ከደንበኞቼ ጋር ስለ አገልገሎት አሰጣጤ ምን ጎደለ፣ ምን ይሻሻል የምልበት፣ የላቀ አፈፃፀም ያሳዩትንም የምሸልምበት የአንድ ወር የደንበኞች አገልግሎት ወር ጀምሬያለሁ ሲል የኢትዮጵያ ንግድ ባንክ ተናገረ።
''የደንበኞች አግልግሎት ወሩ ለደንበኞች ምስጋና የሚሰጥበት እና ጥራት ያለው አገልገሎት የመስጠት ቃልም የሚታደስበት ነው'' ሲሉ የባንኩ ፕሬዚዳንት አቶ አቤ ሳኖ ተናግረዋል።
ለ 30 ቀናት የሚቆየው የባንኩ ደንበኞች የአገልግሎት ወር "የላቀ አገልግሎት ደስተኛ ደንበኛ" የሚል ርዕስ ተሰጥቶታል።
በአንድ ወር ቆይታውም በዋና መስሪያ ቤት እና በዲስትሪክቶች ደንበኛ የተመለከቱ ግኑኝነት ለማጥበቅ የሚያግዙ ዝግጅቶች ይካሄዳሉ፣ የላቀ አፈፃፀም ባሳዩ ቅርንጫፎችም ጉብኝት ይደረጋል ተብሏል።
አውደ ርዕይ፣ ደም ልገሳ፣ የስፖርት ጨዋታዎች ዝግጅቱን እንደሚያጅቡት ተነግሯል።
ባንኩ ከደንበኞቹ ጋር ያለውን የስራ ግኑኝነት ለማጥበቅ የደንበኞች አገልግሎት የጥራት የአሰራር ስርዓት ሰነድ እያዘጋጀን መሆኑንም አስረድቷል።
በዛሬው ዕለት በዋናው መስሪያ ቤት በተዘጋጀው የደንበኞች አገልግሎት ወር ማስጀመሪያ መርሀ ግብር ላይ የገንዘብ ሚኒስትሩ እና የኢትዮጵያ ንግድ የዳይሬክተሮች ቦርድ ሰብሳቢ አቶ አህመድ ሺዴ ተገኝተዋል።
የ82 ዓመቱ የኢትዮጵያ ንግድ ባንክ የደንበኞቼ ብዛት 45 ሚሊዮን፣ ጊዚያዊዎቹን ጨምሮ በአጠቃላይ 82,000 ሰራተኞች አሉኝ ብሏል።
81 በመቶ ደንበኞቼ በዲጂታል መላ ተጠቃሚ ሆነዋል ይህም ከአሰብኩት ቀድሞ የተሳካ እቅዴ ነው ሲል አስረድቷል።
የባንኩ አጠቃላይ ሀብት 1.97 ትሪሊዮን ብር፣ ተቀማጩ 1 ትሪሊዮን 419 ቢሊዮን፣ ካፒታሉ ደግሞ 131 ቢሊዮን ብር ደረሷል ተብሏል።
ንጋቱ ሙሉ
コメント