• Slider One

    የምስል ተጓዳኝ መልዕክት

  • Slider Two

    የምስል ተጓዳኝ መልዕክት

  • Sldier Three

    የምስል ተጓዳኝ መልዕክት

ታሪክን የኋሊት፣የካቲት 15፣2009

ዛሬ ላይ ታሪክ የሆነው የአንጎላው የእርስ በርስ ጦርነት

አንጐላ ከ40 ዓመታት በፊት በከፍተኛ ተጋድሎና ትንቅንቅ ከፖርቱጋል ነፃነቷን ብትቀዳጅም ለረጅም ጊዜ የነፃነቷን ትሩፋት ሳታጣጥም ቆይታለች፡፡

ለአንጐላ ነፃነት ድርሻ የነበራቸው ኤም.ፒ.ኤል.ኤ ና ዩኒታ የተሠኙት የጦርና የፖለቲካ ድርጅቶች ወደ እርስ በርስ ቁርቋሶ የገቡት ከነፃነቱ ጊዜ አስቀድሞ ነበር፡፡

ከነፃነት በኋላ ኤም.ፒ.ኤል.ኤ በአንጐላ ፈላጭ ቆራጭ ዩኒታ ደግሞ አማፂ ቡድን ሆኖ ለ30 ዓመታት ገድማ ሲተጋተጉ ኖረዋል፡፡

አንጐላ ከአታካቹ የእርስ በርስ ጦርነት የተገላገለችው የዩኒታ አማፂ ቡድን መሪ የነበሩት ጆናስ ሳቪምቢ የዛሬ 15 ዓመት በዛሬዋ እለት ከተገደሉ በኋላ ነው፡፡

ሳቪምቢ በወጣትነት ዕድሜቸው ወደ ቻይና አቀኑ፡፡ በዚያ የቻይናን ቀይ ጦር የሽምቅ ውጊያ ስልቶች ቀስሙ፡፡

አንቱ የተሰኙ የጦር መላ አዋቂ ሆኑ፡፡ የቻይኖቹን የኮሚኒስታዊ ፍልስፍና ዝንባሌ እርግፍ አድርገው ትተው የውጊያ ስልታቸውን ብቻ ወሰዱላቸው፡፡

ሳቪምቢ የሶቪየቶች ተቀጥላ ነበር የሚባለውን የኤም. ፒ. አል. ኤን መንግስት ለመውጋት ሁነኛው ሰው ሆነው ስላገኟቸው ምዕራባዊያን አይዞዎ ከጐንዎ ነን እንደግፎታለን አሏቸው፡፡

እጃቸው ከገቡ ግዛቶች የሚያፍሱትን አልማዝ በኮንትሮባንድ እየቸበቸቡ የሽምቅ ውጊያ ቡድናቸውን ዩኒታን እስከ አፍንጫው አስታጠቁት፡፡ በአንጐላ መንግስት ወታደሮች ላይ ታላላቅ ድሎችን ጨበጡ፡፡ በአንድ ወቅት ርዕሠ ከተማዋን ሉዋንዳን እስከመክበብ ደረሱ፡፡

ጦርነቱ አሸናፊና ተሸናፊ ቢጠፋው ተፋላሚ ወገኖቹ ተኩስ አቁመን ወደ ምርጫ እንግባ ተባባሉ፡፡

 

የተባባሩት መንግስታት በቅርበት በተከታተለው ፕሬዚዳንታዊ ምርጫ በመጀመሪያው ዙር ሳቪምቢ በተፎካካሪያቸው በፕሬዝዳንት ኤድዋርዶ ዶሳንቶስ ተቀደሙ፡፡

ሳቪምቢ እንዲህ ሲሆን የምን ምርጫ ብለው ወደ ውጊያቸው ተመለሱ፡፡

የድል ወር ተረኛው የአንጐላ መንግስት ሆነ፡፡

የዛሬ 15 ዓመት በዛሬዋ ዕለት ሳቪምቢ በትውልድ ቦታቸው በተካሄደ ውጊያ የመንግስት ጦር ባደረሰው ጥቃት ተገደሉ፡፡

ብዙዎቹ አንጐላውያን ሳቪምቢ ተገደሉ መባሉን አምነው ለመቀበል ተቸገሩ፡፡

ሥነ ምግባራዊ ባይሆንም የአንጐላ መንግስት በጥይት ወንፊት የሆነውን የሳቪምቢን አስከሬን ለቴሌቪዥን ዕይታ አበቃው፡፡

አሜሪካ ጦረኛው ሳቪምቢ መሞታቸውን አረጋግጫለሁ አለች፡፡

የአንጐላ የእርስ በርስ ጦርነት ከሳቪምቢ ጋር ተሸኘ፡፡

የቀድሞው የሽምቅ ውጊያ ድርጅት ዩኒታ ጥይት ማስጮሁን ትቶ ራሱን ወደ ፖለቲካ ማህበርነት ቀየረ፡፡ ከገዢው ኤም.ፒ.ኤል. ጋር ሰላማዊ የፖለቲካ ሙግት እያደረገ ነው፡፡

500 ሺህ ዜጐችን የጨረሰው፤ ብዙዎችን ለአካል ጉዳትና ከቤት ንብረት ለመፈናቀል የዳረገው የአንጐላ የእርስ በርስ ጦርነት ዛሬ ላይ ያለፈ ታሪክ ሆኗል፡፡

የኔነህ ከበደ

በማኅበረ ሰብ ገጾች ያጋሩ

Submit to FacebookSubmit to Google PlusSubmit to TwitterSubmit to LinkedIn
Sheger 102.1 AudioNow Numbers