• Slider One

    የምስል ተጓዳኝ መልዕክት

  • Slider Two

    የምስል ተጓዳኝ መልዕክት

  • Sldier Three

    የምስል ተጓዳኝ መልዕክት

ሸገር ወሬዎች እና ልዩ ወሬዎች

ከዛሬ 6 ወር በፊት ከ2 ቢሊዮን ብር በላይ የሚሆነውን ገንዘብ ለማን እንደሚከፍለውና ከማን አንደሚሰበስበው አላውቅም ያለው የአዲስ አበባ መንገዶች ዛሬም ምላሽ መስጠት አልቻለም

ከዛሬ 6 ወር በፊት ከ2 ቢሊዮን ብር በላይ የሚሆነውን ገንዘብ ለማን እንደሚከፍለውና ከማን አንደሚሰበስበው አላውቅም ያለው የአዲስ አበባ መንገዶች ዛሬም ምላሽ መስጠት አልቻለም፡፡እንዲህ ያሉት የአዲስ አበባ ከተማ አስተዳደር ዋና ኦዲተር የሆኑት ወ/ሮ ፅጌወይን ካሣ ናቸው፡፡

ዋና ኦዲተሯ የከተማዋን የ2009 የዓመቱ መዝጊያ የኦዲት ሪፖርት ሲያቀርቡ አግኝተን የመንገዶች ባለሥልጣን የኦዲት ውጤት ምላሽ ከምን ደረሰ? ብለን ጠይቀናቸው እስካሁንም ምንም ምላሽ አላገኘንም ብለዋል፡፡የአዲስ አበባ መንገዶች ባለሥልጣን ከዛሬ 6 ወር በፊት በተደረገ የኦዲት ግኝት ሪፖርት ከ1 ቢሊየን ብር በላይ ከማን እንደሚሰበስበው የማያውቀው ገንዘብ ተገኝቶበት ነበር፡፡ከዚህም በተጨማሪ ለማን እንደሚከፍለው የማያውቀውም ከ1 ቢሊየን ብር በላይ የተገኘበት ባለሥልጣኑ ከትድሃር ኮንስትራክሽን ኤንድ ኧርዝ ሙቪንግ ሊሚትድ ካንፓኒ ከምሥራቅ ምዕራብ የመንገድ ፕሮጀክት ማስመለስ የነበረበትን ከ110 ሚሊዮን ብር በላይ ማስመለስ አለመቻሉም ተነግሮ ነበር፡፡

በዚሁ ፕሮጀክት ላይም ከ8 ሚሊዮን ብር በላይ የሚያወጡ ተሽከርካሪዎችን ማስመለስ ቢኖርበትም እንዳላስመለሰ ይታወሳል፡፡ከዚህም ሌላ 18 ሚሊዮን ብር የሚያወጣ ንብረት ቁጥጥር እያደረኩበት ነው ቢልም ይህን ያህል ሚሊየኖች የወጣበት ንብረት እምጥ ይግባ ስምጥ ሳይታወቅ መቅረቱ መነገሩ ይታወሣል፡፡ሰሞኑን በወጣው አመታዊ የኦዲት ሪፖርት ላይ ግን ይህ ጉዳይ ከምን እንደደረሰ ያልተጠቀሰ ሲሆን ዋና ኦዲተሯ ግን ምላሽ አላገኘንበትም ሲሉ ለሸገር ተናግረዋል፡፡

በዚሁ የኦዲት ሪፖርት ላይ የመንገዶች ባለሥልጣን ከ28 ሚሊዮን ብር በላይ በወቅቱ ያልተወራረደ ተከፋይ ሂሣብ ተገኝቶበታል፡፡ከዚህም ሌላ ለማን እንደሚከፍለው የማይታወቅ ከ245 ሚሊዮን ብር በላይ በኦዲት እንደተገኘበትም ሰምተናል፡፡

ዮሐንስ የኋላወርቅ
አስተያየት ይፃፉ (0 አስተያየት)

በኢትዮጵያ በየአመቱ ከሚፈፀሙ የመድኃኒት ግዢዎች ጥቅም ላይ ከሚውሉት ባለፈ እየተበላሹ የሚወገዱም አሉ፤ ምክንያቱ ደግሞ ያስፈልጋል ተብሎ የሚተነበየውና የሚሆነው ሳይገናኝ እየቀረ ነው ተብሏል

