• Slider One

    የምስል ተጓዳኝ መልዕክት

  • Slider Two

    የምስል ተጓዳኝ መልዕክት

  • Sldier Three

    የምስል ተጓዳኝ መልዕክት

ታሪክን የኋሊት፣ግንቦት 16፣2009

“የሄሊኮፕተር ጅማሮ”

የኛ ሀገር ወታደሮች ከእናት ያመሳስሏታል፡፡ “እናት” በሚል ቁልምጫም ይጠሯታል፡፡

ይሄ ይጐረብጠኛል ያኛው ቦታ ይቆረቁኛል ሳትል በየአስቸጋሪው መልክዓ ምድር ሳይቀር በማረፍ እጅግ አስፈላጊያቸው ነች፡፡

ስንቃቸውን፣ ትጥቃቸውን፣ ውሃቸውን ታቀርባለች፡፡ ተዋጊያቸውም ተከላካያቸውም ሆና ታግዛለች፡፡

የወታደሮቹ “እናት” ሂሊኮፕተር ነች፡፡

ትውልደ ሩሲያ አሜሪካዊው ኢጐር ኢቫኖቪች ሲኮርስኪ የመጀመሪያውን የተሳካ የሂሊኮፕተር በረራ ሙከራ ያከናወነው የዛሬ 77 ዓመት በዛሬዋ ዕለት ነበር፡፡

ሂሊኮፕተር ለጐማዎቿ ወይም ለብረት ክናዷ ማሳረፊያ እስካገኘች ድረስ ለማረፍ የግዴታ ሰፊ ደልዳላ ሜዳ ይሁንልኛ አትልም ስትነሳም መንደርደርም ሆነ ማኮብኮብ አያሻትም፡፡ ያው ካለችበት ቀጥ ብላ ወደላይ አየሩን ትቀዝፋለች፡፡

በአየር ላይ በአንድ ቦታ ሚዛኗን ጠብቃ መቆየት ከአውሮፕላን የምትልቅበት ቴክኒካዊ ብቃቷ ነው፡፡

በየገደላ ገደሉ በየሸለቆው መካከል መሹለክለክ ሽር ማለቱ ኧረ ስንቱ ይሄ ሁሉ የሂሊኮፕተር ገድል ነው፡፡

እንደ አውሮፕላን ሁሉ የሂሊኮፕተር መፈልሰፍ በሰው ልጅ አዕምሮ የተፀነሰው በቀደመውና በራቀው ዘመን ነው፡፡

 

የመጀመሪያዎቹን ሂሊኮፕተሮች በማነፅና በመሞከር ረገድ በርካታ ግለሰቦችና የተለያዩ ሀገሮች ይጠቀሳሉ፡፡

ባለ ነጠላ ሽክርክሪቷን ሂሊኮፕተር በብዛት አምርቶ ለአገልግሎት በማብቃት በኩል የዛሬ 77 ዓመቷ የዛሬዋ እለት የተለየ ስፍራ አላት፡፡

ትውልደ ሩሲያ አሜሪካዊው ኢጐር ኢቫኖቪች ሲኮርስኪ (Igor Ivanovich sikorsky) ቪ.ኤስ-300 ሲል የሰየማትን ሂሊኮፕተር በተሳካ ሁኔታ የሞከረባት ናትና፡፡

በወቅቱ 130 ገደማ የዚህች አይነት ሂሊኮፕተሮች ተመርተው በ2ኛ የዓለም ጦርነት ዘመን አገልግለዋል ይባላል፡፡

ከቀዳሚዎቹ ተሞካሪ ሂሊኮፕተሮች በእጅጉ የተሻለችዋን ሞዴል በኢንዱስትሪ ደረጃ በብዛት አምርቶ ለማውጣት ሲኮርስኪን ከትውልድ አገሩ ጀምሮ ከ30 ዓመታት በላይ ልፋት ድካምና ጥረትን ጠይቆታል፡፡

መውደቅ መነሳት አጋጥሞታል፡፡ እክል መሰናክሉን አልፏል፡፡

በአሁኑ ወቅት ዓይነታቸውም አገልግሎታቸውም የበረከተ ሂሊኮፕተሮች በሰማዩ ወዲያ ወዲህ ቢሉበት መነሻዎቹ የሲኮርስኪ ውጤቶች ናቸው፡፡

የኔነህ ከበደ

በማኅበረ ሰብ ገጾች ያጋሩ

Submit to FacebookSubmit to Google PlusSubmit to TwitterSubmit to LinkedIn
Leza Vote Banner
Sheger 102.1 AudioNow Numbers