• United Bank S.C.

    ሕብረት ባንክ አ.ማ.

  • Slider Two

    የምስል ተጓዳኝ መልዕክት

  • Sldier Three

    የምስል ተጓዳኝ መልዕክት

ሸገር ወሬዎች እና ልዩ ወሬዎች

ግንቦት 17፣2009 የሸገር ወሬዎቻችን

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.

  • የልብ ህክምና መሳሪያዎችን በሀገር ቤት መጠገን አለመቻሉ በርካታ ታካሚዎች ህክምናውን እንዳያገኙ ተፅዕኖ እያደረገ መሆኑ ተሰምቷል፡፡ (ምሥክር አወል)
  • በኢትዮጵያ ተመዝግበው ከሚንቀሣቀሱ የፖለቲካ ማኅበራት አብዛኞቹ የሕግ ጉዳዮችን አላሟሉም ተባለ፡፡ (ትዕግሥ ዘሪሁን)
  • ለ8 ወር በሥራ ገበታቸው ላይ አልተገኙም የተባሉ 1 የፌዴራል ከፍተኛ ፍርድ ቤት ዳኛ ከሥራቸው እንዲሰናበቱ በፌዴራል ዳኞች አስተዳደር ጉባዔ የቀረበው የውሣኔ ኃሣብ በህዝብ እንደራሴዎች ምክር ቤት በአብላጫ ድምፅና በሁለት ድምፅ ተአቅቦ ፀደቀ፡፡ (ትዕግሥት ዘሪሁን)
  • በአዲስ አበባ የካ ክፍለ ከተማ ሌሊቱን የደረሰ የእሣት አደጋ ከ1 ሚሊዮን ብር በላይ ንብረት አወደመ፡፡ (ወንድሙ ኃይሉ)
  • ከመንግሥት መሥሪያ ቤቶች በጨረታዎቻቸው ሂደት ላይ የሚታዩ እንከኖችን እንዲያርሙ የሚቀርብባቸውን ቅሬታ የማይቀበሉ አሉ ተባለ፡፡ (ንጋቱ ረጋሣ)
  • የሮክፌለር ፋውንዴሽን ፕሬዝዳንት የቦሌ ለሚ ኢንዱስትሪ ፓርኮችን ጨምሮ የተለያዩ ሥፍራዎችን ጐበኘ፡፡ (የኔነህ ሲሣይ)
አስተያየት ይፃፉ (0 አስተያየት)

ዶክተር ቴድሮስ አድሃኖም የዓለም የጤና ድርጅት የበላይ ሆነው ተመረጡ

Dr-Tedrosዶክተር ቴድሮስ አድሃኖም የዓለም የጤና ድርጅት የበላይ ሆነው ተመረጡ፡፡ዶክተር ቴድሮስ ቀደም ሲል የኢትዮጵያ የጤና ጥበቃ ሚኒስትር ከዚያም የውጭ ጉዳይ ሚኒስትር ሆነው ማገልገላቸው ይታወቃል፡፡ለዓለም የጤና ድርጅት ዋና ዳይሬክተር ለመሆን ከ2 ዓመታት በላይ ዕጩዎች የምረጡኝ ዘመቻ ሲያካሂዱ ቆይተዋል፡፡

ዶክተር ቴድሮስ አድሃኖም ከአገር ውስጥ በተጨማሪ በቅድሚያ የመላው አፍሪካን ከዚያም የመላው ዓለምን አገሮች ይሁንታ አግኝተው የዓለም የጤና ድርጅት ዋና ዳይሬክተር በመሆን ለኢትዮጵያም ኩራት ለመሆን በቅተዋል፡፡የኢትዮጵያ መንግሥትም ለዶክተር ቴድሮስ መመረጥ ባለመታከት ድጋፍ ለማሰባሰብ ዲፕሎማሲያዊ ምርኩዝ ሆኖላቸዋል፡፡ዶክተር ቴዎድሮስ የዓለም የጤና ድርጅት የበላይ ሆነው የተመረጡት 133 ድምፅ በማግኘት ነው፡፡የዶክተር ቴዎድሮስ ተፎካካሪ የነበሩት ብሪታንያዊው ዶክተር ዴቪድ ናባሮ ያገኙት ድምፅ 50 ነው፡፡