በኢትዮጵያ በየአመቱ ከሚፈፀሙ የመድኃኒት ግዢዎች ጥቅም ላይ ከሚውሉት ባለፈ እየተበላሹ የሚወገዱም አሉ፤ ምክንያቱ ደግሞ ያስፈልጋል ተብሎ የሚተነበየውና የሚሆነው ሳይገናኝ እየቀረ ነው ተብሏል፡፡ከመድኃኒት ፈንድና አቅርቦት ኤጀንሲ የህዝብ ግንኙነትና ኮሙኒኬሽን ዳይሬክተሯ ወ/ሮ አድና በርሄ ለሸገር ሲናገሩ መድኃኒቶች የአገልግሎት ጊዜያቸው እያለፈ የሚወገዱት አዳዲስ በሽታ ሊከሰት ይችላል በሚል ግምት እየተገዙ በሽታው ሳይከሰት ሲቀር አንዱ ምክንያት ሲሆን ሌላው የጤና ተቋሞች ላጋጠመ በሽታ መከላከያ መድኃኒት ሲጠይቁ ከተፈለገው በላይ በመውሰዳቸው ነው ብለዋል፡፡

የመድኃኒት ፈንድና አቅርቦት ኤጀንሲ ከሐምሌ 1 ቀን ጀምሮ በቆጠራ ላይ ስለሆነ አስቸኳይ የጤና ጉዳይ ካላጋጠመ በቀር እስከ ሐምሌ 21 ቀን 2009 ዓ.ም ድረስ ምንም ዓይነት የመድኃኒትም ሆነ የህክምና ቁሣቁስ ስርጭት አያከናውንም ተብሏል፡፡

ወንድሙ ኃይሉ
አስተያየት ይፃፉ (0 አስተያየት)

ሐምሌ 10፣2009 የሸገር ወሬዎቻችን

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.

  • የኢትዮጵያ ቀይ መስቀል ማህበር ዓመታዊ በሆነው የበጎ ፍቃደኞች የገንዘብ ማሰባሰቢያ ፕሮግራሙ ከ2 ሚሊዮን ብር በላይ መሰብሰቡን ተናግሯል፡፡ (አስፋው ስለሺ)
  • የአዲስ አበባ ከተማ አስተዳደር ከ1988 ዓ.ም በፊት ለተያዙ ሰነድ አልባ ይዞታዎች መብት መፍጠሩን ተናገረ፡፡ (ምህረት ስዩም)
  • በልዩ የትምህርት ፍላጎት የሚካተቱ ዜጎችን ቁጥር ለማወቅ በመጭው አመት ጥናት እንደሚያደርግ የትምህርት ሚኒስትር ተናገረ፡፡ (ትዕግሥት ዘሪሁን)
  • ከዚህ ቀደም በቢሊዮን የሚቆጠር ገንዘብ ከማን እንደሚሰበስበውና ለማን እንደሚከፍለው አያውቅም የተባለው የአዲስ አበባ መንገዶች ባለሥልጣን ዛሬም ምላሽ መስጠት አልቻለም ተባለ፡፡ በመቶ ሚሊዮኖች የሚቆጠር ንብረትም እንዳላስመለሰ ተነግሯል፡፡ (ዮሐንስ የኋላወርቅ)
  • በየዓመቱ በግዢ ከሚገቡ መድኃኒቶች የሚበላሹ አሉ፡፡ ምክንያቱ ደግሞ የሚተነበየውና የሚሆነው በአለመገናኘቱ ነው፡፡ (ወንድሙ ኃይሉ)
  • ተቋራጮች፣ አማካሪዎችና አሰሪዎች በግንባታ ወቅት ወጥ መረጃ እንዲኖራቸው የሚረዳ ቴክኖሎጂ ወደ ሀገር ውስጥ እየገባ ነው ተባለ፡፡ (ንጋቱ ረጋሣ)
  • አዲስ አበባን በዘጠኝ ወራት 650 ሺ የውጭ ሀገር ዜጎች ሲጎበኝዋት 31 ነጥብ 5 ቢሊዮን ብር ገቢ ተገኝቷል ተባለ፡፡ (አስፋው ስለሺ)
  • በአዲስ አበባ መውጫ በሮች የፍጥነት መቀነሻ መነሳት የትራፊክ አደጋውን እያባባሰው ነው ተባለ፡፡ (ወንድሙ ኃይሉ)
አስተያየት ይፃፉ (0 አስተያየት)

