• United Bank S.C.

    ሕብረት ባንክ አ.ማ.

  • Slider Two

    የምስል ተጓዳኝ መልዕክት

  • Sldier Three

    የምስል ተጓዳኝ መልዕክት

ሸገር ወሬዎች እና ልዩ ወሬዎች

የኢትዮጵያ ብሮድካስት ባለሥልጣን ትናንትና ጋዜጠኞችን ሰብስቦ እንደተናገረው መገናኛ ብዙሃን ሥራቸውን...

የኢትዮጵያ ብሮድካስት ባለሥልጣን ትናንትና ጋዜጠኞችን ሰብስቦ እንደተናገረው መገናኛ ብዙሃን ሥራቸውን ሲሰሩ ህገ-መንግሥቱንና ህገ-መንግሥታዊ ሥርዓቱን ብቻ መነሻ ሊያደርጉ ይገባል ብለዋል፡፡መገናኛ ብዙሃኑ አንድን ቡድን ለማስደሰት ብቻ መስራት የለባቸውም ሲሉ ተናግረዋል፡፡

የባለሥልጣኑ ዋና ዳይሬክተር አቶ ዘርዓይ አስገዶም ትናንት ሲናገሩ እንደሰማነው አብዛኛው የመገናኛ ብዙሃን የግል ስሜታቸውን ካለው እውነታ ጋር በማዛመድ እየሰሩ ነው ብለዋል፡፡ባለፉት 12 ወራት በሀገሪቱ በመገናኛ ብዙሃን የነበረውን አዘጋገብ ተመልክተናል ያሉት ዳይሬክተሩ አብዛኛው መረጃን በግልፅነትና በፍጥነት ለህብረተሰቡ እያደረሱ አይደለም፤ በማኅበራዊ ገፆች ተቀድመዋል ብለዋል፡፡

በተለይም በሀገሪቷ ላይ ችግር በተፈጠረ ጊዜ ህብረተሰቡ ጉዳዩን የማወቅ መብት አለውና በድፍረት ያንን የሚሰራ መገናኛ ብዙሃን ያስፈልጋል ሲሉ ዳይሬክተሩ ተናግረዋል፡፡ከዚህ ቀደም የመንግሥት ኮሙኒኬሽን ጉዳዮች ኃላፊ የሆኑት ዶክተር ነገሪ ሌንጮ አንዳንድ የመገናኛ ብዙሃን ነገሩን እያባባሱት ስለሆነ በህግ እንጠይቃቸዋለን ማለታቸው ይታወሣል፡፡

ባለሥልጣኑ መረጃ አልሰጥም የሚሉ የመንግሥት ባለሥልጣናት ካሉ በህግ ማስገደድ ይቻላል አለበለዚያም ፈቃደኛ አለመሆናቸውን ገልፆ መረጃውን ማስተላለፍ አማራጭ መሆኑን ዳይሬክተሩ አቶ ዘርዓይ አስገዶም ተናግረዋል፡፡

አስፋው ስለሺ
አስተያየት ይፃፉ (0 አስተያየት)

ጥቅምት 16፣2010 የሸገር ወሬዎቻችን

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.

  • የብሔራዊ ሎተሪ አስተዳደር ድርጅት ባለፉት 3 ወራት ካሰብኩት በላይ ትርፍ አግኝቻለሁ አለ፡፡ (ወንድሙ  ኃይሉ)
  • የኢትዮጵያ የኢንዱስትሪ ግብአትና ልማት ድርጅት ከ2007 በጀት ዓመት ጀምሮ 22 ሺ 266 ሜትሪክ ቶን የተዳመጠ ጥጥ ለ12 ፋብሪካዎች የ885 ሚሊዮን ብር የዱቤ ሽያጭ አከናውኛለሁ አለ፡፡ (አንተነህ ሃብቴ)
  • የአዲስ አበባ መንገዶች ባለሥልጣን ጥገና የሚያደርግባቸው መንገዶች ዝግ ስለሆኑ የትራፊክ መጨናነቅ እንዳይፈጠር አማራጭ ያላቸውን መንገዶች እወቁት ብሏል፡፡ (ምህረት ስዩም)
  • በሚኒስትር ማዕረግ የፖሊሲ ጥናት ምርምር ማዕከል ምክትል ዋና ዳይሬክተር የነበሩት አቶ በረከት ስምኦን ያቀረቡት የሥልጣን መልቀቂያ ጥያቄ በመንግሥት ተቀባይነት ማግኘቱን ጠቅላይ ሚኒስትር ኃይለማርያም ደሣለኝ ተናገሩ፡፡ (ትዕግሥት ዘሪሁን)
  • የብሮድካስት ባለሥልጣን የኢትዮጵያ መገናኛ ብዙሃን ሁነቶችና ክስተቶችን በወቅቱና ግልፅነት በተላበሰ ሁኔታ እንዲዘግቡ ጠየቀ፡፡ (አስፋው ስለሺ)
  • በጥቁር አባይ የደብረ ብርሃን የቆዳ ፋብሪካ እንደ ፈረስና ዶሮ ካሉ እንስሣት የሚገኙ የቆዳ ውጤቶችን ማምረት ጀምሬአለሁ አለ፡፡ (ወንድሙ ኃይሉ)
አስተያየት ይፃፉ (0 አስተያየት)

