• United Bank S.C.

    ሕብረት ባንክ አ.ማ.

  • Slider Two

    የምስል ተጓዳኝ መልዕክት

  • Sldier Three

    የምስል ተጓዳኝ መልዕክት

ታሪክን የኋሊት፣ጥር 10፣2009

ለ3 ዓመታት የዘለቀው የሌሊንግራዱ ከበባ

በዓለማችን የጦርነት ታሪክ የበረከቱ ከተሞች አሠቃቂ ከበባ ገጥሟቸዋል፡፡

በሁለተኛው የዓለም ጦርነት የሩሲያዋ የዛን ጊዜዋ ሌኒንግራድ የዛሬዋ ሴንትፒተርስበርግ የገጠማት ከበባ በአሠቃቂነቱ ከመጀመሪያው ረድፍ የሚሰለፍ ነው፡፡

ሌኒንግራድ ከአሠቃቂው የ3 ዓመታት ገደማ ከበባ መተንፈሻ ቀዳዳ ያገኘችው የዛሬ 73 ዓመት በዛሬዋ እለት ነበር፡፡

ሶቪየት ህብረትን የወረረው የናዚ ጀርመን ኃይል ሌኒንግራድ ለመድረስ ከሁለት ወር ተኩል በላይ ጊዜ አልጠየቀውም፡፡

ያም ሆኖ የሶቪየቱ ቀይ ጦርና የከተማዋ ነዋሪዎች ናዚዎች ወደ ሌኒንግራድ እንዳይዘልቁ የሞት የሽረት ትግልና ትንቅንቅ አደረጉ፡፡

ናዚዎቹ ከበባውን ከማጠናከራቸውም በተጨማሪ በከተማዋ ላይ የከባድ መሳሪያ ውርጅብኛቸውን ማውረዱን እንደ ዋነኛው የጦር ስልት ተከተሉ፡፡

የከተማዋ ተከላዮችም እጅ መስጠት የማይሞከር ነው አሉ፡፡ የግንባር ስጋ ሆኑ፡፡

ጦርነቱ ብቻ ሳይሆን ከበባው በከተማይቱ ላይ አሠቃቂ ሞት ደግሶ ሠፈረባት፡፡

ያኔ ሦስት ሚሊዮን ገደማ ነዋሪዎች የነበራት ሌኒንግራድ የምግብ ክምችቷ የተሟጠጠው ገና በከበባው የመጀመሪያ ወራት ነበር፡፡

 የቀረችዋን በነፍስ ወከፍ በቀን 250 ግራም ምግብ በራሸን ማከፋፈል ተጀመረ፡፡

የነፍስ ወከፍ የምግብ ድርሻው መጠን በቀን ወደ 150 ግራም አሽቆለቆለ፡፡

ሁኔታው እየከፋ ሲመጣ ይሄም ከነጭራሹ ቀረ፡፡ የቧንቧዎች ውሃ ነጠፈ፡፡

ጦርነቱ በራሱ ነፍስ ነጣቂ ነበር፡፡ ጦርነቱን ረሃብ አገዘው፡፡ የአቅም መዳከም የሕዝቡን ጤና ደቆሰው፡፡ ሞት አክሊሉን ደፋ፡፡

ከበባ፣ ጦርነት፣ ረሃብና ጤና ማጣት በተረባረቡበት ሕዝብ ላይ ጨካኙ የሩሲያ ክረምት የአሠቃቂው ትዕይንት አጋዥ ሆነ፡፡

 

ማሞቂያ ጋዝ ለማላ ጠፋ፡፡

ነዋሪዎቹ ጨካኙን ብርድ ለመከላከል ቁም ሳጥኖቻቸውን ፣ የቤታቸውን ሳንቃና ሌሎች የእንጨት ሥሪት ቁሶቻቸውን እየፈለጡ ማገዱ፡፡

ይሄም ቢሆን የአንዱን ክረምት ቁር ቢያሳልፋቸውም ወደ ሌላው የሚያሻግራቸው አልነበረም፡፡

ከበባው ከቀን ቀን ሲጨምር ቁራሽ ዳቦም ብርቅ ሆነ፡፡

በአስገዳጅ ሁኔታ እነውሻ፣ እነድመት እነፈረስ ሳይቀሩ እየታረዱ ለምግብነት ይውሉ ጀመር፡፡

እነዚም ተሟጠው ሲያልቁ በረሃብና በቅዝቃዜ የታገዘው ሞት እየበረታ መጣ፡፡ 

የከተማዋ ጐዳናዎች በአስከሬን ክምር ተሞሉ፡፡

እንዲህ ያለውን አሠቃቂ ትዕይንት ያስተናገደው የሦስት ዓመታት ገደማ ከበባ በሌኒንግራድ ብቻ ከ1 ሚሊዮን ተኩል በላይ ሰዎችን ሕይወት ቀጠፈ፡፡

የዛሬ 73 ዓመት በዛሬዋ እለት  በከተማዋ ለሕይወት መቀጠል የተስፋ ጭላንጭል ተገኘ፡፡

ከዘጠኝ ቀናት በኋላም  ከበባው ከናካቴው ተበጣጠሰ፡፡

ሩሲያ ከተማይቱ በናዚዎች እጅ እንዳትወድቅ ዘጠኝ መቶ ማዕልትና ሌሊቶችን ከረሃብ ቁርና ሞት ጋር እየታገሉ በጠላት እጅ እንዳትወድቅ የተከላከሉላትን የመከራ ጊዜ አርበኞቿን ሐውልት አቁማና መዘክር አሰናድታ ዝንተ ዓለም እያሰበቻቸው ነው፡፡

የኔነህ ከበደ

 

በማኅበረ ሰብ ገጾች ያጋሩ

Submit to FacebookSubmit to Google PlusSubmit to TwitterSubmit to LinkedIn
Sheger 102.1 AudioNow Numbers