• United Bank S.C.

    ሕብረት ባንክ አ.ማ.

  • Slider Two

    የምስል ተጓዳኝ መልዕክት

  • Sldier Three

    የምስል ተጓዳኝ መልዕክት

ሸገር ወሬዎች እና ልዩ ወሬዎች

ጥር 15፣ 2012/ የአዲስ አበባ ከተማ አስተዳደር፣ የተማሪዎች ምገባ ኤጀንሲን ለማቋቋም የወጣውን አዋጅ ዛሬ አፀደቀ

የአዲስ አበባ ከተማ ምክር ቤት ባካሄደው 7ኛ ዓመት የስራ ዘመን 2ኛ መደበኛ ጉባኤው ይህንን ጨምሮ የተለያዩ አዋጆችን ያፀድቃል ተብሎ ይጠበቃል፡፡አስተዳደሩ በዓመቱ አከናወንኳቸው ካላቸው ስራዎች ውስጥ የተማሪዎች የምገባ ሥርዓትን ማስጀመር አንዱ ነበር የተባለ ሲሆን ፕሮግራሙ በኤጀንሲ ደረጃ እንዲቋቋም የቀረበለትን አዋጅ ዛሬ ከተወያየ በኋላ አፅድቆታል፡፡ በተጨማሪም ምክር ቤቱ ዛሬ ካነሳቸው አጀንዳዎች መካከል በወጣቶችና ሴቶች የስራ እድል ፈጠራ የኑሮ ውድነትን ለማመጣጠን መፍትሄ የተባሉ ስራዎች መከወኑንም ተናግሯል፡፡

የከተማ አስተዳደሩ ለወጣቶች የስራ እድል ፈጠራ የመደበው ተዘዋዋሪ ፈንድ በአግባቡ ስራ ላይ ስለመዋሉ ቁጥጥር እንዲያደርግ ምክር ቤቱ አሳስቧል፡፡ ህገወጥ የመሬት ወረራ፣ ህገወጥ ንግድና ስርቆት የከተማዋን ፀጥታና ሰላም በተደጋጋሚ እየተፈታተኑ ያሉ ጉዳዮች መሆናቸውንም የምክር ቤቱ አፈ ጉባኤ ወ/ሮ አበበች ነጋሽ ተናግረዋል፡፡ከሴቶች እና ሕፃናት ጉዳይ ቢሮ ጋር በመሆን የተጀመረው የጎዳና ተዳዳሪዎችን የማቋቋም ስራ ተጨባጭ ውጤት እንዲያመጣ መሰራት አለበት ያለው ምክር ቤቱ ከጎዳና ተነስተው መልሰው ወደነበሩበት የሚሄዱ በመኖራቸው ስራው አሁንም ትኩረት ሊሰጠው ይገባል ተብሏል፡፡

የአዲስ አበባ ከተማ ምክር ቤት በዛሬው መደበኛ ጉባኤው ካፀደቀው የተማሪዎች የምግባ ኤጀንሲ ማቋቋሚያ አዋጅ በተጨማሪ የአዲስ አበባ የዋና ኦዲተር መስሪያ ቤትን ለማቋቋም የወጣውን የማሻሻያ ረቂቅ አዋጅን ጨምሮ ሌሎችንም አዋጆች መርምሮ እንደሚያፀድቅ ይጠበቃል፡፡

ምህረት ሥዩም
አስተያየት ይፃፉ (0 አስተያየት)

ጥር 15፣ 2012/ በስዊዘርላንዷ ከተማ ዳቮስ እየተካሄደ ባለው የዓለም ኢኮኖሚ ፎረም ላይ "ኢትዮጵያ - በለውጥ ጎዳና" በሚል ርዕስ የፖናል ውይይት ተካሄደ

በውይይቱ ላይ የተገኙት ምክትል ጠቅላይ ሚኒስትር አቶ ደመቀ መኮንን ኢትዮጵያን ተመራጭ የኢንቨስትመንት መዳረሻ እና አዋጭ የንግድ ማዕከል ለማድረግ የሚያስችሉ የሪፎርም ስራዎች እየተከናወኑ እንደሆነ ተናግረዋል፡፡ምክትል ጠቅላይ ሚኒስትሩ ኢትዮጵያ ዕምቅ ተፈጥሯዊ ፀጋዎች እና ሰፊ የኢንቨስትመንት ዕድሎች ያሉባት በመሆኗ ዓለም አቀፍ ኩባንያዎች ኢትዮጵያ ውስጥ ኢንቨስት እንዲያደርጉ ጥሪ አድርገዋል፡፡

