• Slider One

    የምስል ተጓዳኝ መልዕክት

  • Slider Two

    የምስል ተጓዳኝ መልዕክት

  • Sldier Three

    የምስል ተጓዳኝ መልዕክት

ታሪክን የኋሊት፣ሰኔ 8፣2009

ጆርጅ ዋሽንግተን

የአሜሪካ ባለ አንድ ዶላር ኖት አንድ ገፅ ላይ ምስላቸው ሰፍሯል፡፡ ከግንባር ቀደሞቹ የአሜሪካ መስራች አባቶች በቀዳሚነት ይነሳሉ፡፡ እኚህ የታላቋ ሀገር መስራች አባት ጆርጅ ዋሸንግተን ናቸው፡፡

ጆርጅ ዋሸንግተን ለአሜሪካ ያልሆኑላት የለም፡፡ ድንቅ ፖለቲከኛና ቆፍጣና የጦር መሪ የተዋጣላቸው የአስተዳደር ሰውና የመጀመሪያውም የአገሪቱ ኘሬዝዳንት ነበሩ፡፡

ጆርጅ ዋሸንግተን አሜሪካ እንደ አገር ሕልውና ከማግኘቷ በፊት ለነፃነት የተነሳሳውን ጦር በአዛዥነት እንዲመሩ የተመረጡት የዛሬ 242 ዓመት በዛሬዋ እለት ነበር፡፡

አሜሪካ የራሷ ነፃ ሀገር መሆን አለባት ለብሪታንያ ቅኝ ገዢዎች መገበሩ ይብቃን ብለው የተነሱት ኃይሎች ጆርጅ ዋሸንግተንን የጦሩ የበላይ አርገው ሲያስቀምጡ መልካምም ትክክለኛም ውሳኔ ወሰኑ፡፡

በጦር ሜዳ ሽንፈትን ጭምር የሚያውቁት ዋሸንግተን ለሕሊናቸው ግን ሽንፈትን አይነግሩትም፡፡

የጦር መለኛው፣ ቆፍጣናውና ልበ ሙሉው ዋሸንግተን ከጦር-ዘዴ አዋቂነታቸው በተጨማሪ የነፃነት አላሚውን የአሜሪካ ሠራዊት ልዩ ልዩ ክፍሎች በማስተባበር፣ በማቀናጀት በኩል ከማንም በላይ ተሳካላቸው፡፡

ጆርጅ ዋሸንግተን የመሩትን የነፃነት ጦርነት በድል ደመደሙት፡፡

 

ብሪታንያም ለአሜሪካ ነፃ አገርነት እውቅና ለመስጠት ተገደደች፡፡

አሜሪካውያን በኩራት የሚናገሩለትና ከጊዜ ወደ ጊዜ አስፈላጊው ማሻሻያ እየተደረገለት የመጣው ሕገ መንግስታቸው በትልቁ የጆርጅ ዋሽንግተን አሻራ ያረፈበት ሆኖ ይገኛል፡፡

አሜሪካውያን ፕሬዝዳንት ዶናልድ ትራምፕን 45ኛው ፕሬዝዳንታቸው ያደረጉት ከጆርጅ ዋሽንግተን አንድ ብለው በመጀመር ነው፡፡

የአሜሪካ ፕሬዝዳንቶች ከአገልግሎት ዘመናቸው በኋላ ስልጣናቸውን በሰላም ለተተኪያቸው አስረክበው ወደ ራሳቸው ሕይወት ወይም ወደ ጡረታ የመመለስ ባሕላቸው ነባር ነው፡፡

ለዚህም ፈር ቀዳጁ ጆርጅ ዋሸንግተን ናቸው፡፡

አሜሪካ አሁን የደረሰችበት ታላቅነቷ፣ ስልጣኔዋ፣ መደርጀቷና ገናናነትዋ ሲታሰብ ለዚህ ሁሉ የመሠረት ድንጋዩ የተቀመጠው እንደነ ጆርጅ ዋሸንግተን ባሉ መስራች አባቶች መሆኑ ይነሳል፡፡

የኔነህ ከበደ

በማኅበረ ሰብ ገጾች ያጋሩ

Submit to FacebookSubmit to Google PlusSubmit to TwitterSubmit to LinkedIn
Sheger 102.1 AudioNow Numbers