ዶክተር ቴዎድሮስ ውድድሩ ፈታኝና መሰናክሎች፣ ያልተጠበቁም ችግሮች የታዩበት መሆኑን ለመገናኛ ብዙሃን በሰጡት ቃለ መጠይቅ ተናግረው ነበር፡፡የ52 ዓመቱ ዶክተር ቴድሮስ አድሃኖም በጤና ጥበቃ ሚኒስትርነታቸው ወቅት በኢትዮጵያ እንደ ወባ፣ ኤች.አይ.ቪ ኤድስና፣ ቲቪ ያሉ ወረርሽኞች ሲያስከትሉ የነበረውን የሞት መጠን በከፍተኛ ደረጃ እንዲቀንስ ያስቻሉ መሆኑ ለዚህ ታላቅ ዓለም አቀፋዊ ኃላፊነት እንዲበቁ አስተዋፅኦ አድርጐላቸዋል፤ የዕውቅናም ያህል ተቆጥሮላቸዋል፡፡

40 ሺ ሴት የጤና ባለሙያዎችን አሰልጥኖ በማሰማራትም የአገሪቱን የጤና ሽፋን አድማስ ማስፋፋታቸውም የጤና ጥበቃ ሚኒስትርነታቸው ወቅት ትሩፋት ሆኖ ይጠቀስላቸዋል፡፡በኢትዮጵያ አገራዊ የጤና መድን ሽፋን መተዋወቅ የጀመረው በእሳቸው የጤና ጥበቃ ሚኒስትርነት ወቅት ነው፡፡

ተጨማሪ ያንብቡ...

አስተያየት ይፃፉ (1 Comment)

አንበሣ የከተማ አውቶቡስ አገልግሎት ድርጅት ባለፉት አራት ወራት በተለያዩ ባለሞያዎች ለአውቶቡሶቹ ጥገና አድርጓል ተባለ

አንበሣ የከተማ አውቶቡስ አገልግሎት ድርጅት ባለፉት አራት ወራት በተለያዩ ባለሞያዎች ለአውቶቡሶቹ ጥገና አድርጓል ተባለ፡፡ጥገናውን ያካሄዱት የቢሾፍቱ አውትሞቲቭ እና የራሱ ባለሞያዎች እንደሆኑ የድርጅቱ ኮሙኒኬሽን ኃላፊ አቶ ተሾመ ንጋቱ ነግረውናል፡፡አቶ ተሾመ እንዳሉት 338 አውቶቡሶች የተጠገኑት በ43 የቢሾፍቱ አውቶሞቲቭ ባለሞያዎች ነው፡፡35 የራሱ የአንበሳ ከተማ አውቶቡስ አገልግሎት ድርጅት ባለሞያዎች ደግሞ 143 አውቶቡሶችን ጠግነዋል ብለዋል፡፡

መሪ እና የመኪና እግር መቀየር እንዲሁም ቀለም የመቀባት ስራ ኃላፊው እንዳሉት ተሰርተዋል፡፡ሌሎች አካላዊ ጥገናዎች እና ኤሌክትሪካል ስራዎችም ለአውቶቡሶቹ ተሰርተዋል ብለዋል፡፡ጥገናው ድርጅቱ የሚሰጠው አገልግሎት እንዲሻሻል ያደርጋል ነው ያሉት፡፡ድርጅቱ ከጥገና በተጨማሪ ቀደም ሲል አውቶቡሶች በማያድሩባቸው አካባቢዎች እንዲያድሩ ማድረግ መጀመሩን አቶ ተሾመ ተናግረዋል፡፡

