መጋቢት 26፣2016 - የሶማሊያ መንግስት የኢትዮጵያ አምባሳደር ለምክክር ወደ ሀገራቸው እንዲመለሱ መወሰኑ ተሰማ

የሶማሊያ መንግስት የኢትዮጵያ አምባሳደር ለምክክር ወደ ሀገራቸው እንዲመለሱ መወሰኑ ተሰማ፡፡

በሶማሊያ የኢትዮጵያ አምባሳደር ሙክታር መሐመድ ዋሬ ወደ አዲስ አበባ እንዲመለሱ እና እንዲመካከሩ የተደረገው ኢትዮጵያ ከሶማሌላንድ ጋር በተፈራረመችው የመግባቢያ ሰነድ ስምምነት ምክንያት ሳይሆን እንዳልቀረ ተዘግቧል፡፡

ሶማሊያ፣ የኢትዮጵያ አምባሳደር ከሀገሯ እንዲወጡ ከመወሰኗ በተጨማሪ ኢትዮጵያ በሶማሌላንድ ሀርጌሣ እና በፑንትላንድ ጋሮዌ ያሏት ቆንስላ ፅ/ቤቶችን እንደዘጉ ወስናለች፡፡

በሁለቱ ቆንስላ ፅ/ቤቶች ውስጥ የሚሰሩ የኢትዮጵያ ዲፕሎማቶች እና ሰራተኞች ሀገራቱን በሳምንት ውስጥ ለቀው እንዲወጡ እና ቆንስላ ጽ/ቤቶቹም እንዲዘጉ መወሰኑንን ጋሮዌ ኦንላየን ፅፏል፡፡

ይህንን ትዕዛዝ በማይቀበሉት ላይም በአለም አቀፍ የዲፕሎማሲ ህግ መሰረት ሀገሪቱ ተጨማሪ እርምጃ እንደምትወስድ አስጠንቅቃለች፡፡

ውሳኔው የሚፀናው የሀገሪቱ የሚኒስትሮች ም/ቤት ሲያፀድቀው እና የሀገሪቱ ጠቅላይ ሚኒስትር ሲፈረሙበት እንደሆነ ተነግሯል፡፡

በሶማሊያ የኢትዮጵያ አምባሳደር ወደ ሀገራቸው እንዲመለሱ እንዲሁም በሀርጌሣ እና ጋሮዌ የሚገኙት የኢትዮጵያ ቆንስላ ፅ/ቤቶች እንዲዘጉ ተወስኗል ስተባለው ጉዳይ ሸገር የጠየቃቸው የውጭ ጉዳይ ሚኒስቴር ቃል አቀባይ ነብዩ ተድላ መረጃው እንደሌላቸው ተናግረዋል፡፡