በሳውዲ አረቢያ ከሚኖሩ ህገ-ወጥ ዜጎች መሀከል 120 ሺ ያህል ኢትዮጵያውያን ሀገር ቤት ለመመለስ የጉዞ ሰነድ ቢወስዱም ግማሾቹ እንኳ አልመጡም ተባለ

በሳውዲ አረቢያ ከሚኖሩ ህገ-ወጥ ዜጎች መሀከል 120 ሺ ያህል ኢትዮጵያውያን ሀገር ቤት ለመመለስ የጉዞ ሰነድ ቢወስዱም ግማሾቹ እንኳ አልመጡም ተባለ፡፡የውጭ ጉዳይ መሥሪያ ቤት ዛሬ ለሸገር እንደተናገረው የሳውዲ መንግሥት ከሀገሬ ውጡ የሚለውን ትዕዛዝ ካስተላለፈበት ጊዜ አንስቶ ሀገር ቤት ለመመለስ የተመዘገቡ ኢትዮጵያውያን እጅግ በጣም ትንሽ መሆናቸውን ነው፡፡

ከሳውዲ አረቢያ ወደ ሀገራቸው የሚመለሱ ኢትዮጵያውያንን በዘላቂነት ለማቋቋም እንዲቻል የተለያዩ ተቋማት በገቡት ቃል መሠረት የኢትዮጵያ ፐብሊክ ዲፕሎማሲ ቡድን አባላት 5 ሚሊዮን ብር መስጠታቸው ተነግሯል፡፡በሳውዲ አረቢያ የሚኖሩ ኢትዮጵያውያን በመዘናጋት ላይ ናቸው ያሉት የውጭ ጉዳይ መሥሪያ ቤት ቃል አቀባይ ጽ/ቤት ባልደረባ በአሁኑ ጊዜ የኢትዮጵያ አየር መንገድ ይዞ የሚመለሰው ሰው ቁጥር ትንሽ መሆኑን ይናገራሉ፡፡

እስካሁን ለመጡት 55 ሺ ገደማ ሰዎች ምን ተደርጓል ስንል የጠየቅናቸው የጽ/ቤቱ ባልደረባ ለተመላሾቹ ጊዚያዊ መጠለያነት የኢትዮጵያ ስፖርት አካዳሚ መዘጋጀቱንና ወደየ ክልሎቻቸው ለሚመለሱ ሰዎች ትራንስፖርት ተዘጋጅቶ አገልግሎት እየሰጠ ነው ብለዋል፡፡ የሳውዲ አረቢያ መንግሥት ቀደም ሲል ከሰጠው የ90 ቀናት በተጨማሪ 1 ወር ጊዜ መስጠቱ የሚታወስ ሲሆን በሳውዲ አረቢያ የሚኖሩ ህገ-ወጥ ኢትዮጵያውያን ቁጥር ከ450 ሺ እንደሚበልጥም ይነገራል፡፡

የኔነህ ሲሳይ
አስተያየት ይፃፉ (0 አስተያየት)

በቀጣዮቹ ቀናት በሀገሪቱ አንዳንድ ክፍሎች ከባድ ዝናብ ሊኖር ስለሚችል ጥንቃቄ አድርጉ ሲል የብሔራዊ ሚትዮሮሎጂ ኤጀንሲ ተናገረ

በቀጣዮቹ ቀናት በሀገሪቱ አንዳንድ ክፍሎች ከባድ ዝናብ ሊኖር ስለሚችል ጥንቃቄ አድርጉ ሲል የብሔራዊ ሚትዮሮሎጂ ኤጀንሲ ተናገረ፡፡ዝናብ ሰጪ ገፅታዎች እየተጠናከሩ እንደሚሄዱ ኤጀንሲው ተናግሯል፡፡

ከባድ ዝናብ ያስተናግዳሉ ከተባሉት የአገሪቱ አካባቢዎች ውስጥ አዲስ አበባን  ጨምሮ ምሥራቅና ምዕራብ ወለጋ፣ ጅማ፣ ኢሉአባቦራ፣ ምዕሪብና ሰሜን ሸዋ፣አርሲና ባሌ በኦሮሚያ አካባቢዎች የተካተቱ ሲሆን ለ7 ቀናት ያህል ከባድ የዝናብ መጠን ሊኖር ስለሚችል ጥንቃቄ ማድረግ እንደሚገባ ኤጀንሲው አሳስቧል፡፡