እንኳን አደረሰን…

በግል ጥረት ሬዲዮ ጣቢያ ማቋቋም በጨለማ እንደመጓዝ ከባድ በነበረበት ወቅት፥ ለሬዲዮ ያለንን ፍቅር ብቻ ይዘን የጀመርነው ሸገር 102.1 ሬዲዮ አስር ዓመት ሞላው፡፡ህልማችን ምን ነበር? ተስፋችንና ፍላጎታችንስ? ሸገር አዲስ የሬዲዮ መላና አቀራረብ አዲስ የሬዲዮ ቃና ይዞ እንዲቀርብ ምኞታችን ነበር፡፡ ከተለመደው የተለየ፤ አለበለዚያማ ለምን? የምንል ደፋሮች ነበርን፡፡ ተስፋችን፥ ሕልማችንን የሚጋሩ ባለሙያዎች፣ ጣቢያውን የእኛ ብለው የሚያደምጡ አድማጮች ማግኘት ነበር፡፡

ሸገር የተመኘው ገለልተኛ፥ ኃላፊነት የሚሰማው፣ በአድማጮቹ የሚታመን፣ የመረጃና መዝናኛ ሬዲዮ ጣቢያ መሆን ነበር፡፡ ሸገር ቀድመው ረጅም ርቀት ከተጓዙትም ሆነ አብረው ሩጫ ከጀመሩት በተለየ መንገድ ለመጓዝ ሞክሯል፡፡

የሸገር እሴቶች ለጋዜጠኝነት ሙያዊ ብቃትና ስነምግባር እንዲሁም ለሙያ ነፃነት መከበር መቆም፤ እውነትን በትክክለኛነት፣ በሚዛናዊነትና በጨዋነት መናገር፤ የአድማጮቹን ፍላጎት፣ ባህልና ወግ ማክበር፤ ከማንም ጋር ያለመወገን፣ ለሁሉም እኩልና ፍትኃዊ ዕድል መስጠት ናቸው፡፡ የሸገር ሙያተኞች በእነዚህ አስር ዓመታት እነዚህን እሴቶቻቸውን በሚቻላቸው ጠብቀው ለመዝለቅ ሞክረዋል፡፡

ሸገር ስርጭቱን እንደጀመረ በተደጋጋሚ የሚመጡ አስተያየቶች፣ ምስጋናው እንዳለ ሆኖ፣ “አትደፍሩም፣ ትፈራላችሁ፣ እንዳንዴም ደፈር ማለት ያስፈልጋል” የሚሉ ነበሩ፡፡

