• Slider One

    የምስል ተጓዳኝ መልዕክት

  • Slider Two

    የምስል ተጓዳኝ መልዕክት

  • Sldier Three

    የምስል ተጓዳኝ መልዕክት

ሸገር ወሬዎች እና ልዩ ወሬዎች

አቶ አባዱላ ገመዳ ከአፈ ጉባዔነት ኃላፊነታቸው ለመልቀቅ በገዛ ፈቃዳቸው ጥያቄ ማቅረባቸውን ተከትሎ...

አቶ አባዱላ ገመዳ ከአፈ ጉባዔነት ኃላፊነታቸው ለመልቀቅ በገዛ ፈቃዳቸው ጥያቄ ማቅረባቸውን ተከትሎ ስለምን ኃላፊነታቸውን ለመልቀቅ ወሰኑ የሚለው የህዝብ መነጋገሪያ ሆኗል፡፡አፈ-ጉባዔ አባዱላ ገመዳ ለኢትዮጵያ ብሮድካስት ኮርፖሬሽን ሲናገሩ ከኃላፊነታቸው የመልቀቃቸውን ምክንያት በኃላፊነት ለመቀጠል የማያስችሉ ምክንያቶች በመኖራቸው ብለው በደምሳሳው ከመናገር ያለፈ ማከያ አልጨመሩበትም፡፡

አፈ-ጉባዔ አባዱላ ገመዳ ከኃላፊነታቸው ለመልቀቅ ጥያቄ አቀረቡ የሚለው ወሬ ባለፈው ቅዳሜ በሰፊው ከተነዛ በኋላ የተለያዩ የመንግሥት ኃላፊዎችን ለማግኘት ጋዜጠኞች ቢሞክሩም ሳይሳካላቸው ቀርቷል፡፡ትናንት ራሳቸው አቶ አባዱላ የኢትዮጵያ ብሮድካስት ኮርፖሬሽንን ጠርተው የሥራ መልቀቂያ ማቅረባቸው እርግጥ መሆኑን ካስተማመኑ በኋላ የመንግሥት ኮሙኒኬሽን ጉዳዮች ፅህፈት ቤትም አዎን እርግጥ ነው ብሏል፡፡

የኢትዮጵያንና የኦሮምያን ባንዲራዎች ግራና ቀኝ አድርገው እልል ባለ ልብስ የታዩት አቶ አባዱላ ጥያቄያቸውን ለድርጅታቸውና ለፓርላማው ማቅረባቸውን ተናግረዋል፡፡ጥያቄያቸው በፍጥነት መልስ ያገኛል ብለው የሚያምኑት አቶ አባዱላ ከኃላፊነታቸው ቢነሱም በፓርላማ አባልነታቸው ግን በእርሳቸው አነጋገር የመረጣቸውን ህዝብና ያስመረጣቸውን የፖለቲካ ድርጅታቸውን ስለሚያከብሩ ይቀጥላሉ፡፡

አቶ አባዱላ ገመዳ ለምን የአፈ-ጉባዔነት ኃላፊነታቸውን እንደለቀቁ ለጊዜው ዘርዝረው ባይናገሩም ጥያቄያቸው ተቀባይነት ካገኘ በኋላ ግን ለህዝብ እናገራለሁ ብለዋል፡፡ሣምንታዊው የእንግሊዘኛ ጋዜጣ ፎርቹን አቶ አባዱላ ገመዳ ካለፈው ማክሰኞ ጀምሮ ለረጅም ዓመታት ከኖሩበት ኦሎምፒያ አካባቢ ከሚገኘው የመንግሥት ቤቶች ኤጀንሲ ንብረት ከሆነው ቤት መልቀቃቸውን ከቅርብ ምንጮቼ ሰምቻለሁ ብሎ አትሟል፡፡

አፈ-ጉባዔ አባዱላ አሁን አመቱን ያልጨረሱትን የምርጫ ዘመን ጨምሮ ለሁለት ጊዜ በአፈ-ጉባዔነት ሰርተዋል፡፡ኢህአዴግ ሥልጣን ከያዘ ጀምሮም በከፍተኛ የጦር መኮንንነት፣ በመከላከያ ሚኒስትርነትና በኦሮሚያ ክልል ፕሬዝዳንትነት አገልግለዋል፡፡አቶ አባዱላ የሥራ መልቀቂያቸው ተቀባይነት ካገኘ ህዝቡን ይጠቅማሉ ባሏቸው ተግባሮችም ላይ እሣተፋለሁ ብለዋል፡፡ጥያቄያቸውን ፓርላማውና ድርጅታቸው ከተቀበለው በገዛ ፈቃዳቸው ከኃላፊነት ለመልቀቅ የመጀመሪያው አፈ-ጉባዔ ይሆናሉ፡፡

እሸቴ አሰፋ

በማኅበረ ሰብ ገጾች ያጋሩ

Submit to FacebookSubmit to Google PlusSubmit to TwitterSubmit to LinkedIn
Leza Vote Banner
Sheger 102.1 AudioNow Numbers