• Slider One

    የምስል ተጓዳኝ መልዕክት

  • Slider Two

    የምስል ተጓዳኝ መልዕክት

  • Sldier Three

    የምስል ተጓዳኝ መልዕክት

ታሪክን የኋሊት፣ሚያዝያ 12፣2009

በአጭሩ የተቀጨው የሊግ ኦፍ ኔሽንስ ነገር…

ከ2ኛው የዓለም ጦርነት ባይስተካከልም ከ97 ዓመታት በፊት የተካሄደው የ1ኛው የዓለም ጦርነት ከፍተኛ ጥፋትና ውድመት አድርሷል፡፡

በጦርነቱ ሂደት ለሰላም የሚሞግትና ጥብቅና የሚቆም ዓለማዊ ድርጅት እንዲመሠረት ኃሳብ ቀረበ፡፡

ለዚህ ዓላማ የተቋቋመው ሊግ ኦፍ ኔሽንስ በአጭር የተቀጨውና ሕልውናው ያከተመው የዛሬ 71 ዓመት በዛሬዋ ዕለት ነበር፡፡

የ1ኛው የዓለም ጦርነት ጥፋትና ውድመት ያነቃቸው ወገኖች ስለ ሰላም የሚቆም፣ የሚከራከር፣ ለሰላም ጥበቃም ዘብ የሚቆም ዓለም አቀፍ ድርጅት እንዲቋቋም ጐተጐቱ፡፡

በ1ኛው የዓለም ጦርነት ማብቂያ በፓሪስ በተካሄደው የሰላም ጉባዔ ሊግ ኦፍ ኔሽንስ /የመንግሥታቱ ማኅበር/ ተመሠረተ፡፡

የሰላም ማኅበር ሲሉ የሚያቆላምጡትም ነበሩ፡፡

ይሁንና ብዙም ሳይዘልቅ ለዓላማው መቆም ተሳነው፡፡

ታላላቅ ጉልበተኛ አገሮች በአቅመ ደካሞቹ ላይ የግፍ ወረራ ሲፈፅሙና በማናለብኝነት ሲታበዩ ሐይ ማለት ተሳነው፡፡

ኢትዮጵያ የማኅበሩ አባል ሆና ሳለ በፋሽስቶች የግፍ ወረራ ሲፈፀምባት ላስጥልሽ ብሎ አልተነሳም፡፡

 

ለይስሙላ በጣሊያን ላይ ማዕቀብ እንዲጣልባት ቢወስንም ውሳኔው ከአንገት በላይ ነበር፡፡ በዚህም ፍርደ ገምድልነቱን በግላጭ አሳየ፡፡

ኢትዮጵያ በጣሊያን ፋሽስቶች በግፍ የተፈፀመባት ወረራ ከበርካታ የመንግሥታቱ ማኅበር እርባና ቢስነት ምሣሌዎች አንዱ ሆነ፡፡

በዓለም ሰላም ወዳዶች ዘንድ ድንቄሙ የሰላም ማኅበር ተብሎ ተነቀፈ፣ ተብጠለጠለ፡፡

የመንግሥታቱ ድርጅት ከአባላቱ የጋራ የሰላም ድምፅነት ይልቅ የእብሪተኛ ኃያላን ፍላጐት ማስፈፀሚያ ሆነ፡፡

ይህም ተቋቁሜለታለሁ ላለው ዓላማ መገዛት እንደማይችል አጋለጠው፡፡ አቋመ ሸብራካ ሆነ፡፡ እብሪተኞችን ሐይ ማለት ተሳነው ራሱን በራሱ ጠልፎ ጣለ፡፡

ዓለም በዘመኑ ወደ 2ኛው የዓለም ጦርነት ለተነዳችበት አጋጣሚ አንድ ባለ ድርሻ ነው፡፡

በሁለተኛው የዓለም ጦርነት ሂደት ቀዳሚውን ስሕተት ላለመድገም የአሁኑን የተባበሩት መንግሥታት ድርጅት የማቋቋሙ ኃሳብ ሲጠነሰስ የመንግሥታቱን ማኅበር ከነ አካቴው ማፍረሱ አስፈለገ፡፡ የዛሬ 71 ዓመት በዛሬዋ ዕለት የመንግሥታቱ ማኅበር ከነ አሳፋሪ ታሪኩ እስከወዲያኛው ላይመለስ ተሸኘ፡፡

የኔነህ ከበደ

በማኅበረ ሰብ ገጾች ያጋሩ

Submit to FacebookSubmit to Google PlusSubmit to TwitterSubmit to LinkedIn
Leza Vote Banner
Sheger 102.1 AudioNow Numbers