የመኸር ተጠቃሚ የሆኑ አካባቢዎች ደግሞ መደበኛና ከመደበኛ በላይ ዝናብ ሊኖራቸው ይችላል ተብሏል፡፡የሚጥለው ከባድ ዝናብ ሰብሎች እንዳያበላሽ አርሶ አደሩ ቅድመ ጥንቃቄ ሊያደርግ እንደሚገባውም ኤጀንሲው ተናግሯል፡፡

ምህረት ስዩም
አስተያየት ይፃፉ (0 አስተያየት)

ሐምሌ 7፣2009 የሸገር ወሬዎቻችን

  • በመጪዎቹ ሰባት ቀናት ውስጥ አዲስ አበባን ጨመሮ የኦሮሚያ አንዳንድ ከተሞች ከባድ ዝናብ ያገኛቸዋል ተባለ፡፡ (ምህረት ስዩም)
  • ከሳውዲ አረቢያ ለመመለስ ከተመዘገቡት ውስጥ ግማሽ ያህሉ እንኳ ወደ ኢትዮጵያ አልመጡም ተባለ፡፡ (የኔነህ ሲሣይ)
  • በአዲስ አበባ ሴተኛ አዳሪዎች በብዛት እየተገኙ ያሉት ከዚህ ቀደም የከተማ ዳር እየተባሉ በሚጠሩት አካባቢዎች ሆኗል ተባለ፡፡ (ንጋቱ ሙሉ)
  • የተተመነባቸው የቀን ገቢ ግምት እንዲስተካከልላቸው አቤት ካሉ ነጋዴዎች መካከል 73 በመቶዎቹ ግምቱ እንደፀናባቸው ገቢ ሰብሳቢ መሥሪያ ቤቱ ተናግሯል፡፡ (ትዕግሥት ዘሪሁን)
  • በኦሮሚያ ክልል 43 ሺ ነጋዴዎች ያለፈቃድ ሲነግዱ ነበር ተባለ፡፡ (ንጋቱ ረጋሣ)
  • በአዲስ አበባ 31 የግል ትምህርት ቤቶች ከደረጃ በታች ናችሁ ተብለው ፈቃዳቸውን ተነጠቁ፡፡ (ትዕግሥት ዘሪሁን)
  • በተያዘው አመት በአማራ ክልል በደረሰው የመኪና አደጋ ከ900 በላይ ሰዎች ለህልፈት መዳረጋቸው ተሰማ፡፡ (ምሥክር አወል)
አስተያየት ይፃፉ (0 አስተያየት)

የኢትዮጵያ ሚዲያ ካውንስል ባለፉት 25 ዓመታት፣ ለሀገሪቱ የሚዲያ እንቅስቃሴ የላቀ አስተዋፅኦ አድርገዋል ላላቸው አክብሮት ሊሰጥ ነው

የኢትዮጵያ ሚዲያ ካውንስል ባለፉት 25 ዓመታት፣ ለሀገሪቱ የሚዲያ እንቅስቃሴ የላቀ አስተዋፅኦ አድርገዋል ላላቸው አክብሮት ሊሰጥ ነው፡፡ካውንስሉ ባለፉት ዓመታት በርካታ ውጣ ወረድ አልፏል፣ ለሚለው የኢትዮጵያ ሚዲያ፣ የላቀ አስተዋፅኦ አድርገዋል፣ ብሎ አክብሮት የሰጣቸው፣ ለአቶ ክፍሌ ወዳጆና ለአቶ አማረ አረጋዊ ነው፡፡

አቶ ክፍሌ ወዳጆ በኢትዮጵያ የፕሬስ ሕግ ሲረቀቅ ከመሠረታዊ መንፈስ እንዳይዛባ በብርቱ መታገላቸው ተነግሮላቸዋል፡፡ ቀድሞ በውጭ ጉዳይ ሚኒስትርነት በኋላም በስደት ቆይተው ከተመለሱ በኋላ ኃሣብን የመግለፅ፣ የመናገር፣ የመፃፍ ፣ የመሰብሰብና የመሳሰሉትን የተመለከተ ድንጋጌዎች፣ የሚገባቸውን ሥፍራ እንዲያገኙ በፅኑ ተከራክረዋል ተብሏል፡፡

