• United Bank S.C.

    ሕብረት ባንክ አ.ማ.

  • Slider Two

    የምስል ተጓዳኝ መልዕክት

  • Sldier Three

    የምስል ተጓዳኝ መልዕክት

ታሪክን የኋሊት፣መጋቢት 21፣2009

ሩሲያ ለአሜሪካ በ7.2 ሚሊየን ዶላር የሸጠቻት አላስካ አሁን ለአሜሪካ በዓመት ከ40 ቢሊየን ዶላር ታሳፍሳለች…

አላስካ ከአሜሪካ ግዛቶች አንዷና እጅግ ሰፊዋ ነች፡፡

አሜሪካ አላስካን ከሩሲያ በ7 ነጥብ 2 ሚሊዮን ዶላር የገዛቻት የዛሬ 150 ዓመት በዛሬዋ ዕለት ነበር፡፡

አላስካ እንደ ኤስኪሞ ያሉ ነባር ማህበረሰቦች መኖሪያ ብትሆንም በ18ኛው ክፍለ ዘመን በሩሲያ ንጉሳዊ ስርዓት ስር አዳሪ ነበረች፡፡

አላስካ የአሜሪካ 2ኛዋ ሰፊ ግዛት ከሆነችው ቴክሳስ ከሁለት እጥፍ በላይ ነች፡፡

ቴክሳስ ካሊፎርኒያና ሞንታና ቢጣመሩ እንኳ በስፋት አላስካን አያህሏትም፡፡

22 የአሜሪካ ትናንሽ ግዛቶችም በአንድ ላይ ቢጠቃለሉ እንኳ አላስካ ትበልጣቸዋለች፡፡

በተፈጥሮ ጋዝና በነዳጅ ዘይት የበለፀገች ነች፡፡ የአሣ ሐብቷም ተዝቆ አያልቅም፡፡ ከ3 ሚሊዮን በላይ ሐይቆችን ታድላለች፡፡

ሩሲያ አላስካን ለአሜሪካ በሸጠችበት ወቅት ከዛሬው ሐብቷና ጠቀሜታዋ ይልቅ የዚያን ጊዜ ዱርነቷ ብቻ ነበር የታያት፡፡

የዘመኑ የአሜሪካ የውጭ ጉዳይ ሚኒስትር ዊሊያም ሲዋርድ ሩሲያውያን አላስካ በአስተዳደራቸው ስር ብትሆንም ነገሬ እንዳላሏት ተገነዘቡ፡፡

 

የአሜሪካው ውጭ ጉዳይ ሚኒስትር ሩሲያውያን አላስካን ለአሜሪካ እንዲሸጡ አግባቧቸው፡፡

ተሳካላቸውም፡፡

አሜሪካ ሰፊዋን የአላስካ ግዛት ከሩሲያ ለመግዛት 7 ነጥብ 2 ሚሊዮን ዶላር ከፈለቻት፡፡ ሁለት ካሬ ኪሎ ሜትሩን በ1 ሳንቲም ሂሳብ ስሌት ማለት ነው፡፡ ይሄ ከሆነ ዛሬ 150ኛ ዓመቱን ደፈነ፡፡

ታዲያ በዘመኑ እነ ሲዋርድ ዱር የነበረችውን አላስካን በ7 ነጥብ 2 ሚሊዮን ዶላር በመግዛታቸው ከአንዳንድ የፖለቲካው ክበብ ወገኖች በኩል ገንዘባችንን የትም በተኑት ዓይነት ወቀሳ አላጣቸውም፡፡

ዛሬ ግን ይህቺ የማትነጥፍ የሃብትና የፀጋ ምንጭ የሆነች ግዛት ስትታሰብ የእነ ሲዋርድ ብልህነትና አርቆ አሳቢነት መታወሻ ሆናለች፡፡

ያኔ በ7 ነጥብ 2 ሚሊዮን ዶላር የተገዛችዋ አላስካ አሁን በየዓመቱ ለአሜሪካ ከ40 ቢሊዮን ዶላር በላይ ትርፍ እያሳፈሰች ነው፡፡

ሩሲያውያን በንጉስ አሌክሳንደር ዳግማዊ ዘመን በመናኛ ገንዘብ የተሸጠችባቸው የአላስካ ነገር እንደ እግር እሳት ያንገበግባቸዋል፡፡

አላስካ ከሩሲያ የተገዛችበት ቀን በመጋቢት ወር መጨረሻ ሰኞ በየዓመቱ በዓል ሆኖ ይከበራል፡፡

በአላስካ ግዢ ታላቅ ድርሻ ያበረከቱት እነ ዊሊያም ሲዋርድም ይዘከሩበታል፡፡  የሲዋርድ ቀን ተብሎም ይታወቃል፡፡

የኔነህ ከበደ

በማኅበረ ሰብ ገጾች ያጋሩ

Submit to FacebookSubmit to Google PlusSubmit to TwitterSubmit to LinkedIn
Sheger 102.1 AudioNow Numbers