• Slider One

    የምስል ተጓዳኝ መልዕክት

  • Slider Two

    የምስል ተጓዳኝ መልዕክት

  • Sldier Three

    የምስል ተጓዳኝ መልዕክት

ታሪክን የኋሊት፣የካቲት 6፣2009

ጀርመን ዳግም ስትዋሃድ

ጀርመን ከ2ኛው የዓለም ጦርነት በኋላ አጋጥሟት የነበረ የምስራቅ ምዕራብ ክፍፍል አብቅቶ ሁለቱ ጀርመኖችና አራቱ ሃያላን አገሪቱ መልሳ እንድትዋሃድ የተስማሙት የዛሬ 27 ዓመት በዛሬዋ ዕለት ነበር፡፡

ከዚህ ክስተት ቀደም ብሎ የጀርመን ናዚዎች ምርጥ ዝርያዎች ነን የዘሮች ሁሉ የበላይ ነን የሚል ክፉ ስሜት አደረባቸው፡፡

የጦርነት አባዜ ተጠናወታቸው፡፡

ከዓላማ ተመሳሳዮቻቸው ጋር የእብሪት ጉድኝት አደረጉ፡፡ ዓለምን በእጃችን እናስገባለን ብለው ሌሎች አገሮችን ወረሩ፡፡

የ2ኛውን የዓለም ጦርነት ቀሰቀሱ፡፡

ገደሉ፣ አሠሩ፣ ቁም ስቅል አሳዩ፡፡ ዘረፉ፡፡ አወደሙ፡፡

ብዙ ብዙ ግፍ ፈፀሙ፡፡

ናዚ ጀርመኖች በሌሎች ላይ የለኮሱት እሳት እነሱንም አነደዳቸው፡፡ አቃጠላቸው፡፡

አገራቸው በአሸናፊዎቹ የሕብረቱ ኃይሎች ሞርኮ ውስጥ ወደቀች፡፡

የሕብረቱ ኃይሎች በየፊናቸው የጀርመን ግዛት በምዕራብ ምስራቅ ከፋፍለው በተፅዕኖ ክልልነት ተቃረጡት፡፡

በአንግሎ አሜሪካና በፈረንሳይ ይዞታ ስር የቆየው የጀርመን ምዕራባዊ ግዛት የጀርመን ፌዴራል ሪፐብሊክ ተብሎ ራሱን የቻለ መንግስት ሆነ፡፡

በሶቪየቶች ስር የነበረው ምስራቃዊ የጀርመን ክፍል በፊናው የጀርመን ዴሞክራሲያዊ ሪፐብሊክ ተሠኘ፡፡

አንዲት ጀርመን ለሁለት ተከፈለች፡፡

 

አገሪቱ ተከፋፍላና ሁለት ባላንጣ አገር ሆና ዘለቀች፡፡ 45 ዓመትም አስቆጠረች፡፡ ጊዜ አለፈ፡፡ በሶቪየት ህብረት በጐርጐሮሣውያን አቆጣጠር በ1980ዎቹ አጋማሽ ወደ መሪነቱ የመጡት ሚሐየል ጐርቫቾቭ፣ “ፔሬስትሮይካ” “መልሶ ግንባታ”፤ “ግላስኖስት” “ግልፅነት” ሲሉ ተነሱ፡፡

ብዙዎችም የምስራቅ አውሮፓ የቀድሞው ሶቪየት ህብረት ተቀጥላ አገሮች ኮሚኒዝም በቃን ብለው አንዳቸው ሌላኛቸውን እየተከተሉ በራሳቸው መንገድ መጓዙን መረጡ፡፡

የምስራቅ ጀርመን ሕዝብም ወር ተረኛው ሆነ፡፡

የክፍፍሉ አሻራ ያረፈበትን የበርሊን ግንብ ደረመሰው፡፡

ከምስራቅም ከምዕራብም የውህደት ጥያቄው አስተጋባ፡፡

የጀርመን ፌዴራል ሪፐብሊክና የጀርመን ዴሞክራሲያዊ ሪፐብሊክ ለአንድነቱ ወደ ድርድር ገቡ፡፡

ያገባናል ያሉት አሜሪካ፣ ብሪታንያ፣ ፈረንሳይና ሶቪየት ሕብረትም የንግግሩ አካል ሆኑ፡፡

ድርድሩ ሁለት ሲደመር አራት የሚል ቅፅል ወጣለት፡፡

ልክ የዛሬ 27 ዓመት በዛሬዋ እለት የሁለቱ ጀርመኖች ተወካዮች አገሪቱ መልሳ እንድትዋሃድ ተስማሙ፡፡

ከስምምነቱ ጥቂት ወራት በኋላ ጀርመን ተዋሐደች፡፡

ምስራቅ ምዕራብ ተብላ መጠራቷ ያለፈ ታሪክ ሆነ፡፡

የኔነህ ከበደ

በማኅበረ ሰብ ገጾች ያጋሩ

Submit to FacebookSubmit to Google PlusSubmit to TwitterSubmit to LinkedIn
Sheger 102.1 AudioNow Numbers