በዚህ ረገድ የሸገርን አቋም ማስረዳት ያስፈልጋል፡፡ ይህም ገለልተኛ ሬዲዮ ጣቢያ መሆንና አማካዩን ቦታ መያዝ ነው፡፡ ገለልተኝነት መቃወምም፣ መደገፍም አይደለም፡፡ የተለየ እምነት፣ አቋምና የፖለቲካ መስመር ማራመድም አይደለም፡፡ ወይንም ያለውን አቋም፣ እምነትና መስመር መቃወምም መደገፍም አይደለም፡፡ የሸገር ወገንተኝነት ከሕዝብ ጋር ነው፡፡ ሸገር የአድምጮቹን ፍላጎት ከግምት በማስገባት እርካታ ማግኘታቸውን ለማረጋገጥ ይሠራል፡፡ ለጋራ ጥቅም ለእድገትና ብልጽግና ይቆማል፡፡ ለአድማጮች የዕለት ተለት የሕይወት ፍላጎት የሚሆኑ የመረጃና የመዝናኛ ፕሮግራሞች በጥራት ለማዘጋጀትና ለማስደመጥ ይተጋል፡፡ ሸገር ወደፊትም በዚሁ አቋሙ ፀንቶ፣ በርካታ ወጣት ሙያተኞች አፍርቶ፣ ለፕሬስ ነጻነትና ለጋዜጠኝነት ስነምግባር ታማኝ ሆኖ፣ ለአገራችን ሚዲያ ዕድገት የድርሻውን አስተዋጽኦ እያበረከተ ይቀጥላል የሚል እምነት አለን፡፡ በዚህ አጋጣሚ ለሁላችሁም ልባዊ ምስጋና እናቀርባለን፡፡

ሸገር የናንተው ነው!

ወ/ሮ መዓዛ ብሩ - የሸገር ኤፍ ኤም 102.1 መሥራችና ሥራ አስኪያጅ
አስተያየት ይፃፉ (4 Comments)

ለዛ የምሳ ሰዓት ፕሮግራም ጥቅምት 14፣2010

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.

አስተያየት ይፃፉ (0 አስተያየት)

በቅዱስ ጳውሎስ ሆስፒታል የተጀመረው የኩላሊት ንቅለ ተከላ በየወሩ መካሄድ መጀመሩን የኩላሊት ህመምተኞች እጥበት በጎ አድራጐት ድርጅት ተናገረ

በቅዱስ ጳውሎስ ሆስፒታል የተጀመረው የኩላሊት ንቅለ ተከላ በየወሩ መካሄድ መጀመሩን የኩላሊት ህመምተኞች እጥበት በጎ አድራጐት ድርጅት ተናገረ፡፡ከዚህ ቀደም በሦስትና በአራት ወር ልዩነት ህክምናው ይሰጥ እንደነበር ሰምተናል፡፡አሁን የቅዱስ ጳውሎስ ሆስፒታል እራሱን በማደራጀት ህክምናውን በየወሩ መስጠት መጀመሩን ማኅበሩ ተናግሯል፡፡ልምድ ባላቸው ሀኪሞች የተሳካ የኩላሊት ንቅለ ተከላ ተጠቃሚ የሆኑ የኩላሊት ህመምተኞች ቁጥርም 50 መድረሱን ሰምተናል፡፡

ኩላሊት የሰጡና የተቀበሉ ሰዎችም ዛሬ በኢትዮጵያ ሆቴል ዲያሊሲስ /የኩላሊት እጥበት ህክምና/ እያደረጉ ላሉ የማኅበሩ አባል ለሆኑ የኩላሊት ህመምተኞች ልምዳቸውን እያካፈሉ ነው፡፡ኩላሊት የሰጡትም ሆነ የተቀበሉትም ጤናማ ህይወት እየኖሩ መሆናቸውን ተናግረዋል፡፡

የኩላሊት ንቅለ ተከላ ተጠቃሚ የሆኑት ሰዎች ከዚህ ቀደም ህይወታቸውን ለማቆየት ከፍተኛ ወጪ የሚጠይቀውን የኩላሊት እጥበት ህክምና እየወሰዱ መቆየታቸውን የተናገሩት የማኅበሩ ዋና ሥራ አስኪያጅ አቶ ሰለሞን አሰፋ ሌሎችም ህክምናውን እየወሰዱ ያሉ ህሙማንም  በመጪው ጊዜ ጤናማ ህይወት እንዲኖራቸው የኩላሊት ንቅለ ተከላ ህክምናው ያስፈልጋቸዋል ብለዋል፡፡

እዚያ ለመድረስ ግን አሁን የጀመሩት የኩላሊት እጥበት ህክምና ሳይቋረጥ በህይወት መሰንበት ይጠበቅባቸዋልና ህብረተሰቡ በ8846 A ብሎ በመላክ የጀመረውን ድጋፍ እንዲቀጥል ጥሪ አቅርበዋል፡፡ኩላሊታቸው ሙሉ በሙሉ ሥራ በማቆሙ ምክንያት የኩላት አጥበት ህክምና እንዲያገኙ ማኅበሩ ከ400 በላይ ለሆኑ አባላቱ በየሳምንቱ ለእያንዳንዳቸው 600 ብር የገንዘብ ድጋፍ ያደርጋል፡፡

