• Slider One

    የምስል ተጓዳኝ መልዕክት

  • Slider Two

    የምስል ተጓዳኝ መልዕክት

  • Sldier Three

    የምስል ተጓዳኝ መልዕክት

ታሪክን የኋሊት፣መጋቢት 27፣2009

የአሜሪካን የአቶሚክ ቦምብ ሚስጥር ሲያፈተልክ

መቼም አገሮች ዜጐቻቸውን አሳድገው አስተምረው ለወግ ለማእረግ ቢያበቁም አልፎ አልፎ “ባጐረስኩ እጄን ተነከስኩ” ዓይነቱ ሁኔታ የሚያጋጥማቸው ጊዜ አለ፡፡

ታላቋ አገር አሜሪካ ከዜጐቿ ወጭት ስባሪ ሆነው ጥብቅ ሚስጥሯን ለሌሎች አገሮች ሲዘከዝኩ የተደረሰባቸው ቁጥር ቀላል አይደለም፡፡

ኤቴልና ጁሊየስ ሮዘንበርግ ከወጭት ስባሪዎቹ መካከል የሚጠቀሱ ናቸው

ባልና ሚስቱ ለቀድሞዋ ሶቪየት ህብረት በሰላይነት ተሰልፈው የአሜሪካንን የአቶሚክ ጦር መሳሪያ የተመለከቱ የበረከቱ ሚስጥራዊ ሰነዶችን ለሞስኮ በማስተላለፍ አገራቸውን በእጅጉ በደሏት፡፡

ጉዳያቸውን የተመለከተው ፍርድ ቤት ድርጊታቸው አሜሪካንን ብቻ ሳይሆን የአሜሪካ ወዳጆችን ጭምር የጐዳ ብሎ በሞት እንዲቀጡ የወሰነው የዛሬ 66 ዓመት በዛሬዋ እለት ነው፡፡

በሁለተኛው የዓለም ጦርነት ሂደት የጀርመን ናዚዎች የአቶሚክ የጦር መሳሪያ ለመታጠቅ  እየተጣደፉ ነው መባሉ ዋሽንግተንም ለዚሁ እንድትተጋ ምክንያት ሆነ፡፡

ዝነኛውን የፊዚክስና የሂሳብ ሊቅ አልበርት አንስታይንን ጨምሮ ሌሎችንም ሳይንቲስቶች ያቀፈውን የማሐተንን ፕሮጄክት ስራ ላይ ለማዋል ጥድፊያ ውስጥ ገባች፡፡

አሜሪካ የአቶሚክ ቦምብን ያህል ነገር ለመስራት ታላቅ ፍላጎት ሲያድርባት ውጥኗን ከዘመኑም ሆነ ከመጪ ተቀናቃኞቿ ዓይን ለመሰወር ጥብቅ ሚስጥራዊ እንዲሆን የተቻላትን ሁሉ ክለላ አድርጋለች፡፡

የኒኩሊየር የጦር መሳሪያ ከፍተኛ ጉልበት ክብርና ተሰሚነት ተፈሪነትንም የሚያጐናፅፋት በመሆኑ አንዳች ሚስጥር አፈትልኮ ተቀናቃኞቿ ዘንድ እንዳይደርስ ብዙ ጥራለች፡፡   

የአሜሪካ የአቶሚክ ቦምብ ሚስጥር ከውጥኑ አንስቶ በዘመኑ የአሜሪካ ዋነኛ ባላንጣና ተቀናቃኝ ለነበረችዋ ሶቪየት ህብረት ሚስጥር አልነበሩም፡፡

ባልና ሚስቶቹ አሜሪካውያን ኤቴልና ጁልየስ ሮዝንበርግ ስለ ማንሐተኑ ውጥን ከአላማ ተባባሪዎቻቸው ጋር ተመሳጥረው የውድ ውድ የተሰኙትን የአሜሪካ ሚስጥሮች እየጐለጉሉ ለሞስኮ አስታቅፈዋታልና፡፡

እድሜ ለነሮዘንበርግ ሞስኮ ስለ አሜሪካ የአቶሚክ የጦር መሳሪያ ቀመርና ንጥረ ነገራዊ ቅመማ ሚስጥሩን ሁሉ በእጇ አስገባች፡፡

ሶቪየት ህብረት ከአሜሪካ አራት ዓመታት ዘግይታ በአጥፊነት ኃይሉ ከአሜሪካው የላቀውን የአቶሚክ ቦምብ ለመታጠቅ በቃች፡፡

ከዚያን ጊዜ አንስቶ አሜሪካና ሶቪየት ህብረት አሁን ደግሞ ሩሲያ በኒኩሊየር የጦር መሳሪያ እሽቅድምድም ላይ ናቸው፡፡ 

ባልና ሚስቱ አሜሪካውያን ኤቴልና ጁልየስ ሮዘንበርግ ለሞስኮ ያስተቀፏት የአሜሪካ ሚስጥራዊ መረጃ ሶቪየት የቀድሞዋ ህብረት የኒኩሊየር የጦር መሳሪያ እውቀትን ለመጨበጥ ይፈጅባት የነበረውን ጊዜ በእጅጉ እንዳሳጠረው በታሪክ ሰፍሮ ይገኛል፡፡

ሰዎቹ የሞስኮን ከኒኩሊየር የጦር መሳሪያ ግንባታ እውቀት የመጨበጫዋን ጊዜ ብቻ ሳይሆን የራሳቸውንም ሕይወት ያሳጠሩበት ሆነ፡፡

ፍርድ ቤት ቀረቡ፡፡ ጥፋተኛ ተባሉ፡፡ በሞት እንዲቀጡ ተፈረደባቸው፡፡

ከጥቂት ወሮች በኋላ በኤሌክትሪክ ወንበር እንዲቀመጡ ተደርገው የሞት ቅጣቱ ተፈፀመባቸው፡፡ 

የኔነህ ከበደ

በማኅበረ ሰብ ገጾች ያጋሩ

Submit to FacebookSubmit to Google PlusSubmit to TwitterSubmit to LinkedIn
Sheger 102.1 AudioNow Numbers