkedIn
Leza Vote Banner
Sheger 102.1 AudioNow Numbers