• Slider One

    የምስል ተጓዳኝ መልዕክት

  • Slider Two

    የምስል ተጓዳኝ መልዕክት

  • Sldier Three

    የምስል ተጓዳኝ መልዕክት

ታሪክን የኋሊት፣ሚያዝያ 13፣2009

ጄኔራል ሉዊስ ጋርሲያ ሜዛ

የደቡብ አሜሪካዋ አገር ቦሊቪያ ወደ ዴሞክራሲያዊ የአስተዳደር ዘይቤ እስከተመለሰች ድረስ አምባገነን መሪዎች ሲቀባበሏት ኖረዋል፡፡

ከ37 ዓመታት በፊት በመንግሥት ግልበጣ የአገር መሪ የሆኑት ጄኔራል ሉዊስ ጋርሲያ ሜዛ ሲጨቁኑ፣ ሲገድሉ፣ ሲዘርፉና ሲያሰቃዩ ኖረው በሰፈሩት ቁና የተሰፈሩት የዛሬ 24 ዓመት በዛሬዋ ዕለት ነበር፡፡

የአገሪቱ ጠቅላይ ፍርድ ቤት ጋርሲያ ሜዛን አመክሮ የሌለው የ30 ዓመት እስር ያከናነባቸው ያኔ በዚህ ቀን ነበርና፡፡

ጄኔራል ጋርሲያ ሜዛ ከ40 ዓመታት በፊት ወታደራዊ ሹመት ማዕረጋቸው በላይ በላዩ ሆነላቸው፡፡

እስከ ክፍለ ጦር አዛዥነትም ደርሰዋል፡፡

በክፍለ ጦር አዛዥነት ሳይወሰኑ ወደ አገር መሪነቱ ማማተር ጀመሩ፡፡

 

የአብዛኞቹን የጦር ክፍሎች ወታደሮች ደጋፊዎቻቸው አደረጉ፡፡

መንግሥታቸው በመጣ ጊዜ ሕገ-ወጥ ሥራችንን አይተው አንዳላዩ በመሆን ጥላ ከለላችን ይሆናሉ ብለው የተማመኑባቸው የአደገኛ ዕፅ አዘዋዋሪዎች ለግልበጣቸው ማገዣ ገንዘብ አስታቀፏቸው፡፡

የገዛ ዘመዳቸውን የፕሬዝዳንት ሊዲያ ጉይለርን መንግሥት በወታደራዊ ግልበጣ አሽቀነጠሩት፡፡

ግልበጣቸው በአደገኛ ዕፅ አስተላላፊዎች የገንዘብ ድጋፍ የታገዘ ጭምር በመሆኑ የኮኬይኑ ግልበጣ በሚል ቅፅልም ይታወቃል፡፡

ጄኔራል ጋርሲያ ሜዛ ሥልጣን እንደጨበጡ ሁሉንም የፖለቲካ ማኅበራት ሕገ-ወጥ አደረጓቸው፡፡

የሙያ ማኅበራትን አፈራረሱ ,፤ መሪዎቻቸውንም አሰሩ፡፡ ብዙዎቹንም ለስደት ዳረጓቸው፡፡ ጄኔራል ጋርሲያ ለጭቆናቸው ማክበጃ አሰቃዮችና ገራፊዎችን ከውጭ አገራት ሳይቀር በመቅጠር ወደ ቦሊቪያ አስመጥተዋል፡፡

ጋርሲያ ይሄን ሁሉ ግፍ ሲፈፅሙ የጀርመን ናዚዎች የጦር ወንጀለኛ የሆነው ክላውስ ባርቤይና ከአዲስ መጤዎቹ የጣሊያን ፋሽስቶች ወገን የሆነው ስቴፋኖ ዴሌም የቅርብ ተባባሪዎቻቸው ነበሩ፡፡

ጄኔራል ሉዊስ ጋርሲያ ሜዜ ጄኔራል አውጉስቶ ፒኖሼት በቺሊ የፈፀሙትን ዓይነት ጭፍጨፋ ፈፀሙ፡፡ ግፍ ዋሉ፣ መዘበሩ፣ ዘረፉ፡፡

የጋርሲያ መንግሥት ከአደገኛ ዕፅ አስተላላፊዎች ጋር እጅና ጓንት በመሆኑ ቀስ በቀስ አሜሪካ አንቅራ ተፋችው፡፡ በጦሩ ውስጥ ያለው ድጋፍም ሳሳበት፡፡ ጄኔራሉ ሳይወዱ ተገድደው አገር ጥለው ተሰደዱ፡፡

የዛሬ 24 ዓመት በዛሬዋ ዕለት የአገሪቱ ጠቅላይ ፍርድ ቤት ምህረትም አመክሮም የሌለው የ30 ዓመታት የእሥር ቅጣት ፈረደባቸው፡፡ በስደት የቆዩባት ብራዚልም ለቦሊቪያ አሣልፋ ሰጠቻቸው፡፡

ጋርሲያም በአንድ ወቅት ተቃዋሚዎቻቸውን ሲያጉሩበት በነበረ እስር ቤት ቅጣታቸው እየተቀበሉ ነው፡፡

የኔነህ ከበደ

 

በማኅበረ ሰብ ገጾች ያጋሩ

Submit to FacebookSubmit to Google PlusSubmit to TwitterSubmit to LinkedIn
Leza Vote Banner
Sheger 102.1 AudioNow Numbers