የአውቶቡሶቹ በአካባቢዎቹ ማደር መጀመር ጠዋት በሰዓታቸው አገልግሎት እንዲሰጡ ይረዳል ሲሉም አክለዋል፡፡ለዚህ እንደ አብነት ያነሱት 31 ቁጥር አውቶቡስ ስድስት ኪሎ አካባቢ ማደር እንዲጀምር መደረጉን ነው፡፡ድርጅቱ መንገደኞችን ለማጓጓዝ የሚጠቀመው ካሉት አውቶቡሶች 445ቱን እንደሆነ ከአቶ ተሾመ ሰምተናል፡፡የተቀሩት እንደ ስልጠና እና ሌሎች ተግባራት ይውላሉ ሲሉም አክለዋል፡፡

ተጠቃሚዎች በአገልግሎት አሰጣጥ ወቅት የሚያስተውሏቸው ችግር ካሉ በነፃ የስልክ ቁጥር 8642 ጥቆማ መስጠት እንደሚችሉም አቶ ተሾመ ተናግረዋል፡፡

ንጋቱ ረጋሣ

አስተያየት ይፃፉ (0 አስተያየት)

ግንቦት 16፣2009 የሸገር ወሬዎቻችን

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.

  • የሳውዲ አረቢያ መንግሥት ለውጪ ሀገር ህገ-ወጥ ነዋሪዎች የሰጠው የመውጫ የጊዜ ገደብ 40 ቀናት ብቻ ቢቀሩትም ለመመለስ የተመዘገቡ ኢትዮጵያዊያን ቁጥር እጅግ ትንሽ ነው ተባለ፡፡ (የኔነህ ሲሣይ)
  • ዶክተር ቴዎድሮስ አድሃኖም የዓለም ጤና ድርጅት ዋና ዳይሬክተር ሆነዋል፡፡ (ወንድሙ ኃይሉ)
  • በኢትዮጵያ የሚገኙ የሱዳን ስደተኞች በፈቃዳቸው ወደ ሀገራቸው እንዲመለሱ በብሉ ናይል ግዛት የቀረበላቸውን ጥያቄ አንቀበልም ማለታቸው ተሠማ፡፡ (ምሥክር አወል)
  • የዓለም ጤና ድርጅትን በዋና ዳይሬክተርነት እንዲመሩ የተመረጡት ዶክተር ቴዎድሮስ አድሃኖም ውድድራቸው ፈታኝና አስቸጋሪ ቢሆንም እንደሚያሸነፉ ሙሉ እምነት ነበራቸው ተብሏል፡፡ (የኔነህ ከበደ)
  • የአንበሣ የከተማ አውቶቡስ አገልግሎት ድርጅት ከ480 በላይ አውቶቡሶችን ጠግኜ ለአገልግሎት አዘጋጅቻለሁ አለ፡፡ (ንጋቱ ረጋሣ)
  • መንግሥት 2 የልማት ድርጅቶችን ሊሸጥ ነው፡፡ (ወንድሙ ኃይሉ)
አስተያየት ይፃፉ (0 አስተያየት)

ኢትዮጵያ ከውጭ ብድርና እርዳታ ተፅዕኖ ነፃ ለመሆንና ሀገራዊ ወጪን በራሷ ገቢ ለመሸፈን ብዙ አንደሚቀራት የኢትዮጵያ ገቢዎችና ጉምሩክ ባለሥልጣን ተናገረ

ኢትዮጵያ ከውጭ ብድርና እርዳታ ተፅዕኖ ነፃ ለመሆንና ሀገራዊ ወጪን በራሷ ገቢ ለመሸፈን ብዙ አንደሚቀራት የኢትዮጵያ ገቢዎችና ጉምሩክ ባለሥልጣን ተናገረ፡፡ባለሥልጣን መሥሪያ ቤቱ ባለፉት አስር ወራት ለመሰብሰብ ካቀደው 140 ቢሊዮን ብር በላይ ውስጥ የ26 ቢሊዮን ብር ቅናሽ ያለው ገቢ ማግኘቱን ተናግሯል፡፡ከግብርና ግብር ካልሆኑ ገቢዎች 113 ነጥብ 56 ቢሊየን ብር መሰብሰቡን የባለሥልጣን መሥሪያ ቤቱ ዋና ዳይሬክተር አቶ ከበደ ጫኔ ተናግረዋል፡፡