ሀገሪቱን ተመራጭ የኢንቨስትመንት እና የንግድ መዳረሻ ለማድረግ መንግሥት የጀመራቸውን የሪፎርም ስራዎች እንደሚያጠናክርም ተናግረዋል፡፡የኢትዮጵያን የኢንቨስትመንት ድባብ ለዓለም አቀፍ ኩባንያዎች የበለጠ ጋባዥ ለማድረግ በርካታ የህግ ማሻሻያዎች እና የማትጊያ ማዕቀፎች ተግባራዊ እያደረገች መሆኑን ጠቅሰዋል።የግሉን ሴክተር ተሳትፎ ለማጎልበት የሚስተዋሉ ችግሮችን በፍጥነት ለመፍታት መንግሥት በልዩ ትኩረት እንደሚሰራ ነው ምክትል ጠቅላይ ሚኒስትሩ የተናገሩት፡፡

የመድረኩ ተሳታፊዎች በበኩላቸው፤ በአሁኑ ጊዜ በዓለም አቀፍ ሚዲያዎች ስለኢትዮጵያ የሚደመጡት አዎንታዊ መረጃዎች ለቀጥተኛ የኢንቨስትመንት ፍሰት አጋዥ ናቸው ማለታቸውን ከምክትል ጠቅላይ ሚኒስትር ጽህፈት ቤት የተገኘው መረጃ ያስረዳል፡፡በመድረኩ የተለያዩ የኩባንያ መሪዎች፣ የኢንቨስትመንት ዘርፉ ፈተናዎች ናቸው ያሏቸውን ጥያቄዎች አንስተው በተለያዩ የስራ ሃላፊዎች ምላሽ ተሰጥቶባቸዋል መባሉን ሰምተናል፡፡

ኃይለገብርዔል ቢኒያም
አስተያየት ይፃፉ (0 አስተያየት)

ጥር 15፣ 2012/ በቻይና በፍጥነት እየተዛመተ የሚገኘውን የኮሮና ቫይረስ ተከትሎ ሸገር ኤፍ ኤም 102.1 ወደ ቻይና በሳምንት ከ40 ያላነሱ በረራዎችን የሚያደርገውን የኢትዮጵያ አየር መንገድ ቅድመ ጥንቃቄ ጠይቋል

የተለያዩ ሀገራትም የዓለም የጤና ድርጅትን ውሳኔ ሳይጠብቁ የራሳቸውን የቅድመ ጥንቃቄ እርምጃ እየወሰዱ መሆኑንም ተከትሎ የአየር መንገዱን ማብራሪያ ለማግኘት ሞክረናል፡፡የአየር መንገዱ የኮሚዩኒኬሽን ክፍል በዚህ ጉዳይ ከሚመለከታቸው ጋር በመሆን እየሰራሁ ነው ብሎናል፡፡ ጉዳዩን በተመለከተ መግለጫ እንደሚሰጥም ተናግሯል፡፡

እንደ ከዚህ ቀደም ሁሉ እንዲህ ዓይነት ተላላፊ በሽታዎችን በተመለከተ የአየር መንገዱ የበረራ ሰራተኞች እና ሌሎችም በቦታው የተመደቡ በሙሉ ቅድመ ጥንቃቄ እንደሚያደርጉ ይታወቃል፡፡የኢትዮጵያ አየር መንገድ በሳምንት 40 ጊዜ ወደ ቻይና መብረሩን ተከትሎ ያለውን ስጋት እና ቅድመ ጥንቃቄ በተመለከተ የኢትዮጵያ የህብረተሰብ ጤና ኢንስቲትዩት ዛሬ ከሰዓት በኋላ መግለጫ እንደሚሰጥ ሰምተናል፡፡በኮሮና ቫይረስ የተናጠችው ቻይና እስካሁን በዚሁ ቫይረስ ሰበብ የሟቾች ቁጥር 26 መድረሱን የውጭ መገናኛ ብዙሃን ፅፈዋል፡፡

ተህቦ ንጉሤ
አስተያየት ይፃፉ (0 አስተያየት)

