• Slider One

    የምስል ተጓዳኝ መልዕክት

  • Slider Two

    የምስል ተጓዳኝ መልዕክት

  • Sldier Three

    የምስል ተጓዳኝ መልዕክት

ታሪክን የኋሊት፣ሚያዝያ 2፣2009

ታላቁ እሳተ ገሞራ…

የታምቦራ ተራራ በኢንዶኔዥያ ከተራሮቹ ነገስታት አንዱ ነው፡፡

የዛሬዋ እለት በዚህ ተራራ ታሪክ የተለየ ቦታ አላት፡፡

የዚህ ተራራ እሳተ ገሞራ ፈንድቶ ታላቅ ጥፋት ማድረስ የጀመረው የዛሬ 200 ዓመት በዛሬዋ እለት ነበር፡፡

በታምቦራ ተራራ ስር የታመቀው እሳተ ገሞራ ለበርካታ አስርት ዓመታት ከምድር ውስጥ ሲንተከተክና ሲብላላ ኖሮ መጣሁ መጣሁ አለ፡፡

ታላቅ ፍንዳታም ሆነ፡፡ የእሳተ ገሞራው ትፍ ገንፍሎ የተራራውን አናት ጥሶ እንደሮኬት ወደ ሰማይ ተመነጠቀ፡፡

የእሳተ ገሞራው ፍንዳታ ከታምቦራ ተራራ ከ2 ሺህ ኪሎ ሜትር በላይ ርቀት እስካላት ሱማትራ ደሴት ድረስ ተሠማ፡፡

ከተራራው የተንዠቀዠቀው የእሳት ጅረትና ትፍ አመዱ አገሩን አዳረሰው፡፡

86 ኪሎ ሜትር ርዝመትና 36 ኪሎ ሜትር ስፋት አካለለ፡፡

የእሳተ ገሞራ ትፉ ዛፎችን መነጋገለ፡፡ ስብሉንም በላ፡፡ እስከ 4 ሜትር ከፍታ ያለውም መለስተኛ የሱናሚ ማዕበልም ቀሰቀሰ፡፡

የእሳተ ገሞራው ፍንዳታ ያስከተለው ተፅዕኖ ከኢንዶኔዥያም የተሻገረ ነበር፡፡

 

በዘመኑ በዓለም የአየር ጠባይ ላይ የራሱን አሉታዊ ተፅዕኖ አሳድሯል፡፡

በተለይም በሰሜናዊ ንፍቀ ክብብ አገሮች የእሳተ ገሞራ ክረምት የተባለውን ክሰተት አስከተለ፡፡

በአውሮፓና በአሜሪካ ጭምር በበርካታ አካባቢዎች የበጋዋ ፀሐይ በታምቦራ እሳተ ገሞራ ትፍ አመድ ጭጋግ ተጋረደች፡፡

ዓመቱ ያለ በጋ፤ በጋውም ያለ ፀሐይ አለፈ፡፡ ጭጋጉ እስከ ነሐሴ ወር ድረስ ሰማዩን እንደሸፈነ ቆየ፡፡

በበረከቱ አካባቢዎች ሰብል ጠፋ፡፡ ከብቶችም ተረፈረፉ፡፡

ችግሩ ዘልቆና አድማሱን አስፍቶ በ19ኛው ምዕተ-ዓመት የከፋውን ረሃብ አስከተለ፡፡

የታምቦራው የእሳተ ገሞራ አደጋ በኢንዶኔዥያ ብቻ ወዲያውኑ በቀጥታ እስከ 12 ሺህ ያህል ሰዎችን ጨረሰ፡፡

እሳተ ገሞራው ባስከተላቸው የተለያዩ ተፅዕኖዎች ደግሞ ያለቁት ሲጨመሩ የማቾቹ ብዛት ከ71 ሺህ በላይ መሆኑ ይነገራል፡፡

በሩቅ ደግሞ በምስራቅና በደቡባዊ አውሮፓ አገሮች እሳተ ገሞራው ባስከተለው የአየር ንብረት ለውጥ ተፅዕኖ ከሌላው ሌላው ምክንያት ጋር ተደማምሮ 200 ሺህ ሰዎችን መጨረሱ ይነገራል፡፡

የታምቦራ እሳተ ገሞራ ፍንዳታ የእሳተ ገሞራ ታሪክ መመዝገብ ከተጀመረ አንስቶ ከደረሱት አስከፊና ታላላቅ መሠል አደጋዎች አንዱ ተደርጐ ይጠቀሳል፡፡

የኔነህ ከበደ

በማኅበረ ሰብ ገጾች ያጋሩ

Submit to FacebookSubmit to Google PlusSubmit to TwitterSubmit to LinkedIn
Leza Vote Banner
Sheger 102.1 AudioNow Numbers