ዳይሬክተሩ ዛሬ የመሥሪያ ቤቱን የአሥር ወር ዕቅድ አፈፃፀም ሪፖርት ለህዝብ እንደራሴዎች ምክር ቤት ሲያቀርቡ እንደሰማነው የተሰበሰበው ገቢ ከታቀደው የ26 ቢሊዮን ብር ቅናሽ ያለው ቢሆንም ካለፈው ዓመት ተመሣሣይ ጊዜ ጋር ሲመሣከር ግን የ7 ቢሊዮን ብር ብልጫ እንዳለው ተናግረዋል፡፡ከተሰበሰበው ገቢ የሀገር ውስጥ ታክስ 57 ነጥብ 8 በመቶ፣ የወጪ ንግድ ቀረጥና ታክስ 42 ነጥብ 1 በመቶ እና የሎተሪ ሽያጭ የተጣራ ትርፍ ዜሮ ነጥብ 10 በመቶ ድርሻ አበርክተዋል፡፡

በሌላ በኩል ከአዲስ አበባ ከተማ አስተዳደር ባለፉት አሥር ወራት 19 ነጥብ 65 ቢሊዮን ብር መሰብሰቡን ሰምተናል፡፡ይህም ከታቀደው 22 ነጥብ 16 ቢሊዮን ብር ጋር ሲመሣከር የዜሮ ነጥብ 45 ቢሊዮን ብር ቅናሽ አሣይቷል፡፡ካለፈው ዓመት ተመሣሣይ ጊዜ ጋር ሲመሣከር ግን የ1 ነጥብ 91 ቢሊዮን ብር ብልጫ አለው ብለዋል ዳይሬክተሩ፡፡

ባለፉት ዓመታት የኢትዮጵያ የሀገር ውስጥ ምርቷ ካስመዘገበችው ዕድገት ጋር ሲነፃፀር የሰበሰበችው የታክስ ገቢ ዝቅተኛ መሆኑን የኢትዮጵያ ገቢዎችና ጉምሩክ ባለሥልጣን ዋና ዳይሬክተር አቶ ከበደ ተናግረዋል፡፡ይህም ኢትዮጵያ ከውጭ ብድርና እርዳታ ተፅዕኖ ነፃ ለመሆንና ሀገራዊ ወጪዋን በሀገር ውስጥ ገቢ ለመሸፈን ገና ብዙ አንደሚቀራት ይመሰክራል ብለዋል፡፡

ዳይሬክተሩ ስለ ታክስ ከፋዮችና የጉምሩክ አገልግሎት ድጋፍ፣ ስለ ኮንትሮባንድና ሌሎችንም ባለሥልጣን መሥሪያ ቤቱ በአሥሩ ወራት ለከወናቸው ሥራዎች ለህዝብ እንደራሴዎች ምክር ቤት በዝርዝር ሪፖርት አቅርቧል፡፡ከእንደራሴዎቹ ለቀረቡላቸው ጥያቄዎችም መልስ ሲሰጡ አርፍደዋል፡፡

ትዕግስት ዘሪሁን

አስተያየት ይፃፉ (0 አስተያየት)

መሠረታዊ የሆኑ የእድሮች ጥያቄዎችን የሚመልስ መድረክ ሊዘጋጅ እንደሆነ ሰማን

መሠረታዊ የሆኑ የእድሮች ጥያቄዎችን የሚመልስ መድረክ ሊዘጋጅ እንደሆነ ሰማን፡፡ይህን የሰማነው ዛሬ የሠራተኛና ማህበራዊ ጉዳይ ቢሮ እና የአዲስ አበባ የእድሮች ምክር ቤት በጋራ ከሰጡት ጋዜጣዊ መግለጫ ላይ ነው፡፡ዛሬ ከሰራተኛና ማህበራዊ ጉዳይ ቢሮ አቶ አለሙ አዳነ፣ ከእድሮች ምክር ቤት ደግሞ አቶ ታምራት ገብረማርያም በጋራ በሰጡት ጋዜጣዊ መግለጫ ላይ እንደተነገረው ከሆነ የፊታችን አርብ በኢትዮጵያ ባህል ማዕከል በአዲስ አበባ የሚገኙ እድሮች መሠረታዊ ችግሮች ይነሱና ከሚመለከታቸው ክፍል መልስ ይሰጥባቸዋል፡፡