ጥር 15፣ 2012/ ትናንትና የዲላ ከተማ በጢስ ታፍና በመኪና ጡሩንባ ስትረበሽ ማምሸቷ ተሰማ

ከተማዋ በጢስ የታፈነችው፣ በመኪና ጡሩንባ ስትረበሽ ያመሸችው የመጣባትን የበረሃ አንበጣ ለማባረር ነው ተብሏል፡፡የዲላ ከተማ ከንቲባ አቶ ትግሉ በቀለ ከተለያዩ የዲላ አጎራባች አካባቢዎች ወደ ከተማዋ የተዛመተው የአንበጣ መንጋ እስካሁን በህብረተሰቡ ጥረት ጉዳት አላደረሱም ብለዋል፡፡አንበጣው በአሁኑ ጊዜ ማረፊያ አጥቶ እንደጉም አየር ላይ ይታያል ብለዋል፡፡ከዚሁ የአንበጣ ወሬ ጋር በተያያዘ የተባበሩት መንግስታት ድርጅት የድንገተኛ አደጋዎች መከላከል ፈንድ የአንበጣ መንጋው ለተዛመተባቸው የምስራቅ አፍሪካ አገራት 10 ሚሊዮን ዶላር መስጠቱ ተሰምቷል፡፡

10 ሚሊዮን ዶላሩ በኢትዮጵያ፣ በኬንያና በሶማሊያ የአንበጣ መንጋ መከላከያ ላይ እንደሚውል ድርጅቱ ባወጣው መግለጫ ተናግሯል፡፡በኢትዮጵያና በሶማሊያ የተከሰተው የአንበጣ መንጋ በ25 ዓመታት ውስጥ ታይቶ የማይታወቅ ነው ያለው ድርጅቱ በኬኒያ ያጋጠመው ግን በ70 ዓመት ታሪክ አገሪቱ አይታ የማታውቀው ነው ብሏል፡፡

የበረሃ አንበጣ የራሱን ክብደት የሚመዝን ወይንም ሁለት ግራም በቀን የሚመገብ ሲሆን ለዚህም ሲል 150 ኪሎ ሜትር በየቀኑ ይጓዛል፡፡አነስተኛ ቁጥር ያለው አንድ የበረሃ አንበጣ መንጋ በቀን 35 ሺህ ሰው ሊመገበው የሚችል ያህል ምግብ እንደሚመገብ የመንግስታቱ ድርጅት መረጃ ያሳያል፡፡

ንጋቱ ሙሉ
አስተያየት ይፃፉ (0 አስተያየት)

ጥር 15፣ 2012/ ቆይታ ከጎዳና እናቶች ጋር

ሕይወት በየፈርጁ ዛሬም በአዲስ አበባ ከተማ ጉዞውን ቀጥሏል፣ በዚህ ጉዞ ውስጥ ከሚገኙ የጎዳና እናቶች ጋር ቴዎድሮስ ብርሃኑ ተከታዩን ቆይታ አድርጓል፡፡

አስተያየት ይፃፉ (0 አስተያየት)

ጥር 15፣ 2012/ በአዲስ አበባ ቦሌ ክፍለ ከተማ ባለፉት 6 ወራት ውስጥ ብቻ ከ600 በላይ ቦታዎች መወረራቸውን የክፍለ ከተማው የስራ ሀላፊዎች ተናገሩ

በአዲስ አበባ ቦሌ ክፍለ ከተማ ባለፉት 6 ወራት ውስጥ ብቻ ከ600 በላይ ቦታዎች መወረራቸውን የክፍለ ከተማው የስራ ሀላፊዎች ለሸገር ነግረዋል፡፡በ2 ሳምንት ጊዜ ውስጥም 420ውን የተወረረውን ይዞታ አፍርሰው ወደ መሬት ባንክ መመለሳቸውን ሰምተናል፡፡ከቦታዎቹ ባለፈ በይዞታ ማረጋገጫ ሰነድ ወይም ካርታ ላይ ድጋሚ ሌላ ሰነድ መሰናዳቱንም የስራ ሀላፊዎቹ ተናግረዋል፡፡
ተህቦ ንጉሴ
አስተያየት ይፃፉ (0 አስተያየት)

