• Slider One

    የምስል ተጓዳኝ መልዕክት

  • Slider Two

    የምስል ተጓዳኝ መልዕክት

  • Sldier Three

    የምስል ተጓዳኝ መልዕክት

ታሪክን የኋሊት፣መጋቢት 26፣2009

የኔቶ ነገር…

በዘመናዊዋ ዓለም ካሉ ወታደራዊ ሕብረቶች በሁለንተናዊ አቅሙና ግዝፈቱ የሰሜን አትላንቲክ የጦር ቃል ኪዳን ድርጅት /ኔቶ/ን የሚስተካከለው የለም፡፡

የቃል ኪዳን ድርጅቱ ማቋቋሚያ ሰነድ ሲመከር ሲዘከርበት ቆይቶ በአሜሪካ ዋሸንግተን ዲ.ሲ የተፈረመው የዛሬ 68 ዓመት በዛሬዋ እለት ነበር፡፡

የጀርመን ናዚዎችና የጦር ተባባሪዎቻቸው እነ ጣሊያንና ጃፓን ያቀጣጠሉት የ2ኛው የዓለም ጦርነት በሕብረቱ ኃይሎች አሽናፊነት ተደመደመ፡፡

ይሁንና እነ አሜሪካና እንግሊዝ በጦርነቱ ዘመን አጋራቸው ከነበረችው ሶቪየት ህብረት ጋር ወዲያውኑ ወደ መቃቃሩ አመሩ፡፡

የአስተዳደራዊ ዘይቤና የፍልስፍና ፈሊጥ ልዩነታቸው ከእለት እለት  እየከረረ መጣ፡፡

የጀርመንን ምስራቃዊ ክፍል የያዙት ሶቪየቶች የምስራቅ በርሊንን መተላለፊያ መንገዶችን ማገዳቸው የእኔ እበልጥ እኔ እበልጥ ቅራኔውን አካረረው፡፡

ምዕራባዊያኑ ግዙፉ የሶቪየት ቀይ ጦር የምዕራብ አውሮፓ አገሮችን ባሻው ሰዓት በእጁ አስገብቶ የኮሚኒስት ፍልስፍናው ተከታይ እንዳያደርጋቸው ሲሉ ስጋት ገባቸው፡፡

የሁለቱ ወገኖች ግዙፍ ፉክክርና በታሪክም ቀዝቃዛው ጦርነት የሚል ስያሜ የተሰጠው ክስተት ምዕራባዊያኑ ራሳቸውን በታላቅ ወታደራዊ ህብረት ስር እንዲያስባስቡ ምክንያት ሆናቸው፡፡

የዛሬ 68 ዓመት በዛሬዋ ዕለት በአሜሪካ ዋሽንግተን ዲሲ በተከናወነ ስነ-ስርዓት የሰሜን አትላንቲክ የጦር ቃል ኪዳን ድርጅት /ኔቶ/ን ማቋቋሚያ ሰነድ ፈረሙ፡፡

 

አሜሪካ፣ ካናዳ፣ ፖርቱጋል፣ ጣሊያን፣ ኖርዌይ፣ ዴንማርክና አይስላንድ የመጀመሪያዎቹ የቃል ኪዳኑ ሰነድ ፈራሚዎች ሆኑ፡፡

በአንዷ የቃል ኪዳኑ አባል አገር ላይ የሚፈፀም ወረራ በኛም ላይ የተሠነዘረ ያህል እንቆጥረዋለን አሉ፡፡ በአንድነት ለመከላከልም ተማማሉ፡፡ ቃሉ ተግባቡ፡፡

ከጥቂት ዓመታት በኋላ ከአገሮች ወታደራዊ ትብብር በራቀ ወደ የግዙፍ ወታደራዊ ተቋምነት አደገ፡፡

ከ3 ዓመታት በኋላ ቱርክና ግሪክም ኔቶን በአባልነት ተቀላቀሉ፡፡

ኔቶ የዚያን ጊዜዋን ምዕራብ ጀርመን በአባልነት መቀበሉ ሆድ ያስባሳት ሶቪየት ህብረት የምስራቅ አውሮፓ ሸሪኮቿን ይዛ የዋርሶ ቃል ኪዳን የተሠኘውን የጦር ድርጅት በኔቶ ተቀናቃኝነት አቋቋመች፡፡

ሁለቱ የጦር ድርጅቶች ከ3 አስርት ዓመታት በላይ በእኔ እበልጥ እኔ እበልጥ ሲዛዛቱ፣ በአሳይሃለሁ ሲፎካከሩ ቆዩ፡፡

በሶቪየት ህብረት ሚካኤል ጐርቫቾቭ ወደ ክሬምሊን መንበር መምጣታቸው ለታሪክ መለወጥ እድል ፈጠረ፡፡

ጐርቫቾቭ ግላስኖስት “ግልፅነት”፤ ፔሬስትሮይካ መልሶ ግንባታ አሉ፡፡

የምስራቅ አውሮፓ ኮምኒስት አገሮች ያዋጣናል ባሉት መሄድ ጀመሩ፡፡

ከእንግዲህ የዋርሶ ቃል ኪዳን ወታደራዊ ድርጅት አያሻንም አሉ፡፡ አፈረሱት፡፡

ዋርሶ ቢፈርስም ኔቶ የአባሎቹን ብዛት ወደ 28 አድርሶና የቀድሞ የዋርሶ አባል አገሮችን ጭምር ጠቅልሎ ራሱን ይበልጥ እያገዘፈና ድንበር ዘለል ዘመቻዎች እያካሄደ ነው፡፡

የኔነህ ከበደ

በማኅበረ ሰብ ገጾች ያጋሩ

Submit to FacebookSubmit to Google PlusSubmit to TwitterSubmit to LinkedIn
Sheger 102.1 AudioNow Numbers