• Slider One

    የምስል ተጓዳኝ መልዕክት

  • Slider Two

    የምስል ተጓዳኝ መልዕክት

  • Sldier Three

    የምስል ተጓዳኝ መልዕክት

ታሪክን የኋሊት፣የካቲት 9፣2009

ሔዝቦላ

ከመካከለኛው ምሥራቅ ስመ ገናና የጦር የፖለቲካ ድርጅቶች የሊባኖሱ ሄዝቦላህ አንዱ ነው፡፡

ሄዝቦላህ ከተመሠረተ ዛሬ 32ኛ ዓመት ሞላው፡፡

ለሄዝቦላህ መመስረት መነሻው በጊዜው እሥራኤል በሊባኖስ ላይ ያካሄደችው ወታደራዊ ዘመቻ ነበር፡፡

አብዩ መነሻው እሥራኤል በዘመቻዋ ከያዘችው የደቡብ ሊባኖስ ግዛት ለማስወጣት የሽምቅ ውጊያ ማካሄድ አብዩ ዓላማው ነበር፡፡

በሊባኖሱ የእርስ በርስ ጦርነት ዘመን በዚያ የሰፈሩ የአሜሪካ ወታደሮችንም ለማስወጣት ግፊት ማድረግ ሌላኛው የቅርብ ግቡ እንደበር ይነሳል፡፡

እሥራኤል ደቡብ ሊባኖስን ለ18 ዓመታት ተቆጣጥራ በቆየችባቸው ጊዜያት በፊት ለፊትና በሽምቅ ተፋልሟታል፡፡

የደፈጣ ጥቃትንና መደበኛ ውጊያን ያፈራርቃል፡፡

ከበድ ከበድ ያሉ የጦር መሣሪያዎችን በመጠቀም ከመካከለኛው ምሥራቅ ጦርና የፖለቲካ ድርጅቶች ቅድምናውን ይወስዳል፡፡

ካቱሻ የተሰኘው ሩሲያ ሰራሽ ሮኬት ማስወንጨፊያ መሣሪያ የልዩ መታወቂያው ያህል ነው፡፡ ባለ ሚሳየልም ነው፡፡

የሽምቅ ጥቃትንና የመደበኛ ውጊያን መላ ከማፈራረቅ በተጨማሪ የደፈጣ ግድያና እገታ የሚጠቀምባቸው መንገዶች ናቸው፡፡

የአጥፍቶ መጥፋት ጥቃትም ፈር ቀዳጅ መሆኑ ይነገርለታል፡፡

በሺአ ማኅበረሰብ ኃይማኖታዊ መሪዎች አነሳሽነት የተመሠረተው ሄዝቦላህ ባለመንታ ክንፍ ነው፡፡

በአንድ በኩል የፖለቲካ ማህበር ሲሆን በሌላው ጐኑ የጦር ድርጅት ሆኖ ይገኛል፡፡

የሺአዎቹ አገር ኢራን ዋነኛዋ አለሁልህ ባዩ መሆኗ ይነገራል፡፡

 

የቡድኑን ተዋጊዎች በማሰልጠን፣  በማስታጠቅና ባልተቋረጠ ሁኔታ በመደገፍ ፋርሳዊቱ አገር ስሟ ተደጋግሞ ይነሳል፡፡

ስለ ገቢው የተለያዩ የክትትል ግኝቶች የተለያዩ አሃዞችን ቢያሳዩም ኢራን ለሄዝቦላ በየዓመቱ 200 ሚሊዮን ዶላር ለእጅህ ትለዋለች፡፡

ከሌሎችም ምንጮችና ደጋፊዎቹ ጫን ያለውን ገንዘብ ያገኛል፡፡

የኮንትሮባንድ ንግድም የገቢ ማዳበሪያው ነው ተብሎ ይታማበታል፡፡

እንደ ቬኒዙዌላ ያሉ መንግሥታት የሄዝቦላህ ደጋፊዎች ናቸው ስትል አሜሪካ ትከሳለች፡፡

ሄዝቦላህ ግን ሐሰት ነው ይላል፡፡

ድርጅቱ ከቅርብ ጊዜ ወዲህ ድንበር ተሻጋሪ ሆኗል፡፡

በሺዎች የሚቆጠሩ ተዋጊዎቹን በፐረሬዝዳንት ባሻር አል አሳድ ደጋፊነት አሰልፎ በሶሪያ እየተዋጋ ነው፡፡

በአሁኑ ወቅት በየመን ፖለቲካዊና መንግሥታዊ ጉዳዮች አድራጊ ፈጣሪ እየሆኑ የመጡት ሺአዎቹን የሐውቲ አማፂያን እየረዳ ነው ተብሎ ስሙ ይነሳል፡፡

ሄዝቦላህ በአሜሪካ፣ በካናዳ፣ በባህረ ሰላጤው አገሮች ምክር ቤትና በእሥራኤል በአሸባሪ ድርጅትነት የተፈረጀ ነው፡፡

የአውሮፓ ኅብረትና ኒውዚላንድ ደግሞ ወታደራዊ ክንፉን በአሸባሪነት ሲያሰፍሩት የፖለቲካ ክፍሉን ግን እንደ ማንኛውም የፖለቲካ ድርጅት ያዩታል፡፡

በሊባኖስ መንግሥታዊና ፖለቲካዊ ጉዳዮች ተፅዕኖው የበረታው ሄዝቦላህ በአገሪቱ በመንግሥት ላይ የተደረበ ሌላ መንግሥት የሚል ቅፅልን እንዳበጀ ዛሬ 32ኛ ዓመቱን ደፍኗል፡፡

የኔነህ ከበደ

በማኅበረ ሰብ ገጾች ያጋሩ

Submit to FacebookSubmit to Google PlusSubmit to TwitterSubmit to LinkedIn
Sheger 102.1 AudioNow Numbers