• Slider One

    የምስል ተጓዳኝ መልዕክት

  • Slider Two

    የምስል ተጓዳኝ መልዕክት

  • Sldier Three

    የምስል ተጓዳኝ መልዕክት

ሸገር ወሬዎች እና ልዩ ወሬዎች

የመንግስት የልማት ድርጅቶች የተለያዩ ፕሮጀክቶችና ግንባታዎች በተከታታይ ስለሚከወኑ ከፍተኛ የብረት ቁርጥራጭ ክምችት እንዳላቸው ይገመታል

የመንግስት የልማት ድርጅቶች የተለያዩ ፕሮጀክቶችና ግንባታዎች በተከታታይ ስለሚከወኑ ከፍተኛ የብረት ቁርጥራጭ ክምችት እንዳላቸው ይገመታል፡፡በየቦታው ያላግባብ የወደቁ ቁርጥራጭ ብረቶች በሽያጭ ተወግደው መልሰው ለመንግስት ሀብት እንዲሆኑ በማድረግ ኢትዮ ቴሌኮምና መብራት ሀይል የተሻሉ እንደሆኑ የመንግስት ግዥና ንብረት ማስወገድ አገልግሎት ለሸገር ተናግሯል፡፡

በግማሽ የበጀት አመቱ ብቻ የማይገለገሉበትን ቁርጥራጭ ብረት ለብረት አቅላጭ ፋብሪካዎች በማስረከብ ከኢትዮ ቴሌኮም 9.9 ሚሊየን ከመብራት ሀይል ደግሞ 20.4 ሚሊዮን ብር ገቢ መገኘቱን ሰምተናል፡፡በአገልግሎቱ ምክትል ዋና ዳይሬክተር የሆኑት አቶ ሰለሞን አይንማር እንደነገሩን በመብራት ሀይል በኩል የማይጠቀሙባቸውን ብረቶችን ለማስወገድ ፕሮጀክቱ እስከሚያልቅ የመጠበቅ ችግር አለ በሌላ በኩልም የኢትዮ ቴሌኮም ንብረት አያያዝ የተሻለ መልክ እየያዘ ነው ብለዋል፡፡

በተያያዘ ስኳር ፍብሪካዎች በሽያጭ ተወግዶ ለመንግስት መልሶ ሀብት መሆን ያለበት ከ1 ሺህ 300 ቶን በላይ የብረት ክምችት እንዳላቸው በጥናት ቢረጋገጥም ለማስወገድ ፈቃደኛ ያልሆኑ ፋብሪካዎች መኖራቸውን ሰምተናል፡፡አቶ ሰለሞን እንደነገሩን ባለፈው አመት በአምስት የስኳር ፋብካዎች ጥናት ተደርጓል፡፡

 

በወንጂ እስከ 250 ቶን፣ በመተሃራ 300 ቶን፣ በከሰም 700 ቶን፣ በተንዳሆ 200 ቶንና በፊንጫ የስኳር ፋብሪካ 150 ቶን የቁርጥራጭ ብረት ክምችት እንዳላቸው በጥናቱ ተረጋግጧል ብለዋል፡፡

ብረቶቹ በአብዛኛው በአግባቡ እንዳልተያዙና በየእርሻው እንደወደቁ ለጥናት በቦታው የተገኘ ባለሙያዎች በቪዲዮ የተደገፈ ማስረጃ ይዘው መመለሳቸውንም ነግረውናል፡፡
በስኳር ፋብሪካዎች በሽያጭ መወገድ ያለበት የብረት ክምችት ስለመኖሩ ከታወቀ በኋላ ለብረት አቅላጭ ፋብሪካዎች እንዲያስረክቡ ተጠይቀው ነበር፡፡

በጥያቄው መሰረት አገልግሎት የማይሰጡ የቁርጥራጭ ብረት ክምችት ከብክነት ለማዳን በሽያጭ የማስወገድ እርምጃ የጀመሩት 3ቱ ብቻ ናቸው ብለዋል፡፡ አቶ ሰለሞን ወንጂ ተንዳሆና መተሃራ ስኳር ፋብሪካዎች በመቶ ቶኖች የሚቆጠር ብረት በሽያጭ አስወግደዋል ተብሏል፡፡

ፊንጫና ከሰም የስኳር ፋብሪካዎች ግን በተደጋጋሚ ጥያቄው ቢቀርብላቸው ክምችቱን እስካሁን አላስወገዱም ብረቱን ለስራ እንፈልገዋለን የሚል ምክንያትም አላቸው ተብሏል፡፡
አገልግሎቱ በበኩሉ ንብረቶችን ከብክነት ለመታደግ በሽያጭ እንዲወገዱ የምንጠይቃቸው የብረት አይነት አገልግሎት የሚሰጥ አይነት አይደለም ይላል፡፡

ለስራ እንፈልጋቸዋለን የሚሏቸው ብረቶች በየእርሻ ቦታው ወድቀዋል በአግባቡም አልተያዙም ብሏል፡፡

ለሁለቱ ፋብሪካዎች ያለውን ችግር ለመፍታትም ለስኳር ኮርፖሬሽንና ለመንግስት የልማት ድርጅቶች ሚንስትር ደብዳቤ መፃፉን አገልግሎቱ ለሸገር ተናግሯል፡፡

ባለፈው 6 ወር ብቻ ከተለያዩ መስሪያ ቤቶች ቁርጥራጭ ብረቶችን በሽያጭ በማስወገድ ከ90 ሚሊየን ብር በላይ ለመንግስት ገቢ መደረጉን ሰምተናል፡፡

ትዕግስት ዘሪሁን

በማኅበረ ሰብ ገጾች ያጋሩ

Submit to FacebookSubmit to Google PlusSubmit to TwitterSubmit to LinkedIn
Sheger 102.1 AudioNow Numbers