ችግሮች ከተባሉት መሀከል የመረዳጃ እድሮች የህጋዊ ማንነት ጉዳይ፣ የቀብር ቦታዎች ችግር፣ ከሊዝ ነፃ የመሬት ይዞታ ማጣት እና ሌሎችም የእድሮቹ መሠረታዊ ችግሮች ይነሳሉ ተብሏል፡፡አርብ ቀን በሚደረገው የመጀመሪያ የእድሮች ምክር ቤት ስብሰባ ላይ በከተማዋ ካሉና ህጋዊ መሠረት ካላቸው 7 ሺ 500 እድሮች የተወጣጡ 1 ሺ 300 ሰዎች ይካፈሉበታል፡፡

እድሮች የጋራ አቅም በመፍጠር ከኋላ ቀር አሰራር ወደ ተቀናጀና ዘመናዊ አሰራር እንዲገቡ መድረኩ የራሱ ሚና እንደሚኖረው ሰምተናል፡፡

አስፋው ስለሺ
አስተያየት ይፃፉ (0 አስተያየት)

ግንቦት 15፣2009 የሸገር ወሬዎቻችን

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.

  • የአማራ ብሔራዊ ክልላዊ መንግሥት ከሳውዲ አረቢያ የሚመለሱ የክልሉን ተመላሾች ለመቀበል 14 አባላት ያሉት ግብረ-ሃይል ማቋቋሙን ተናገሩ፡፡ (የኔነህ ሲሣይ)
  • ድርቅ በደረሰባቸው የኢትዮጵያ አካባቢዎች የእንስሣት መድኃኒት እየተላከ ነው ተባለ፡፡ (ወንድሙ ኃይሉ)
  • ፓስፖርት የማደል ሥራን ከኢሚግሬሽን የዜግነት ጉዳዮች የተረከበው የኢትዮጵያ ፖስታ አገልግሎት ድርጅት አገልግሎቱን በሂደት ወደ ክልል እንደሚያዞረው ተናገረ፡፡ (ምሥክር አወል)
  • በኢትዮጵያ የሃይማኖት ተቋማት ያሉ የሥነ-ፅሁፍ ሀብቶች አደጋ ላይ ናቸው ተባለ፡፡ (ወንድሙ ኃይሉ)
  • የወሣኝ ኩነት ምዝገባ በአገር አቀፍ ደረጃ ሀምሌ 30 2008 ሲጀመር አስገዳጅ ነው ተብሎ ነበር፡፡ አዲስ አበባ ግን ምዝገባውን እስከአሁን አስገዳጅ አድርጋ መመዝገብ አልጀመረችም፡፡ (ንጋቱ ሙሉ)
  • የኢትዮ ሱዳን የጋራ ድንበር ልማት ኮሚሽን ጉባዔ በጐንደር እየተካሄደ ነው፡፡ (የኔነህ ሲሣይ)
  • ኢትዮጵያ ባለፉት 10 ወራት ለመሰብሰብ ካቀደችው ከ140 ቢሊዮን ብር ውስጥ 26 ቢሊዮን ብሩ አልተሳካላትም፡፡ (ትዕግሥት ዘሪሁን)
  • የኢትዮጵያ ገቢዎችና ጉምሩክ ባለሥልጣን የመንግሥትን ገቢ በሥርዓት እንዳይሰበሰብ አድርገዋል ያላቸውን 55 ሠራተኞች ከሥራ ማባረሩን ተናገረ፡፡ (ትዕግሥት ዘሪሁን)
  • በቦሌ ዓለም አቀፍ ኤርፖርት የታክሲ አገልግሎት ለመስጠት በመንግሥት ተፈቅዶልን ተሽከርካሪዎቹን ካስገባን በኋላ መሥራት ተከለከልን ያሉ የአቫንዛ ቶዮታ ባለቤቶች ቅሬታቸውን አሰሙ፡፡ መንግሥት ችግሩ በታክሲ አገልግሎት ሰጭዎቹ መካከል የተፈጠረ ውዝግብ ነው ብሏል፡፡ (ወንድሙ ኃይሉ)
  • በአዲስ አበባ ባለፉት 9 ወሮች ከ32 ሺ ለሚበልጡ የመሬት ይዞታዎች ምዝገባ ተከናወነ፡፡ (ምህረት ስዩም)
  • መሠረታዊ የሆኑ የእድሮች ጥያቄዎችን የሚመልስ መድረክ ሊዘጋጅ እንደሆነ ሰማን፡፡ (አስፋው ስለሺ)
  • ሁለተኛ ቀኑን የያዘው 70ኛው የዓለም የጤና ጉባዔ ጄኔቫ ሲዊዘርላንድ ላይ እየተካሄደ ይገኛል፡፡ ከጥቂት ሰዓታት በኋላም ዳይሬክተር ጄኔራል ማርጋሪት ቻንን የሚተካ አዲስ ዳይሬክተር ጄኔራል ይመርጣል ተብሎም ይጠበቃል፡፡ (የኔነህ ሲሣይ)
አስተያየት ይፃፉ (0 አስተያየት)

