• Slider One

    የምስል ተጓዳኝ መልዕክት

  • Slider Two

    የምስል ተጓዳኝ መልዕክት

  • Sldier Three

    የምስል ተጓዳኝ መልዕክት

ሸገር ወሬዎች እና ልዩ ወሬዎች

ጠቅላይ ሚኒስትር አብይ አህመድ ዛሬ ማምሻውን በአማራ ክልል ከሚገኙ የሀገር ሽማግሌዎች ጋር ውይይት እያደረጉ መሆናቸው ተሰማ

በአማራ ክልል ጉብኝት ለማድረግ ከሰዓት በኋላ ጎንደር የገቡት ጠቅላይ ሚኒስትሩ ማምሻውን በክልሉ በሰዎች መሀል ግጭት በፈጠሩ ጉዳዮች ላይና የሀገር ሽማግሌዎች ችግሩን ለመፍታት እያደረጉ ባሉት ጥረት ላይ ውይይት እያደረጉ መሆኑን ሰምተናል፡፡በውይይቱም ምክትል ጠቅላይ ሚኒስትር ደመቀ መኮንን እና የክልሉ ርዕሰ መስተዳደር አቶ ገዱ አንዳርጋቸው መገኘታቸውን ሰምተናል፡፡በአማራ ክልል በሰዎች መሃል የሚፈጠሩ ችግሮችን ለመፍታት የሃገር ሽማግሌዎች ከዚህ በፊትም ተገናኝተው ውይይት ማድረጋቸው ይታወሳል፡፡

ጠቅላይ ሚኒስትር አብይ ጎንደር የደረሱት የኤርትራው ፕሬዝዳንት ኢሳያስ አፈወርቂ ነገ ጎንደር ከመምጣታቸው አንድ ቀን ቀደም ብለው መሆኑ ነው፡፡ፕሬዝዳንት ኢሳያስ፣ ለአማራ ክልል ጉብኝታቸው ነገ ጎንደር ሲደርሱ ጠቅላይ ሚኒስትሩና የአማራ ክልል አስተዳደር አመራሮች እንደሚቀበሏቸው ተነግሯል፡፡ከጠቅላይ ሚኒስትሩ ፅህፈት ቤት የወጣው ማስረጃ እንደሚያስረዳው፣ ጠቅላይ ሚኒስትር አብይ ከጎንደርም በተጨማሪ ሌሎች የአማራ ክልል አካባቢዎችን ይጎበኛሉ፡፡የተጀመሩ ፕሮጀክቶችንም እንደሚጎበኙና የሚመለከታቸውንም እንደሚያነጋግሩ ተጠቁሟል፡፡
በተያያዘ ወሬ፣ በያዝነው ሳምንት በምዕራብ ጎንደር ጨቆ አካባቢ በተቀሰቀሰ ግጭት ነዋሪዎች መፈናቀላቸው ንብረት መውደሙና የአራት ሰዎች ሕይወት ማለፉ ተነግሯል፡፡ድርጊቱን አስምልክቶ የትግራይ ክልል መስተዳደር በሕዝብ ግንኙነቷ በኩል የአማራ ክልል አመራር ቁርጠኝነት ማነስ የችግሩ ሰበብ መሆኑን ጠቅሶ የፌዴራል መንግስት ጣልቃ እንዲገባ መግለፁ ይታወሳል፡፡የአማራ ክልልም ድርጊቱን አምኖ በሕዝቦች መሐል የነበረውን አብሮ የመኖር እሴት ለመናድ የሚፈልጉ ትርፋቸው ኪሳራ ነው ብሏል፡፡

ኢትዮጵያ የባህር ሀይል ለማቋቋም እንቅስቃሴ ጀምራለች፡፡ባህር ሃይሉን እንደገና ለማዋቀር አደረጃጀቱና አቋሙን ለመወሰን እየተሰራ መሆኑን የተናገሩት የጦር ሀይሎች ምክትል ኤታማዦር ሹም ጀኔራል ብርሃኑ ጁላ ናቸው፡፡ጄኔራል ብርሃኑ የባህር ሀይሉ እንደገና የመዋቀሩን አስፈላጊነት አብራርተውል፡፡የኢትዮጵያ ጥቅም የሚመላለስባቸው የቀይ ባህርና የህንድ ውቅያኖስ ከ60 ኪሎ ሜትር ቅርበት ላይ የሚገኙ በመሆናቸው፣ በባህሩ ላይ የሚኖራትን ጥቅም ለማስከበርም፣ የባህር ሀይል መቋቋም አስፈላጊ መሆኑ እንደታመነበት ተናግረዋል፡፡

የ100 ሚሊዮን ሕዝብ ሃገር የሆነችው ኢትዮጵያ በአካባቢው ተፅዕኖ የማሳደር አቅሟን ለማጎልበትና፣ በቀጠናው ቀውስ ቢፈጠር በባህር ሃይል እጦት ተጎጂ ላለመሆን ብርቱ፣ ጠንካራ፣ ዘመናዊ ቴክኖሎጂና መሳሪያ የታጠቀ የኢትዮጵያ ባህር ሃይል እንደሚገነባ ጄኔራል ብርሃኑ ተናግረዋል፡፡የተለያዩ ሃገሮች በኤርትራ፣ በሶማሊያ፣ በፑንትላንድ የጦር ሰፈር ይዘው ተፅዕኖ እየፈጠሩ መሆኑን የጠቀሱት ጄኔራል ብርሃኑ “ኢትዮጵያ የ100 ሚሊዮን ሕዝብ ሃገር ነች በ60 ኪሎ ሜትር ርቀት ባህር አስቀምጠን የብስ ላይ ብቻ ተገድበን የምንቀመጥበት ምንም ምክንያት የለም” ብለዋል፡፡

የባህር ሃይል የጦር ሰፈሩንም በባህር ዳርቻዎቹ ከሚገኙ ሃገሮች ማግኘት እንደሚቻል ምክትል ኤታማዦር ሹሙ ተናግረዋል፡፡የቀድሞው የባህር ሃይል መፈራረሱ እንደ ሃገር አሳዛኝና የሚያፀፅት መሆኑን ጠቅሰዋል፡፡ጄኔራል ብርሃኑ እጅግ ብርቱ፣ ጠንካራና ዘመናዊ ቴክኖሎጂ መሳሪያ የታጠቀ የሚሉትን የባህር ሀይል ለማደራጀት በሚደረገው እንቅስቃሴ አቅም ያላቸውን የቀድሞ የባህር ሃይል አባላት እንደሚሳተፉ ለአዲስ ዘመን በሰጡት ቃለ መጠይቅ አረጋግጠዋል፡፡
 

በማኅበረ ሰብ ገጾች ያጋሩ

Submit to FacebookSubmit to Google PlusSubmit to TwitterSubmit to LinkedIn
Sheger 102.1 AudioNow Numbers