ጥር 15፣ 2012/ በህገወጥ መንገድ አደን ተፈፅሞባቸው ውጤቶቻቸው የሚዘዋወሩ የዱር እንስሳትን ወንጀል ለመከላከል በአሻራ የታገዘ ምርመራ መደረጉ ተነገረ

በኢትዮጵያ በህገወጥ መንገድ አደን ተፈፅሞባቸው ውጤቶቻቸው የሚዘዋወሩ የዱር እንስሳትን ወንጀል ለመከላከል በአሻራ የታገዘ ምርመራ መደረጉ ተነገረ፡፡
ምህረት ስዩም
አስተያየት ይፃፉ (0 አስተያየት)

ጥር 14፣ 2012/ የወ/ሮ ፈትለወርቅ ከሚኒስትርነት መነሳትን ተከትሎ ፓርቲያቸው ሲቃወም ብልፅግና ፓርቲ የሹም ሽር ስራ ከብሔር ማግለል ጋር አይገናኝም ብሏል

የወ/ሮ ፈትለወርቅ ከሚኒስትርነት መነሳትን ተከትሎ ፓርቲያቸው ሲቃወም ብልፅግና ፓርቲ የሹም ሽር ስራ ከብሔር ማግለል ጋር አይገናኝም ብሏል፡፡
ንጋቱ ሙሉ
አስተያየት ይፃፉ (0 አስተያየት)

ጥር 14፣2012/ የኢትዮጵያ የሰብአዊ መብት ኮሚሽን መንግስት የዜጎችን ሰብአዊ መብቶች የመጠበቅ ሀላፊነቱን እንዲወጣ ጠየቀ

የአመፅ ግጭት በተፈጠረባቸው አንዳንድ አካባቢዎች ችግሩ እንዳይባባስና ሰላም እንዲሰፍን በተለይ የፌደራል የፀጥታ ሀይሎች በሕይወት መስዋዕትነት ጭምር ከፍተኛ አስተዋፅኦ ማድረጋቸውን ኮሚሽነሩ ዳንኤል በቀለ (ዶ/ር) አስታውሰዋል፡፡በአንፃሩ ግን በተለያዩ አካባቢዎች በፌደራልና በክልል የፀጥታ ሀይሎች ዜጎች ከህግ ውጪ ለሞት፣ ለእስርና ለእንግልት ተዳርገዋል ብለዋል፡፡

ኮሚሽነሩ ይህንን ያሉት የመስሪያ ቤታቸውን የ6 ወራት የስራ ክንውን ለሕዝብ እንደራሴዎች ምክር ቤት ሲያቀርቡ ነው፡፡ወቅታዊውን የሰብአዊ መብት አያያዝን በተመለከተ ሲያብራሩ በግጭቶችና በጥቃቶች ከሞቱና ከተፈናቀሉት መካከል መሳሪያ የታጣቁ ቡድኖች ሰዎችን በሀይል አግተዋል፣ ገድለዋል ሲሉ የሰብአዊ መብት ቀውስ መኖሩን ጠቁመዋል፡፡በዚህም ሕፃናት፣ ወጣት፣ ወንድና ሴት ተማሪዎች እንዲሁም የውጪ ዜጎች ሳይቀሩ ሰለባ መሆናቸውንም አትተዋል፡፡

ለሰብአዊ መብት ቀውሱ መሰረታዊው ምክንያት ፖለቲካዊ፣ ማህበራዊና ኢኮኖሚያዊ በመሆኑ መንግስት እንዲሁም የሕዝብ እንደራሴዎች ምክር ቤት ለፖለቲካዊ ችግሮች አገራዊ መፍትሄ ለመስጠት ትኩረት አድርገው እንዲሰሩ ኮሚሽነሩ ጠይቀዋል፡፡በሌላም በኩል የፖለቲካ ፓርቲዎችና መሪዎቻቸው የአመፅ ተግባሮችን በግልፅ ማውገዝና ደጋፊዎቻቸውን ወደ ሁከትና ብጥብጥ ከሚገፋፋ ተግባርና ንግግር ተቆጥበው በከፍተኛ የሀላፊነት ስሜት እንዲሰሩም አሳስበዋል፡፡