ሥራ አስኪያጁ አቶ ሰለሞን እንዳሉት ማኅበሩ በአዲስ አበባ ከተማ ብቻ ይሰጥ የነበረውን የኩላሊት እጥበት ድጋፍ በመጪው ጊዜ በመቐሌ፣ ሃዋሳ፣ ባህርዳር፣ ጎንደርና ድሬዳዋ ከተሞችም ለሚገኙ የኩላሊት ህመምተኞች ተመሳሳይ ድጋፍ ለማድረግ ዝግጅቱን ጨርሷል ብለዋል፡፡

ትዕግሥት ዘሪሁን
አስተያየት ይፃፉ (0 አስተያየት)

የኢትዮጵያ ብር የመግዛት አቅሙ ከዶለር አንፃር በ15 በመቶ ዝቅ እንዲል መደረጉ በኮንስትራክሽኑ ዘርፍ የሚያስከትለው የዋጋ ግሽበት ሊጠና ነው ተባለ

የኢትዮጵያ ብር የመግዛት አቅሙ ከዶለር አንፃር በ15 በመቶ ዝቅ እንዲል መደረጉ በኮንስትራክሽኑ ዘርፍ የሚያስከትለው የዋጋ ግሽበት ሊጠና ነው ተባለ፡፡የኢትዮጵያ ኮንስትራክሽን ሥራ ተቋራጮች ማኀበር ፕሬዝዳንት ኢንጂነር አበራ በቀለ እንዳሉት ከሆነ የብር የመግዛት አቅሙ ዝቅ እንዲል ከተደረገ ወዲህ ባለው አጭር ጊዜም ቢሆን የዋጋ ንረቱ ጐልቶ እየታየ ነው፡፡

በኮንስትራክሽን ዘርፍ የተሰማሩት የማኅበሩ አባሎችም የዋጋ ንረቱን እንዴት ብናደርግ ይሻል ይሆን ብለው ወደ ማኅበሩ ጥያቄ እያቀረቡ ነው ያሉት ኢንጂነር አበራ ማኅበሩም ከደንበኞቻችሁ ጋር  በደንብ ተነጋገሩ ከዚያም ካለፈ ከእኛም ጋር ቢሆን መፍትሔ እንፈልጋለን ብለናቸዋል ብለዋል፡፡

የዋጋ ግሸበቱ በተለይም አዲስ ኮንትራክት ወስደው ሥራ በጀመሩት ላይ ጫናው ይበረታል ሲሉም ተናግረዋል፡፡የዋጋ ማካካሻ መጠየቅ የሚቻለው አንድም ከ18 ወራት በላይ የሚወስድ ግንባታ ከዚያም ሲልያፍ ደግሞ ግንባታው ከተጀመረ 12 ወራት ያለፈው መሆን ያለበት ነው ያሉት ኢንጂነር አበራ ይህን መስፈርት የማያሟሉ ማካካሻ መጠየቅ ባይችሉም ጫናው ካለና ኮንትራክተሩ ከገበያ ማውጣት ስለሌለበት መፍትሄ የሚያገኙበት መንገድ ይኖራልም ብለዋል፡፡

በአጠቃላይም የዋጋ ለውጡ ምን ያህል እንደሆነና መፍትሃው ምን ሊሆን እንደሚችል ከጥናቱ በኋላ ይፋ እናደርጋለን ሲሉም ነግረውናል፡፡

ዮሐንስ የኋላወርቅ

አስተያየት ይፃፉ (0 አስተያየት)

የውጭ ምንዛሬ ተመን ማሻሻያ እንደተደረገበት ከተነገረ ወዲህ በተለያዩ ሸቀጦች ላይ የዋጋ ጭማሪ እየተደረገ ይታያል

የውጭ ምንዛሬ ተመን ማሻሻያ እንደተደረገበት ከተነገረ ወዲህ በተለያዩ ሸቀጦች ላይ የዋጋ ጭማሪ እየተደረገ ይታያል፡፡መንግሥት ምንም እንኳ የተደረገው የውጭ ምንዛሬ ተመን ማሻሻያው ለዋጋ ጭማሪ የሚዳርግ ኢኮኖሚያዊ ምክንያት የለውም ቢልም ምርቶቻቸው ላይ ዋጋ የጨመሩ እንዲሁም የሸሸጉ ነጋዴዎች ተስተውለዋል፡፡