ሱሉልታን ጨምሮ የሰሜኑን አዲስ አበባ ክፍልን ተጠቃሚ የሚያደርግና የ146 ሚሊዮን ብር ወጪ የሚፈልገው የውሀ ፕሮጀክት...

ሱሉልታን ጨምሮ የሰሜኑን አዲስ አበባ ክፍልን ተጠቃሚ የሚያደርግና የ146 ሚሊዮን ብር ወጪ የሚፈልገው የውሀ ፕሮጀክት ድጋፍ በማግኘቱ በቅርቡ ስራው ይጀመራል ያሉት የሥራ አስኪያጅ ጽ/ቤት ኃላፊዋ ወ/ሮ ፀገነት ተስፋዬ ናቸው፡፡ኃላፊዋ የመሀል ከተማና የሰሜኑ አዲስ አበባ ክፍልን የውሀ መጠጥ አቅርቦት ችግር ፕሮጀክቱ በዘላቂነት እንደሚፈታ ነግረውናል፡፡

አሁን በግንባታ ላይ ያሉት የውሃ ፕሮጀክቶች በተፋጠነ መልኩ እየተገነቡ ነው ብለዋል፡፡አቃቂ ፍሳሽ ማጣሪያ ግንባታ እየተፋጠነ ቢሆንም በወሰን ማስከበር ሂደት መጠነኛ ችግር መኖሩ ፍጥነቱ በተፈለገው መጠን ሊሄድ አለመቻሉንም ነግረውናል፡፡አያይዘውም ባለሥልጣን መሥሪያ ቤቱ ለኅብረተሰቡ የተቀላጠፈ አገልግሎት ለመስጠት ያስችለው ዘንድ ተጨማሪ አራት ቅርንጫፎችን ሊከፍት እንደሆነ ለሸገር ተናግረዋል፡፡

አስፋው ስለሺ
አስተያየት ይፃፉ (0 አስተያየት)

የብረታ ብረት ኢንዱስትሪ ልማት ኢንስቲትዩት የሀገር ውስጥ ኢንዱስትሪዎች ከውጭ የሚገቡ ምርቶችን በሚፈለገው መጠን እየተኩ አይደለም አለ

የብረታ ብረት ኢንዱስትሪ ልማት ኢንስቲትዩት የሀገር ውስጥ ኢንዱስትሪዎች ከውጭ የሚገቡ ምርቶችን በሚፈለገው መጠን እየተኩ አይደለም አለ፡፡ኢንስቲትዩቱ የተቋቋመበት አብይ አላማ ከውጭ የሚገቡ የኢንዱስትሪ ምርቶችን በሀገር ውስጥ በመተካት የውጭ ምንዛሬን መቀነስ ቢሆንም ውጤታማ መሆን እንዳልቻለ ግን ተናግሯል፡፡

