• Slider One

    የምስል ተጓዳኝ መልዕክት

  • Slider Two

    የምስል ተጓዳኝ መልዕክት

  • Sldier Three

    የምስል ተጓዳኝ መልዕክት

ታሪክን የኋሊት፣መጋቢት 29፣2009

ሰር ዊንስተን ቸርችል

ዊንስተን ቸርችል በብሪታንያ ታላቅ አሻራቸውን ያኖሩ ታላቅ የፖለቲካና የአስተዳደር ሰው ነበሩ፡፡

ቸርችል በ2ኛው የዓለም ጦርነት ዘመን የብሪታንያ ጠቅላይ ሚኒስትር የነበሩ መሆኑ የመከራ ወቅት መሪነታቸው ልዩ ታዋሽ አድርጓቸዋል፡፡

ቸርችል ጦርነቱ ካበቃ በኋላ በጠቅላይ ሚኒስትርነት ሲያገለግሉ ቆይተው በጤና መጓደል ምክንያት ሥልጣን የለቀቁት የዛሬ 62 ዓመት በዛሬዋ ዕለት ነበር፡፡

ቸርችል በወጣትነታቸው ወደ ብሪቲሽ ሮያል ወታደራዊ ኮሌጅ ገብተው የጦር ትምህርት ቀስመዋል፡፡

በተለያዩ አገሮችም በብሪታንያ ጦር ኃይል ባልደረባነት አገልግለዋል፡፡

ከጦሩም ከተሰናበቱ በኋላ ሞርኒንግ ፖስት ለሚሰኝ ጋዜጣ በጦር ጉዳዮች ዘጋቢነት ሰርተዋል፡፡

በፓርላማ እንደራሴነታቸው ዘመን በተለይም የአገሪቱ ባሕር ኃይል እንዲዘምንና ትጥቁ እንዲሻሻል ብዙ ጐትጉተዋል፤ ተሣክቶላቸዋልም፡፡

ለአየር ኃይሉም ዕድገት የበኩላቸውን ድርሻ ተወጥተዋል፡፡

ቸርችል ወታደራዊ እውቀታቸውና ፖለቲካዊ ብሥለታቸው አገሪቱ ወዳልቀረላት ወደ 2ኛው የዓለም ጦርነት በገባች ጊዜ እሳቸው ጠቅላይ ሚኒስትር የነበሩ መሆኑ ለብሪታንያ መልካም አጋጣሚ እንደሆነላት ተመሥክሮላቸዋል፡፡

ገና ከመነሻውም አንስቶ ቸርችል የ2ኛው የዓለም ጦርነት ቆስቋሾች የሆኑትን ናዚዎች አነሳስና አዝማሚያ በብርቱ መንቀፍና መቃወማቸው የሚታወቁበት ነው፡፡

ከትችትና ተቃውሞም ባለፈ ናዚዎቹ የጋረጡት አደጋ ለብሪታንያም እንደሚተርፋት በትክክል ገምተዋል፤ አስልተዋል፡፡

 

ብሪታንያ ለመከላከሉም ሳታወላውል ወገቧን ጠበቅ እንድታደርግ በማስቻሉ በኩል አልተዘናጉም፡፡

ከናዚ ጀርመንና ከጦር ተባባሪዎቿ በተፃራሪ ከተሰለፉት እንደ አሜሪካና የቀድሞዋ ሶቪየት ኅብረት ጋር ኅብረት መፍጠራቸው በጦርነቱ ለማሸነፍ ታላቅ ፋይዳ ነበረው፡፡

በጦርነቱም እነ ብሪታንያ፣ አሜሪካና የቀድሞዋን ሶቪየት ኅብረት ያቀፈው ኃይል አሸናፊ ሆነ፡፡

ከጦርነቱ በኋላ በምርጫ ተሸንፈው ጠቅላይ ሚኒስትርነታቸውን ቢያጡም ቸርችል ተቃዋሚም ሆነው ፖለቲካውን ማቀለጣጠፉን ያውቁበት ነበር፡፡

ከጥቂት ዓመታት በኋላ ወደ ጠቅላይ ሚኒስትርነታቸው መመለሳቸው ይህንኑ ችሎታቸውን ያስመሰከሩበት አጋጣሚ ነበር፡፡

ቸርችል በሥነ-ፅሁፍ ረገድም አንቱ የተሰኙ ናቸው፡፡

ከ64 ዓመታት በፊት በዘርፉ ለኖቤል ተሸላሚነት መብቃታቸው የዚሁ ችሎታቸው ነፀብራቅ ተደርጐ ይቆጠራል፡፡

ቸርችል ከዚህ ዓለም በሞት ቢለዩም በአገራቸውም ሆነ በውጭው ዓለም የምንግዜም መታወሻዎቻቸው እጅግ በርካቶች ናቸው፡፡

እዚህ እኛም ዘንድ በርዕሰ ከተማችን አዲስ አበባ በስማቸው የተሰየመው የቸርችል ጐዳና የኚሁ ትላቅ ብሪታንያዊ መታወሻ ነው፡፡

የኔነህ ከበደ

በማኅበረ ሰብ ገጾች ያጋሩ

Submit to FacebookSubmit to Google PlusSubmit to TwitterSubmit to LinkedIn
Leza Vote Banner
Sheger 102.1 AudioNow Numbers