• United Bank S.C.

    ሕብረት ባንክ አ.ማ.

  • Slider Two

    የምስል ተጓዳኝ መልዕክት

  • Sldier Three

    የምስል ተጓዳኝ መልዕክት

ታሪክን የኋሊት፣መጋቢት 5፣2009

እስከዛሬም እንቆቅልሽ ሆኖ የዘለቀው የጆን ኤፍ ኬኔዲ ግድያ

ከ50 ዓመት በፊት የተገደሉት የአሜሪካ ፕሬዝዳንት ጆን ኤፍ ኬኔዲ ጉዳይ ዛሬም ድረስ እንቆቅልሽ ነው፡፡

ከመላ ምት የዘለለ መደምደሚያ አልተገኘለትም፡፡

የኬኔዲ ገዳይ ነው የሚባለው ሊ-ሐርቬይ ኦስዋልድ በዚያው ሰሞን ጃክ ሩቢ በተባለ ግለሰብ መገደል የኬኔዲን ግድያ ይበልጥ እንቆቅልሽ እንዲሆን አድርጐ ያለፈ ክስተት ሆኗል፡፡

የኦስዋልድ ገዳይ የሆነው ጃክ ሩቢ የዛሬ 53 ዓመት በዛሬዋ እለት በፍርድ ቤት ጥፋተኛ ተባለ፡፡

የኬኔዲ መገደል ለአሜሪካም ለዓለምም አስደንጋጭ ነበር፡፡

ፕሬዝዳንቱን በዳላስ ጉብኝታቸው በአውቶሞቢል ታጅበው እየተጓዙ በነበረበት ወቅት አልሞ በመተኮስ ገድሏቸዋል የተባለው ሊ-ሃርቬይ ኦስዋልድ  በዳላስ በፖሊስ ቁጥጥር ስር ይውላል፡፡

በዚያው ሰሞን ኦስዋልድ ከፖሊስ ጣቢያ ወደ ማረሚያ ቤት ሊላክ በተዘጋጀበት ወቅት ጃክ ሩቢ የተባለው ግለሰብ በኮልት 38 ሸጉጥ ሆድ እቃው ላይ ተኩሶ ይገድለዋል፡፡ ጃክ ሩቢ ግድያውን በፈፀመበት ቦታ እጅ ከፍንጅ ይያዛል፡፡

“ግን ለምን…” የሚለው ጥያቄ ከሴራ ትንበያ ትንታኔ ባለፈ እስከዛሬ እንቆቅልሽ ሆኖ ቆይቷል፡፡

የዛሬ 53 ዓመት በዛሬዋ እለት ጥፋተኛ የተባለው ጃክ ሩቢ የሞት ፍርድ ውሳኔ ተላለፈበት፡፡

ይግባኝ ጠይቆ ጉዳዩ እልባት ሳያገኝ ባደረበት የካንሠር ሕመም ከዚህ ዓለም በሞት ተለየ፡፡

 

ያኔ ግድያውን ሲመረምር የነበረው የዋረን ኮሚሽን የተሠኘው መንግስታዊ አጣሪ አካል በድምዳሜው ኦስዋልድም ሆነ ሩቢ ከኬኔዲ ግድያ ጀርባ የተለየ የሴራ ተልዕኮ እንደነበራቸው የሚያመለክቱ ማስረጃዎችን አላገኘሁባቸውም፤ የሚል መደምደሚያውን አስፍሯል፡፡

ይሁንና ከሴራ ተንታኞች በርካታ ትንበያዎች ሩቢ ግድያውን የፈፀመው ከኩባ ተቃዋሚዎችና ከማፊያ የተደራጀ የወንጀል ቡድን ጋር በነበረው ንክኪ የተነሳ ነው የሚለው አንዱ ነው፡፡

ምክንያት ደግሞ ጆን ኤፍ ኬኔዲ ብቻ ሳይሆኑ እሳት የላሱ የሕግ ባለሙያ የነበሩት ወንድማቸው ሮበርት ኬኔዲም ጭምር በነዚህ የተደራጁ የወንጀል ቡድኖች ጥርስ የተነከሰባቸው እንደነበሩ ያነሳሉ፡፡

ሩቢ ግን ኦስዋልድን መግደሌ ምንም አሻሚነት የለውም፤ አንድ እውነት አለ፡፡ ያን እውነት መናገር አለብኝ፡፡ እዚህ በቴክሳስ እስር ቤት ሕይወቴ አደጋ ውስጥ ነው፡፡ ያንን እውነት እዚህ መናገር አልችልም ብሎ በብርቱ ለመነ፡፡ ወደ ዋሸንግተን እንዲዛወርም ተማፀነ፡፡

እውነቱን ኬኔዲን ለተኳቸው ሊንደን ጆንሰን ተናግሮ ሊያሳምናቸውም ተመኘ፡፡

ወደዛ የሚያደርሰው መንገድ ተዘጋጋ፡፡

እውነት አለኝ እያለ ሳይደመጥ እውነቱ ከሱ ጋር አለፈ፡፡

ኬኔዲ ከቆሰሉ በኋላ መሞታቸው በተረጋገጠበትና በሱ የተተኮሰበት ኦስዋልድ ባረፈበት ፓርክ ላንድ ሆስፒታል እስከወዲያኛው አንቀላፋ፡፡

የጆን ኤፍ ኬኔዲ ግድያ ዛሬም የእውነት ያለህ ማሠኘቱን አላቆመም፡፡ 

የኔነህ ከበደ

በማኅበረ ሰብ ገጾች ያጋሩ

Submit to FacebookSubmit to Google PlusSubmit to TwitterSubmit to LinkedIn
Sheger 102.1 AudioNow Numbers