አቶ አማረ አረጋዊ የሪፖርተር ጋዜጦችንና መፅሔት መስረተው ከ20 ዓመታት በላይ የሚዲያ እድገት እንዲጐላ ብዙ መስራታቸው ተጠቅሶላቸዋል፡፡ቀደም ሲል በኢትዮጵያ ቴሌቪዥንና በኢትዮጵያ ዜና አገልግሎት መምሪያ ኃላፊነት የሰሩት አቶ አማረ አረጋዊ፣ የፕሬስ ነፃነትን የሚመለከቱ ደንቦች ሲረቀቁም በተደረገው ውይይት ከፍ ያለ አስተዋፅኦ ማድረጋቸው ታውቆላቸዋል፡፡

ለሚዲያ ባለሙያዎች አክብሮት መስጠት የወደፊቱን መንገድ ለማመቻቸት እንደሚረዳ የሚዲያ ካውንስሉ አምኖበታል፡፡ የአክብሮት መስጠቱ ሥነ-ሥርዓት ዛሬ አመሻሽ ላይ በሂልተን ሆቴል ይከናወናል፡፡

እሸቴ አሰፋ
አስተያየት ይፃፉ (0 አስተያየት)

ለተለያዩ ችግሮች ተጋላጭ የሆኑ የህብረተሰብ ክፍሎች ኢትዮጵያ ደርሳበታለች ለተባለው የእድገት ደረጃ ልክ ተጠቃሚ መሆን አለመሆናቸውን

ለተለያዩ ችግሮች ተጋላጭ የሆኑ የህብረተሰብ ክፍሎች ኢትዮጵያ ደርሳበታለች ለተባለው የእድገት ደረጃ ልክ ተጠቃሚ መሆን አለመሆናቸውን ለማረጋገጥ ጥናት ማካሄዱን የማህበራዊ ጥናት መድረክ የተሰኘው የጥናትና ምርምር ተቋም ለሸገር ተናግሯል፡፡ከአውሮፓ ህብረት ሲቪል ሶሳይቲ ድጋፍ ፕሮግራም ጋር በመተባበር በተደረገው ጥናት መሠረትም ለተለያየ ችግር ተጋላጭ የሆኑ ሴቶች፣ ህፃናት፣ አረጋዊያንና አካል ጉዳተኞች ሀገሪቱ በደረሰችበት የምጣኔ-ሐብት እድገት ልክ ተጠቃሚ እንዳልሆኑ በጥናት መረጋገጡን የተቋሙ ሥራ አስፈፃሚ ዳይሬክተር ዶክተር ምህረት አየነው ነግረውናል፡፡

ተገኘ በተባለው የኢኮኖሚ እድገት ከሌላው እኩል ተጠቃሚ ያልሆኑ የህብረተሰብ ክፍሎችም ኑሯቸው እንዲሻሻል መንግሥት የትኞቹን ፖሊሲዎቹን ማሻሻል ይገባዋል? ከማንስ ምን ይጠበቃል? ስለሚለው ጉዳዩ ከሚያገባቸውና ከምሁራን ጋር እንደተመከረበትም ሰምተናል፡፡

የጥናቶቹ ውጤትና ከምክክሩ የተገኙ ኃሣቦችም ለመንግሥት ፖሊሲ ግብዓት እንዲሆኑ ይደረጋል ተብሏል፡፡

ትዕግስት ዘሪሁን
አስተያየት ይፃፉ (0 አስተያየት)

የኢትዮጵያ ብሔራዊ ሎተሪ አስተዳደር ሰኔ 30 ቀን 2009 ዓ.ም ይወጣል ያልኩትን ሎተሪ እስከ ሐምሌ 13 ያራዘምኩት በሎተሪዎች መደራረብና በጊዜ ማነስ ሰበብ ነው አለ

