ጥር 20 2017 - የሸማቾችን መብት እንዲያስጠብቅ የተቋቋመው ተቋም ከሸማቹ በቂ ቅሬታ እየቀረበልኝ አይደለም አለ

ከንግድ ውድድርና የሸማቾች ጥበቃ ባለስልጣንነት በንግድና ቀጠናዊ ትስስር ሚኒስቴር ስር ወዳለ ዴስክ ዝቅ ያለውና የሸማቾችን መብት እንዲያስጠብቅ የተቋቋመው ተቋም ከሸማቹ በቂ ቅሬታ እየቀረበልኝ አይደለም አለ፡፡

የሸማቹን መብት ያስጠብቃል፣ በነጋዴዎች መካከል ያለው የንግድ ውድድር ህግን የተከተለ እንዲሆን ይሰራል ተብሎ በባለስልጣን ደረጃ በአዋጅ ተቋቁሞ የነበረው ተቋም፣ ፈርሶ በንግድና ቀጠናዊ ትስስር ሚኒስቴር ስር በዳሬክቶሬት ደረጃ ይገኛል፡፡

ተቋሙ ምንም እንኳን ስራው በዚህ የተገደበ ቢሆንም በግብይት ወቅት ሸማቹ ተበደልኩ ብሎ ለሚያቀርበው ቅሬታ ምላሽ እየሰጠ መሆኑን ነግሮናል፡፡

በተለይ በአዲስ አበባ ንግድ ቢሮ ስር ያለው የሸማቾች መብት ጥበቃ ዳሬክቶሬት ሸማቹ የሚያቀርብልኝ የመበት ጥሰጥ ቅሬታ ካለው ችግር አንጻር በቂ አይደለም፣ የመንፈቅ ዓመቱን እንኳን ብንመለከት የቀረቡት155 ቅሬታዎች ብቻ መሆነናቸውን ነግሮናል፡፡

ይህም የመጣው አንድም ሸማቹ በግብይት ወቅት ያለውን መብት ባለማወቁ፤ ከዚህም ባሻገር ችግሩን የሚፈታለት ተቋም ስለመኖሩም ባለማወቁ ነው ብሏል፡፡

ከሚቀርቡት ቅሬታዎች የሚበዙት የጥራት ጉድለት ተሽጦልኛል የሚሉ ናቸው የሚሉት የሸማቾች መብት ጥበቃ ዳሬክተር አቶ ሰፋለም አቦረዳኝ በደረሰን ጥቆማ መሰረት ባለሙያ መድበን የተባለው ችግር መኖሩን በማጣራት ነጋዴዉንና ሸማቹን በማደራደር ሸማቹ እቃውን መልሶ ገንዘቡ እንዲመልስለት እናደርጋለን ብለዋል፡፡

በሸማቾች መብትና ጥበቃ አዋጅ ላይ በተቀመጠው መሰረት አንድ ሸማች ጥራት የጎደለው ምርት የተሸጠለት እንደሆነ በ16 ቀን ውስጥ እቃው በነበረበት አኳኋን መመለስ እንደሚችል አስቀምጧል ሲሉም አስረድተዋል፡፡

ምንም እንኳን የሸማቹን መብት ለመጠበቅ እየሰራን ቢሆንም በንግድ እንቅስቃሴው ያለውን የማጭበርበርና ማንኛውም የሸማቹን የመብት ጥሰት እግር በእግር እተከተልን እየፈታን ነው ማለት አንችልም የሚሉት አቶ ሰፋለም፣ ለሚቀርብልን ማንኛውም ቅሬታ በድርድር ከመፍታት በፍርድ ቤት ቆሞ እስከ መከራከር የሚደርስ ሃላፊነት እንዳላቸውም አንስተዋል፡፡

ከሚቀርቡት የተጭበርብሪለሁ ቅሬታ የሚበዙት በድርድር የሚፈቱ ናቸው በዚህ መንገድ ችግሩ ካልተፈታ ጉዳዩን ወደ ፍርድቤት እንወስደዋለንም፤ ይህ ዓመት ከተጀመረ ወደ ፍርድ ቤት የወሰድነው የለም ብለውናል፡፡

በየትኛው ