• United Bank S.C.

    ሕብረት ባንክ አ.ማ.

  • Slider Two

    የምስል ተጓዳኝ መልዕክት

  • Sldier Three

    የምስል ተጓዳኝ መልዕክት

ታሪክን የኋሊት፣ጥር 9፣2009

የበረሃው መዓበል

በኢራቅ ተይዛ የነበረቸውን ኩዌትን ነፃ ለማውጣትና ሳውዲ አረቢያን ከጥቃት ለመከላከል አሜሪካ መራሹ የበረሃው ማዕበል ዘመቻ የተጀመረው የዛሬ 26 ዓመት በዛሬዋ ዕለት ነበር፡፡

ኢራቅ ኩዌትን ወርራ ለመያዝ እስከተቃረበችበት ጊዜ ለ10 ዓመታት ያህል ከኢራን ጋር ደምሳሽና ጥሪት አስጨራሽ ጦርነት ስታካሂድ ቆየች፡፡

በጦርነቱ ዘመን እንደ ሳውዲ አረቢያና ኩዌት ካሉ ሱኒ መንግስታት የተበደረችው በብዙ ቢሊዮን ዶላሮች ዕዳ ተጫናት፡፡

የዘመኑ የኢራቅ መሪ ሳዳም ሁሴን በዕዳ ጫናው በትከፍላለህ አልከፍልም ከጎረቤቶቻቸው ጋር አተካሮ ውስጥ ገቡ፡፡

ሳዳም ሁሴን ጎረቤቶቻቸውን አልከፍልም አፍንጫችሁን ላሱ አሏቸው፡፡

ድርድሮች ፍሬ አልባ ሆኑ፡፡

ቅራኔው እየተካረረ መጣ፡፡

በዚያ ላይ ሳዳም ኩዌት ከሩሜይላ የነዳጅ መገኛ ስር ለስር እየዘረፈችን ነው ሲሉ ውዝግቡን አካረሩ፡፡

ሳዳም ጦር አውርዳቸውን ተያያዙት፡፡

ከዛቻ አልፈው ትንሿን ጎረቤታቸውን ኩዌትን ወርረው ያዟት፡፡

ሳይዋረዱ ኩዌትን ለቀው እንዲወጡ በማስጠንቀቂያ ላይ ማስጠንቀቂያ ተነባበረባቸው፡፡

የፀጥታው ምክር ቤትም ብርቱ ትዕዛዝን ያዘለ ውሳኔ አሳለፈባቸው፡፡

ሳዳም ቁብም አልሰጣቸውም፡፡

ኩዌትን ለቀህ ውጣ የሚሉኝ የታሪክ መሐይሞች ናቸው ሲሉ ወረፏቸው፡፡

በኦቶማን ቱርኮች ዘመን የኢራቋን ባስራ ግዛት የሚያስተዳድረው ኢሚር ኩዌትን ጠቅልሎ ይገዛ እንደነበር ታሪክን መለስ ብሎው እንዲመለከቱ አስታወሱ፡፡

 

ኩዌትን 19ኛ ግዛታቸው አደረጓት፡፡ ሳዳም ኩዌትን ለቀው እንዲወጡ የተሰጣቸውን ማስጠንቀቂያም ለቀረበላቸው ማግባቢያ አልበገር አሉ፡፡

አሜሪካ እንደ ብሪታንያና ፈረንሳይ ያሉ ኃያላንን ከጎኗ አሰልፋ ከቅርብም ከሩቅም ካሉ አገሮች ተጠራርታ ኩዌትን ነፃ የማውጣቱ የሕብረ ብሔራዊው ጦር ዘመቻ የተጀመረው የዛሬ 26 ዓመት በዛሬዋ ዕለት ነበር፡፡

ዘመቻውም የበረሃው ማዕበል ተሰኘ፡፡

ከ2ኛው የዓለም ጦርነት በኋላ በአንድ ጊዜ በርካታ አገሮች የተሳተፉበት ታላቅ ውጊያ ሆነ፡፡

በኩዌት የተሰለፈው የኢራቅ ጦር ከአየር በሚጣሉ ቦንቦችና ሚሳየሎች ከባህር በሚወነጨፉ ሚሳየሎች የእሳት እራት ሆነ፡፡

ኩዌት በአጭር ጊዜ ነፃ ወጣች፡፡

ወደ አገሩ የሚሸሸው የኢራቅ ሰራዊት ክፉኛ ተመታ፡፡

በአጭር ጊዜው የበረሃው ማዕበል ዘመቻ የተገደሉት የኢራቅ ወታደሮች ብዛት ከ35 ሺህ እንደማያንስ በታሪክ ሰፍሮ ይገኛል፡፡ በብዙ ሺህዎች የሚቆጠሩ የኢራቅ ታንኮችና መድፎች ወደ አመድነት ተቀየሩ፡፡

ዘመቻው 110 የጦር አውሮፕላኖቿንና 19 የጦር መርከቦቿን አሳጥቷታል፡፡

ሳዳም የጦርነቱን አቅጣጫና የኃይል አሰላለፍ ለማዛባት ወደ እስራኤል ስካድ ሚሳየል ቢተኩሱም ሳይዝላቸው ቀረ፡፡ ሕብረ ብሔራዊው ኃይል በአየርና በጦር መርከብ ድብደባ ያደከመውን የኢራቅ ሰራዊት በምድርም እስከ ግዛቱ በመዝለቅ ይቀመስልህ ብሎታል፡፡

ኢራቅ ያኔ የጀመራት ጦርነት ዓይነትና ባሕሪውን እየቀያየረ ዛሬም ድረስ አልለቀቃትም፡፡

የኔነህ ከበደ

በማኅበረ ሰብ ገጾች ያጋሩ

Submit to FacebookSubmit to Google PlusSubmit to TwitterSubmit to LinkedIn
Sheger 102.1 AudioNow Numbers