• Slider One

    የምስል ተጓዳኝ መልዕክት

  • Slider Two

    የምስል ተጓዳኝ መልዕክት

  • Sldier Three

    የምስል ተጓዳኝ መልዕክት

ታሪክን የኋሊት፣የካቲት 7፣2009

የስታሊን ነገር

የቀድሞዋ ሶቪየት ህብረት መላ እስትንፋሷና ሕይወቷ ከኮሚኒስት የፖለቲካ ማህበሩ መልካም ፈቃድና አድራጊ ፈጣሪነት ጋር የተሳሰረ ነበር፡፡

የፖለቲካ ማህበሩ የዛሬ 61 ዓመት በዛሬዋ እለት የጀመረው ታላቅ ሸንጐ በሞት የተለየው የአገሪቱ መሪ ጆሴፍ ስታሊን ጉድ የተዘከዘከበት ሆነ፡፡

ጆሴፍ ስታሊን ከቭላድሚር ኤሊች ሊኒን ሞት በኋላ የአገር መሪነቱን ጨብጦ በፍፁማዊ አምባገነናዊ የአስተዳደር ዘይቤ አገሪቱን በብረት መዳፉ አስገብቶ  ሕዝቡን ሰጥ ለጥ አሰኝቶ ገዝቷል፡፡

የኮሚኒስት የፖለቲካ ማህበሩ ሰዎች ሳይቀሩ በሚሊዮን የሚቆጠሩ ዜጐች የሕዝብ ጠላት ‹‹የአብዮት ጠላት›› የሚል ቅፅል እየተለጠፈባቸው ተረሽነዋል፡፡ በየእስር ቤቱና በየግዞት ስፍራው ተወርውረዋል፡፡

በስታሊን እግር የተተኩት ኒኪታን ኩርቺየቭ ይሄ ሁሉ ሲሆን የስታሊን የቅርብ ሰውና የቀኝ እጅ ነበሩ፡፡

እሳቸውም እንደ አብዛኞቹ የስታሊን ዘመን ሹሞች ሲጠራቸው አቤት ሲልኳቸው ወዴት ነበሩ፡፡ ‹‹ስታሊን ለዘላለም ይኑርን›› ሲፈክሩ ኖረዋል፡፡

ከስታሊን ሞት በኋላ የነበረውን የስልጣን ሽኩቻ አልፈው በስታሊን ወንበር ተቀመጡ፡፡

በ20ኛው የፖለቲካ ማህበሩ አገራዊ ሸንጐ የሚታወቁ ግን ሳይነገሩ የቆዩ የስታሊንን ግፎች ዘከዘኩ፡፡

ሐጢያቱን ዘረዘሩ፡፡

በአምባገነኑ መሪ አምልኮተ ሰብ ውስጥ ወድቀን ነበር አሉ፡፡

 

የስታሊን ስራ፣ ድርጊትና ምግባር ሁሉ ተወገዘ፡፡ ተኮነነ፡፡

አገሬው በዚህ ጉዳይ ላይ ቀልድ ቀልዶበታል ይባላል፡፡

ቀልዱም ኒኪታን ኩርቺየቭ የስታሊንን ሐጢያት ዘርዝረው እንዳበቁ ከጉባዔተኞቹ አንዱ ይሄ ሁሉ ሲሆን እርሶዎ የት ነበሩ ? የሚል ጥያቄ በመሠንዘር ድምፁን አሠምቶ ዝም ይላል፡፡

ኩርቺየቭ በጣም ጥሩ ጥያቄ ነው ለመሆኑ ይሄን ጥያቄ የጠየከው ማነህ ? ይላሉ፡፡

ጥያቄ አቅራቢው ድምፁን ያጠፋል፡፡

ኒኪታን ኩርቺየቭም በዝምታ ደባብ ለተዋጠው ጠያቄ “ጓድ… እኔም አንተ አሁን ዝም ያልክበት ቦታ ነበርኩ” አሉት ይባላል፡፡ የስታሊንን አምባገነናዊ አገዛዝ የፍርሃት ድባብ በማስታወስ፡፡

ኩርቺየቭ አገሪቱን ከአንድ ፓርቲ አገዛዝ ባያወጧትም የስታሊን ዘመኑን  ሰቆቃ በብዙ ቀነሱት፡፡

ስልጣን ላይ ከወጡ ከስምንት ዓመት በኋላ በዚያን ጊዜው ከፍተኛ ሹምና ኋላም የሶቪየት ህብረት መሪ በነበሩት ሊዮኔድ ብሬዤኔቭና ተባባሪዎቻቸው በተዶለተባቸው የመንግሥት ግልበጣ ሴራ ከስልጣን ተባረሩ፡፡

ከግዞት ያልተናነሰውን ሕይወት ለመግፋት የተገደዱት ኩርቺየቭ ለከፍተኛ የመንፈስ ጭንቀት ተዳረጉ፡፡

ከመፈንቅለ መንግስቱ ሰባት ዓመታት በኋላ ባደረባቸው የልብ ሕመም ከዚህ ዓለም በሞት ተለዩ፡፡

የኔነህ ከበደ

በማኅበረ ሰብ ገጾች ያጋሩ

Submit to FacebookSubmit to Google PlusSubmit to TwitterSubmit to LinkedIn
Sheger 102.1 AudioNow Numbers