ለምሣሌም በግንባታ ዕቃዎች፣ በኤሌክትሮኒክስ ምርቶች፣ በመኪና ጎማና በመድኃኒት በመሳሰሉት ላይ ጭማሪው ታይቷል፡፡የውጭ ምንዛሪ ተመን ማሻሻያው ሰበብ ሆኖ በምርቶች ላይ ዋጋ እየተጨመረ ነው ምን እየሰራችሁ ነው ሲል ሸገር የአዲስ አበባ ንግድ ቢሮን ጠይቋል፡፡

የቢሮው የኮሙኒኬሽን ዳይሬክቶሬት ዳይሬክተር አቶ በላይነህ ወልደሰንበት እንደሚሉት የአዲስ አበባ ንግድ ቢሮ ከሌሎች መሥሪያ ቤቶች ጋር በጋራ በመሆን ከነጋዴዎች ጋር ዋጋ እንዳይጨምሩ በመመካከር እንዲሁም ይህን ተላልፈው በሚገኙት ላይ ደግሞ እርምጃ እየወሰደ ነው ብለዋል፡፡ከአስመጪዎች ጋርም ትናንት ምክክር ነበር ያሉት አቶ በላይነህ አንዳንዶቹ አስመጪዎችና አምራቾች እንደውም እኛ ሳንሆን ቸርቻሪዎች ናቸው ጭማሪ ያደረጉት ብለዋል ብለውናል፡፡

ከህብረተሰቡ ጥቆማ ካልደረሰን እኛ ብቻችንን ምክንያታዊ ያልሆነ የዋጋ ጭማሪ የሚያደርጉትን መቆጣጠር ይቸግረናል ያሉት አቶ በላይነህ መርካቶ ሲዳሞ ተራ፣ ተክለኃይማኖት፣ መገናኛ አካባቢዎች የተለያዩ ምርቶችን ሸሽገው የተገኙ ነጋዴዎች መደብራቸው ታሽጐ ምርመራ እየተካሄደባቸውም ነው ብለዋል፡፡የውጭ ምንዛሬ ተመን ማሻሻያውን ሰበብ አድርገው በምርቶቻቸው ላይ የዋጋ ጭማሪ የሚያደርጉ ካጋጠሟችሁ በ8588 ደውሉና ንገሩኝ ሲል የአዲስ አበባ ንግድ ቢሮ ጥሪ አቅርቦላችኋል፡፡ 

ንጋቱ ሙሉ

አስተያየት ይፃፉ (0 አስተያየት)

ጥቅምት 14፣2010 የሸገር ወሬዎቻችን

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.

  • የአዲስ አበባ ንግድ ቢሮ የብርን የምንዛሪ ተመን ማስተካከያ አሳበው የዋጋ ጭማሪ በሚያደርጉት ላይ እርምጃ እየወሰድኩ ነው አለ፡፡ ሕብረተሰቡም በጥቆማ እንዲረዳው ጠይቋል፡፡ (ንጋቱ ሙሉ)
  • ትናንት ወደ ኢትዮጵያ መጥተው የነበሩት የሶማሊያው ፕሬዝዳንት ወደ ጅቡቲ መሄዳቸው ተሰምቷል፡፡ ፕሬዝዳንት መሐመድ አብዱላሂ መሐመድ ፎርማጆ በአዲስ አበባ የአንድ ቀን ቆይታቸው ከከፍተኛ ሹማምንት ጋር ተነጋግረዋል ተብሏል፡፡ (የኔነህ ሲሣይ)
  • የብር ምንዛሪ አቅም መቀነስ በግንባታው ዘርፍ ላይ ሊያስከትል የሚችለው ተፅዕኖ በመስኩ ማኅበር እየተጠና ነው፡፡ (ዮሐንስ የኋላወርቅ)
  • በቅዱስ ጳውሎስ ሆስፒታል የኩላሊት ንቅለ ተከላ በየወሩ መካሄድ ጀመረ፡፡ (ትዕግሥት ዘሪሁን)
  • የያዝነው ጥቅምት ወር ነፋሻማ መሆኑ ለእሳት አደጋ መደጋገም ምክንያት ነው መባሉን ከእሣትና ድንገተኛ አደጋዎች መከላከልና መቆጣጠር ባለሥልጣን ሰማን፡፡ (ወንድሙ ኃይሉ)
አስተያየት ይፃፉ (0 አስተያየት)