የኢትዮጵያ ብሔራዊ ሎተሪ አስተዳደር ሰኔ 30 ቀን 2009 ዓ.ም ይወጣል ያልኩትን ሎተሪ እስከ ሐምሌ 13 ያራዘምኩት በሎተሪዎች መደራረብና በጊዜ ማነስ ሰበብ ነው አለ፡፡የህዝብ ግንኙነት ኃላፊው አቶ ቴዎድሮስ ነዋይ ለሸገር ሲናገሩ ሰኔ 30 ቀን 2009 ዓ.ም ይወጣል ካልነው ቶምቦላ ጐን ለጐን የህዳሴው ግድብ ቶምቦላ በመምጣቱ የተፈለገውን ያህል ትኬት ስላልተሸጠልን ነው የእጣውን መውጫ ወደ ሐምሌ 13 2009 ያራዘምነው ብለዋል፡፡

የብሔራዊ ሎተሪ አስተዳደር ያልተሸጡ ትኬቶችን ቀላቅሎ ያወጣቸዋል የሚባልም ሐሜት አለ ይህ እንዳይመጣ ነው በቀጥታ የቴሌቪዥን ስርጭት የእጣ አወጣጡን የምናስተላልፈው ያሉት አቶ ቴዎድሮስ በተለይ እድለኞች ሎተሪ በሚደርሳቸው ጊዜ መንግሥት ብዙ ገንዘብ ይወስድባቸዋል፣ የተለያዩ ድርጅቶችም ለልማትና ለበጎ አድራጐት እያሉ በአስተዳደሩ ጊቢ ሆነው ገንዘብ አምጡ እያሉ ያጨናንቋቸዋል ሲባል ሰምተናል፤ ይህ ግን ትክክል አይደለም ብለዋል አቶ ቴዎድሮስ፡፡

መንግሥት ከ1 ሺ ብር በላይ ከሆኑ ሽልማቶች 15 በመቶውን ብቻ ነው የሚወስደው ሲሉም ተናግረዋል፡፡አሁን በህዳሴው ቶምቦላ መደራረብ ምክንያት የዕጣ መውጫ ጊዜው እንደተራዘመው ቶምቦላ ከ12 ዓመታት በፊት ባለመረጋጋት ሰበብ የአንድ ቶምቦላ ማውጫ ጊዜን አራዝመን ነበር ሲሉ አቶ ቴዎድሮስ አስታውሰዋል፡፡

ወንድሙ ኃይሉ
አስተያየት ይፃፉ (0 አስተያየት)

ሐምሌ 6፣2009 የሸገር ወሬዎቻችን

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.

  • ኢትዮጵያ 16 በመቶ ዜጎቿ ጫት ቃሚ ሆነውባታል ተባለ፡፡ (ንጋቱ ሙሉ)
  • የማኅበራዊ ጥናት መድረክ ባለ አነስተኛ ገቢ ዜጐች የምጣኔ-ሐብታዊ ዕድገቱ ተጠቃሚነታቸው እምብዛም መሆኑን በጥናቴ አረጋግጫለሁ አለ፡፡ (ትዕግሥት ዘሪሁን)
  • የቶምቦላ መውጫ ጊዜ የተራዘመው በሌሎች ሎተሪዎች መደራረብ ምክንያት ነው ተባለ፡፡ (ወንድሙ ኃይሉ)
  • ኢትዮ ቴሌኮምን ከ3 ሚሊዮን ብር በላይ አክስረዋል የተባሉ ሁለት ግለሰቦች በገንዘብ እና በእሥራት ተቀጡ፡፡ (አስፋው ስለሺ)
  • ብሪታንያ በኢትዮጵያ ለሚካሄዱ የቤተሰብ ምጣኔ ስራዎች የ90 ሚሊዮን ፓውንድ ድጋፍ አደረገች፡፡ (ምህረት ስዩም)
  • የኢትዮጵያ ቀይ መስቀል ማህበር በድርቅ ጉዳት ለገጠማቸው ወገኖች የገቢ ማሰባሰቢያ ፕሮግራም ላዘጋጅ ነው አለ፡፡ (ወንድሙ ኃይሉ)
  • የፌዴራል ጠቅላይ ፍርድ ቤት የተፋጠነ ፍትህ የሚገኝበትን መላ እያጠና መሆኑን የፍርድ ቤቱ የበላይ ተናገሩ፡፡ (ምህረት ስዩም)
አስተያየት ይፃፉ (0 አስተያየት)

ለዛ የምሳ ሰዓት ፕሮግራም ሐምሌ 4፣2009

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.

አስተያየት ይፃፉ (0 አስተያየት)
Sheger 102.1 AudioNow Numbers