• Slider One

    የምስል ተጓዳኝ መልዕክት

  • Slider Two

    የምስል ተጓዳኝ መልዕክት

  • Sldier Three

    የምስል ተጓዳኝ መልዕክት

ታሪክን የኋሊት፣ሚያዝያ 3፣2009

ኢዲ አሚን ዳዳ

የቀድሞው የኡጋንዳ መሪ ኢዲ አሚን ከለየላቸው ፈላጭ ቆራጭ የአፍሪካ አምባገነን መሪዎች አንዱ ነበሩ፡፡

አሚን የአድራጊ ፈጣሪነታቸው፣ የፈላጭ ቆራጭነታቸው ጀምበር ጠልቃባቸው መንግሥታቸው ተወግዶ ከሥልጣን የተባረሩት የዛሬ 38 ዓመት በዛሬዋ ዕለት ነው፡፡

ኢዲ አሚን በለጋ ወጣትነታቸው ዘመን በብሪታንያ ቅኝ ገዢ ሠራዊት ውስጥ በውትድርና ተመልምለው ከአገራቸው ርቀው በእስያዊቱ በርማ አገልግለዋል፡፡

ከዚያም በኋላ በኬኒያም በቅኝ ገዢው ሠራዊት ውስጥ በማገልገል ብሪታንያውያን ለባዕዳን ወታደሮቻቸው ከሚሰጡት የበታች ሹምነት ከፍተኛው ዕርከን ደርሰዋል፡፡

የኡጋንዳ ነፃነት ሲቃረብ ወደ አገራቸው የተሸኙት አሚን ወታደራዊ ሹመቱ በላይ በላዩ ሆነላቸው፡፡

መጀመሪያ የመቶ አለቃ ከዚያም ሻምበል ወዲያው ደግሞ ሻለቃ ሆኑ፡፡

ሹመታቸው ማቆሚያ አልነበረውም፡፡ ከ47 ዓመታት በፊት በጦር ኃይሉ የበላይነት ተሰየሙ፡፡

ለአሚን በሥልጣን መመንደግ ከዘመኑ ጠቅላይ ሚኒስትር ኋላም ፕሬዝዳንት ሚልተን ኦቦቴ ጋር መሻረክ መወዳጀታቸው በብዙ አግዟቸዋል፡፡                                                         

ከፍተኛ የጦር ሹምነታቸውን ተጠቅመው ከጐረቤት ኮንጐ ኪንሻሣ ወርቅ በኮንትሮባንድ ወደ ኡጋንዳ በማስገባት ሐብት አጋበሱ፡፡

በዚያ ላይ ከመንግሥት ካዝና በወጣ ገንዘብ ወታደሮችን በመመልመል ለራሳቸው ታማኝ የሆነ የጦር ክፍል ማደራጀቱን ተያያዙት፡፡

ይሄ ሥውር ፍላጐታቸው ከዘመኑ ፕሬዝዳንት ሚልተን ኦቦቴ ጋር አቃቃራቸው፡፡

ኦቦቴ አሚንን ሊያስሯቸው አሰቡ፡፡

 

የቀድሞው ፕሬዝዳንት ይሄን ኃሣባቸውን ከዳር ሳያደርሱት ለጋራ ብልፅግና /ኮመን ዌልዝ/ አባል አገሮች ስብሰባ ወደ ሲንጋፖር ተጓዙ፡፡

አድብተው ሲጠባበቁ የነበሩት አሚን የኦቦቴን መንግሥት ገልብጠው ሥልጣን ላይ ጉብ አሉ፡፡

ከዕለት ዕለት ጭቆናቸውን  ያከፉት፣ አገዛዛቸውን ያጠብቁት ያዙ፡፡

አሚን ራሳቸውን እጅግ የተከበሩ የዕድሜ ልክ ፕሬዝዳንት ፊልድ ማርሻል አል ሃጂ ዶክተር ኢዲ አሚን አል ዳዳ አሰኙ፡፡

ይሄ እንደው ከረዘመው የማዕረግ ቅጥልጥላቸው ያጠረው ነው፡፡

በአሚን የአስተዳደር ዘመን የዜጐች ያለ ፍርድ መረሸኑ፣ መገረፍ፣ መሰቃየቱ፣ በየእሥር ቤቱ መታጐሩ አሰቃቂነቱ ከፋ፡፡

አሚን የልብ ልብ በተሰማቸው ጊዜ የታንዛኒያዋን ካጌራ ግዛት ለመውረር ተነሱ፡፡

እንደ አነሳሳቸው አልሆነላቸውም፡፡

የታንዛኒያ ጦር የኡጋንዳ አማፂያንን አስከትሎ በመልሶ ማጥቃት መጣባቸው፡፡

የሊቢያ ወታደሮች ሊያግዟቸው ቢመጡም አላተረፏቸውም፡፡

አሸናፊው ኃይል የኡጋንዳዋን ርዕሰ ከተማ ካምፓላን ጭምር ተቆጣጠራት፡፡

ይሄ ከሆነ ዛሬ 38ኛ ዓመቱ ሆነ፡፡

አሚን የ8 ዓመታት ፈላጭ ቆራጭና አምባገነናዊ አገዛዛቸው አክትሞ ለስደት ተዳረጉ፡፡

በስደት ላይ እያሉም ከዚህ ዓለም በሞት ተለዩ፡፡

የኔነህ ከበደ

በማኅበረ ሰብ ገጾች ያጋሩ

Submit to FacebookSubmit to Google PlusSubmit to TwitterSubmit to LinkedIn
Sheger 102.1 AudioNow Numbers