የመንግሥት መሥሪያ ቤቶች ያለ አገልግሎት ያከማቿቸውን ንብረቶች ከብክነት ለመታደግ በሽያጭ...

የመንግሥት መሥሪያ ቤቶች ያለ አገልግሎት ያከማቿቸውን ንብረቶች ከብክነት ለመታደግ በሽያጭ እንዲያስወግዱና ገንዘቡንም ለመንግሥት እንዲያስገቡ ባለፈው ዓመት ትዕዛዝ ከተላለፈባቸው 108 መሥሪያ ቤቶችና ዩኒቨርስቲዎች መካከል 54ቱ አሁንም ንብረቶቹን ሸጠው ገንዘቡንም አላስረከቡም ተብሏል፡፡

የገንዘብና ኢኮኖሚ ትብብር ሚኒስቴር ከፍተኛ የንብረት ክምችት አላቸው ያላቸውን 108 የመንግሥት መሥሪያ ቤቶችና ዩኒቨርስቲዎች ንብረታቸውን እስከ ሰኔ ወር 2009 ዓ.ም ድረስ ሸጠው ገንዘቡንም ለመንግሥት ፈሰስ እንዲያደርጉ ትዕዛዝ አስተላልፎ ነበር፡፡

በትዕዛዙ መሠረት 75 የፌዴራል መሥሪያ ቤቶችና 9 ዩኒቨርስቲዎች ያለ አገልግሎት ያከማቿቸውን ንብረቶች በሸያጭ ማስወገዳቸውን ሰምተናል፡፡ከመካከላቸውም 26 መሥሪያ ቤቶችና አንድ ዩኒቨርስቲ ያለ አገልግሎት ያከማቿቸውን ንብረቶች ሸጠው 3 ነጥብ 9 ሚሊዮን ብር ለመንግሥት ገቢ ማድረጋቸውን ፤ ለመንግሥት ግዢና ንብረት ማስወገድ አገልግሎት ሪፖርት እንዳደረጉ የነገሩን የአገልግሎቱ ምክትል ዋና ዳይሬክተር  የሆኑት አቶ ሰለሞን ዐይንማር ናቸው፡፡

ቀሪዎቹ መሥሪያ ቤቶችም በሽያጭ ካስወገዷቸው ንብረቶች  ያገኙትን ገንዘብ መጠን ለአገልግሎቱ ሪፖርት ሲያደርጉ ይፋ እናደርጋለን ብለዋል አቶ ሰለሞን፡፡እስካሁን ያከማቿቸውን ንብረቶች በተሰጣቸው የጊዜ ገደብ መሠረት ማስረከብ ያልቻሉ 33 የፌዴራልና 21 ዩኒቨርስቲዎች በአጠቃላይ 54 መሥሪያ ቤቶች ሽያጩን እንዲያከናውኑም የመንግሥት ግዢና ንብረት ማስወገድ አገልግሎት ሙያዊ ድጋፍ እየሰጣቸው መሆኑን ከአቶ ሰለሞን ሰምተናል፡፡

በተያያዘም በየመንግሥት መሥሪያ ቤቱ የንብረቶችን ብክነት ለመታደግ አሁንም ክትትል ማድረጋችን ቀጥለናል ያሉት ምክትል ዳይሬክተሩ ለብክነት የተጋለጠ ከፍተኛ የንብረት ክምችት አላቸው ተብለው የተጠረጠሩ የሚኒስቴር መሥሪያ ቤቶችን ጨምሮ 50 የመንግሥት መሥሪያ ቤቶች ላይ ጥናት እያደረግን ነው ብለዋል፡፡ከመካከላቸውም የገንዘብና ኢኮኖሚ ትብብር ሚኒስቴር፣ የእርሻና ተፈጥሮ ሃብት ሚኒስቴር፣ ትምህርት ሚኒስቴርና ሌሎችም ይገኙበታል ተብሏል፡፡

ትዕግሥት ዘሪሁን
አስተያየት ይፃፉ (0 አስተያየት)

የአዲስ አበባ መንገዶች ባለሥልጣን ባለፈው ክረምት ለመጠገን ሞክሬ መልሶ መፈራረስ...