የኢትዮጵያ የሰብአዊ መብት ኮሚሽን ኮሚሽነር የመስሪያ ቤታቸውን የ6 ወራት ክንውን ሪፖርት ለምክር ቤቱ ሲያቀርቡ እንዳሉት የተጀመረው አዲስ የለውጥ ምዕራፍ እንዲመጣ በርካታ ኢትዮጵያውያን በብዙ መልኩ ሰፊ መሰዋዕትነት የከፈሉበት መሆኑን አስታውሰው የሁሉም ኢትዮጵያዊ ድልና እድል እንጂ የተወሰኑ ቡድኖች ብቻቸውን የፈጠሩትና ባለቤት የሚሆኑበት አይደለም ብለዋል፡፡በመሆኑም ሁሉም፣ እያንዳንዱ በግለሰብ ደረጃ ድሉንና እድሉን ሊጠብቅና ችግሮቹንም በመተባበርና በመተዛዘን ለመቅረፍ መብትና ሀላፊነት እንዳለበት መገንዘብ ያሻዋል ብለዋል፡፡

ሪፖርቱን ያዳመጡት የምክር ቤቱ አባላትም ከፍተኛ የሰብአዊ መብት ጥሰት ባለበት በአሁኑ ወቅት ኮሚሽኑ ሰርቻለሁ ብሎ ያቀረበው የአፈፃፀም ሪፖርት የተግበሰበሰና በጥቅሉ የቀረበ ነው ብለዋል፡፡በተለያዩ አካባቢዎች የታዩ የሰብአዊ መብት ጥሰቶች ተመርምረው ለችግሩ መነሻ የሆነን ከጀርባ ያለ እጅ ጭምር መጠቆም የሚችል የምርመራ ሪፖርት መቅረብ ነበረበት ሲሉም ተችተዋል፡፡

ትዕግስት ዘሪሁን
አስተያየት ይፃፉ (0 አስተያየት)

ጥር 14፣2012/ በቻይና ዉሃን አውራጃ የተቀሰቀሰው የኮሮና ቫይረስ አድማሱን እያሰፋ መሆኑ ተሰምቷል

የተለያዩ ሀገራት የየራሳቸውን የቅድመ ጥንቃቄ እርምጃ እየወሰዱ መሆኑንም ዓለም አቀፍ መገናኛ ብዙሃን እያወሩ ነው፡፡ሸገር የኢትዮጵያ አየር መንገድ ወደተለያዩ የቻይና ከተሞች በሳምንት ከ40 ያላነሱ በረራዎች እንደሚያደረግ እና ሰዎችን ከቻይና ወደ ኢትዮጵያ እንደሚያመላልስ ታሳቢ በማድረግ የጤና ሚኒስቴር ምን እየሰራ እንደሆነ ጠይቋል፡፡

ለጊዜው በዚህ ጉዳይ ላይ ምንም እየተሰራ አለመሆኑም ለማወቅ ችሏል፡፡ የቻይና መንግስት የቫይረሱ መነሻ ወደሆነው ዉሃን ግዛት መግባትም ሆነው መውጣትን አግዷል፡፡ እስከ አሁን በቫይረሱ ምክንያት ቻይና ውስጥ 17 ሰዎች ሲሞቱ ከ500 በላይ ቫይረሱ እንደተገኘባቸው ተሰምቷል፡፡ ቫይረሱ በመንገደኞች አማካኝነት ወደ ተለያዩ አገራት እየተሰራጨ መሆኑም ተሰምቷል፡፡

ዘከርያ መሐመድ
አስተያየት ይፃፉ (0 አስተያየት)

ጥር 14፣ 2012/ የወንዝ ተፋሰሶችን በማልማት አዲስ አበባን የማስዋብ ፕሮጀክት መጀመሩ ይታወቃል

የወንዝ ተፋሰሶችን በማልማት አዲስ አበባን የማስዋብ ፕሮጀክት መጀመሩ ይታወቃል፡፡ሸገር ያነጋገራቸው የመስኩ ባለሙያ ፕሮጀክቱ ውጤታማ ይሆን ዘንድ አሁን ተመርጦ ከእንጦጦ እስከ አቃቂ ወንዝ ከሚዘልቀው አንድ ዘለላ ተፋሰስ ባለፈ ሌሎች ወንዞችና ምንጮችም መልማት ይኖርባችዋል ይላሉ፡፡

ትዕግስት ዘሪሁን

አስተያየት ይፃፉ (0 አስተያየት)
Sheger 102.1 AudioNow Numbers