የሀገር ውስጥ አምራች ኢንዱስትሪዎች በጥራትና በዋጋ ተወዳዳሪ ሆነው ጨረታ ሲያሸንፉ የ15 በመቶ የዋጋ ተጠቃሚ እንዲሆኑ እድል ይሰጣቸዋል፡፡ይሁንና ከ35 በመቶ በላይ በምርቶቻቸው ላይ እሴት ጭማሪ እንዲያደርጉ ይጠበቅባቸዋል፤ በአውሮፓና አሜሪካ ካሉ ምርቶች ጋር የሚስተካከል መስፈርት እንዲያሟሉም ይጠየቃሉ ተብሏል፡፡

ይህም የሀገር ውስጥ የኢንዱስትሪ ምርቶች በሀገር ውስጥ ተሸጠው የውጭ ምንዛሪን እንዳያስቀሩ እንቅፋት እንደሆነባቸው የብረታ ብረት ኢንዱስትሪ ልማት ኢንስቲትዩት ዛሬ በህዝብ እንደራሴዎች ምክር ቤት የኢንዱስትሪ ጉዳዮች ቋሚ ኮሚቴ ጋር ሲመክር ሰምተናል፡፡በቢሊዮን የሚቆጠር ብር ግምት ያላቸው የሀገር ውስጥ የተለያዩ ምርቶች ገበያ አጥተው በዕቃ ግምዣ ቤት ውስጥ ተቀምጠዋል ያሉት የኢንስቲትዩቱ የእቅድና መረጃ ዳይሬክቶሬት ዳይሬክተሩ አቶ ጥላሁን አባይ ናቸው፡፡

በሌላ በኩል ግን በአሁኑ ወቅት በ44 ሚሊዮን ዶላር ግዢ ምርቶችን ከውጭ ለማስገባት ሂደት መጀመሩንም ተናግረዋል፡፡ከውጭ ሀገር የሚገቡ ምርቶችን በሀገር ውስጥ ኢንዱስትሪ ውጤቶች ለመተካት የሚደረገው ጥረት ሌላም ችግር እንዳለበት ከአቶ ጥላሁን ሰምተናል፡፡

ግዢ ፈፃሚ መሥሪያ ቤቶች ከብረት ውጭ ያሉ እንደ ተንቀሣቃሽ ስልክ፣ ተሽከርካሪ፣ የኤሌክትሮኒክስ ዕቃዎችና ሌሎችንም የኢንዱስትሪ ውጤቶች ከሀገር ውስጥ ለመረከብ እንብዛም ፈቃደኛ አይደሉም ፤ ይህም በሀገር ውስጥ የተመረቱ የኢንዱስትሪ ዕቃዎች ገበያ እንዲያጡ፣ የውጭ ምንዛሪንም ለመቀነስ እንዳይቻል አድርገዋል ብለዋል፡፡

ትዕግስት ዘሪሁን
አስተያየት ይፃፉ (0 አስተያየት)

ግንቦት 14፣2009 የሸገር ወሬዎቻችን

  • በሳውዲ አረቢያ የሚገኙ ኢትዮጵያዊያንን ወደ ሀገር ለመመለስ እንዲቻል በሪያድ የሚገኘው የኢትዮጵያ ኤምባሲ የሠራተኛ ቁጥሩን ጨምሮ እየሰራ ነው ተብሏል፡፡ (የኔነህ ሲሣይ)
  • ከስምንት ዓመት በፊት ቃል የነበረው የአረጋውያን ማዕከል እውን ሆነ፡፡ (አስፋው ስለሺ)
  • ስዊድን ለኢትዮጵያውያን እናቶች ጤንነት መጠበቂያ ከ7 ሚለዮን ዶላር በላይ እርዳታ ሰጠች፡፡ (ምህረት ስዩም)
  • ኢትዮጵያ ውስጥ ከንፋስ የኤሌክትሪክ ኃይል ማመንጫ ለመገንባት መዘጋጀቱን አንድ የቻይና ኩባንያ ተናገረ፡፡ (ምሥክር አወል)
  • የሀገር ውስጥ ኢንዱስትሪዎች ከውጪ የሚገቡ ምርቶችን በሚፈለገው መጠን እየተኩ አይደለም ተባለ፡፡ (ትዕግሥት ዘሪሁን)
  • አዲስ የነፃ የሕግ ድጋፍ ስትራቴጂ ተዘጋጀ፡፡ (የኔነህ ሲሣይ)
  • ለዘር የሚሆን ማዳበሪያ ለማሰራጨት የትራንስፖርት እጥረት እንዳጋጠመው የእርሽና ተፈጥሮ ሃብት ሚኒስቴር መናገሩ ተሰማ፡፡ (ወንድሙ ኃይሉ)
  • በአዲስ አበባ የሰሜኑን አካባቢ የውሃ ችግር ለማቃለል የሚያስችልፕሮጀክት ግንባታ ሊጀመር ነው፡፡ (አስፋው ስለሺ)
አስተያየት ይፃፉ (0 አስተያየት)

በአፍሪካ አህጉር ዘላቂ ልማት ላይ ሲመክር የቆየው የ2017 የአፍሪካ አህጉር ጉባዔ የተለያዩ ውሣኔዎችን ማሳለፉ ተሠማ

በአፍሪካ አህጉር ዘላቂ ልማት ላይ ሲመክር የቆየው የ2017 የአፍሪካ አህጉር ጉባዔ የተለያዩ ውሣኔዎችን ማሳለፉ ተሠማ፡፡የአፍሪካ የ2030ና የ2063 የልማት አጀንዳዎችን ማዕከል በማድረግ የ2017 የዘላቂ ልማት የአፍሪካ ጉባዔ ላይ አህጉሪቷ በአፍሪካ ባልተመጣጠነ የሀብት ስርጭት ዙሪያ መክሯል፡፡

የአፍሪካ አሀጉር ዘላቂ ልማትና ህዝቦቹን ሠራተኛ ለማድረግ ቢያንስ ቀጣይነት ያለው የ5 በመቶ ዕድገት በአህጉሪቱ መመዝገብ ያስፈልጋል ተብሏል፡፡የአፍሪካ መንግሥታት ረቂቅ የልማት ፖሊሲዎቻቸውን 70 በመቶ መሠረት አድርገው የሚቀርፁት ለግብርና የሚሆነው ወቅታዊ የዝናብ ሁኔታ መሠረት አድርገው በመሆኑ ይህ በተለያዩ መልኩ መቀየር አለበት መባሉንም ሰምተናል፡፡

የአፍሪካ ዘላቂ ልማትን በተመለከተ በተዘጋጀው የአዲስ አበባው የ2017 ጉባዔ ላይ የገንዘብ ምንጭ የሆኑ አበዳሪና ረጂ ተቋማትም ለአህጉሪቱ ዘላቂ ልማት ድጋፍ እንዲሰጡ መጠየቁን ነው፡፡በአፍሪካ የዘላቂ ልማት የ2017 ጉባዔ ላይ የመከሩት የየሀገራቱ ወኪሎችና የገንዘብ ተቋም መሪዎች በቅርቡ በህንድ አህመዳባድ ከተማ በሚዘጋጀው የአፍሪካ ልማት ባንክ ጉባዔ ላይ ለአህጉሩ ዘላቂ ልማት የሚሆኑ የገንዘብ ምንጮች ዙሪያ ለመነጋገር ቀጠሮ መቁረጣቸውንም ጉባዔው ተናግሯል፡፡

የአፍሪካ የዘላቂ ልማት ጉባዔ በ2030 ድህነትን ከአህጉሪቱ ለማጥፋት የተቀረፁትን 17 የዘላቂ ልማት ግቦችንና አሰራሮችን ተግባራዊ ለማድረግ የ50 ዓመታት የምጣኔ-ሐብታዊ ሽግግር በሚመለከትም ውሣኔዎችን ማሳለፉን ሰምተናል፡፡

የኔነህ ሲሣይ
አስተያየት ይፃፉ (0 አስተያየት)
Sheger 102.1 AudioNow Numbers