የአዲስ አበባ መንገዶች ባለሥልጣን ባለፈው ክረምት ለመጠገን ሞክሬ መልሶ መፈራረስ ያሳየውን የከተማውን መንገድ በአዲስ መልክ መጠገን ጀምሬያለሁ አለ፡፡የህዝብ ግንኙነት ኃላፈው አቶ ጥዑማይ ወልደገብርኤል ለሸገር ሲናገሩ አምና በ350 ሚሊዮን ብር ወጪ ጥገና ተደርጐላቸው በክረምቱ ሰበብ መልሰው መፈራረስ ያሳዩትን መንገዶች እንዲሁም የእግረኛ መረማመጃዎችንና የኮብልስቶን መንገዶችን ለመጠገን ዘንድሮ ግማሽ ሚሊዮን ብር መድበን ሥራውን በሌሊት ማከናወን ጀምረናል ብለዋል፡፡

እስከ ሰኔ 30 ቀን 2010 ዓ.ም ለማጠናቀቅ ታስቦ ተጀምረ የተባለው የአዲስ አበባ መንገዶች ጥገና የተለይ በደቡብ አዲስ አበባ አቃቂ መስመር፣ ምዕራብ አዲስ አበባ አየር ጤና መስመር፣ ሰሜን አዲስ አበባ ድልበር መስመርን እንዲሁም በምሥራቅ አዲስ አበባ ሳሀሊተ ምህረት አካባቢ ሰፋ ያለ የጥገና ሥራ የሚከናወንላቸው ናቸው ተብሏል፡፡

የአዲስ አበባ መንገዶች ባለሥልጣን በየሳምንቱ የሰራውን አፈፃፀም ይገመግማል ያሉት አቶ ጥዑማይ  በስራው ምንያት የሚቆፋፈሩ አካባቢዎች ይበዛሉ እነዚህንም ስፍራዎች በአንፀባራቂ ምልክቶች እየዘጋን ተለዋጭ መንገድ በማመቻቸት የጥገና ስራውን እናከናውናለን በማለትም ነግረውናል፡፡

ወንድሙ ኃይሉ

አስተያየት ይፃፉ (0 አስተያየት)

ጥቅምት 9፣2010 የሸገር ወሬዎቻችን

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.

  • በአዲስ አበባ አቅራቢያ በኦሮሚያ ከተሞች የሚኖሩና በመዲናዋ የሚሰሩ የመንግሥት መሥሪያ ቤት ሠራተኞች የፐብሊክ ሰርቪስ ትራንስፖርት አገልግሎት ተጠቃሚ እንዳልሆኑ ተናገሩ፡፡ (ማኅሌት ታደለ)
  • ወደ ጎዳና ላይ የሚወጡ ሕፃናት ዋነኛ ምክንያታቸው የኢኮኖሚ ችግር ነው ተባለ፡፡ ህፃናትን ወደየቤታቸው ለመመለስ የተቋቋመ ብሔራዊ ኮሚቴ በ6 ወር የሰራሁት ሥራ የተሳካ ነው ብሏል፡፡ (አስፋው ስለሺ)
  • ያለ አገልግሎት የተከማቹ ቁሣቁሶችን ሸጠው ገንዘቡን ገቢ እንዲያደርጉ ከታዘዙ የመንግሥት መሥሪያ ቤቶች 54ቱ ትዕዛዙን ሥራ ላይ ማዋል አልቻሉም ተባለ፡፡ (ትዕግሥት ዘሪሁን)
  • የአዲስ አበባ መንገዶች ባለሥልጣን በከተማዋ የመንገድ ጥገና ጀምሬያለሁ አለ፡፡ (ወንድሙ ኃይሉ)
  • በቢሾፍቱ ባለቤቱን በሹካ ወግቶ የገደለው በእሥራት ተቀጣ፡፡ (ማኅሌት ታደለ)
አስተያየት ይፃፉ (0 አስተያየት)
Sheger 102.1 AudioNow Numbers