ሐምሌ 5፣2015 - በግልገል በለስ አካባቢ ታጣቂዎች በፈጠሩት ጥቃት ንጹሃን ዜጎች እና የመከላከያ ሰራዊት አባላት ላይ ጉዳት መድረሱ ተነገረ

ከሰሞኑ በቤኒሻንጉል ጉሙዝ ግልገል በለስ አካባቢ ታጣቂዎች በፈጠሩት ጥቃት ንጹሃን ዜጎች እና የመከላከያ ሰራዊት አባላት ላይ ጉዳት መድረሱ ተነገረ፡፡

ጥቃቱ የደረሰው በአካባቢው ታጥቆ በሚንቀሳቀሰው የጉሙዝ ዲሞክራሲያዊ ንቅናቄ በተባለ ታጣቂ ቡድን መሆኑን የኢትዮጵያ ሰብአዊ መብቶች ኮሚሽን ተናግሯል፡፡

ኮሚሽነሩ ዶክተር ዳንኤል በቀለ አጠቃላይ የደረሰውን ጉዳት ለማጣራት ምርመራ እያደረግን ነው፤ ለጊዜው ግን ንጹሃን ዜጎች እና የመከላከያ ሰራዊት አባላት በታጣቂው መገደላቸውን አረጋግጠናል ብለዋል፡፡

አሁን በአካባቢው የመከላከያ ሰራዊት ተሰማርቶ መጠነኛ መረጋጋት ቢሰፍንም ውጥረቱ ግን እንደቀጠለ ነው ብለዋል ኮሚሽነሩ፡፡

በታጠቁ ቡድኖች መካከል በሚደርስ ጥቃት እና በመንግስት የፀጥታ ሀይል በሚወስደው የአፀፋ እርምጃ በመሃል ንጹሃን ዜጎች ላይ የሚደርሰውን ጉዳት አሳሳቢ አድርጎታል ብለዋል፡፡

ዘላቂ መፍትሄም እንደሚያሻው አሳስበዋል፡፡

ትዕግስት ዘሪሁን

የሸገርን ወሬዎች፣ መረጃ እና ፕሮግራሞች ይከታተሉ…

https://bit.ly/33KMCqz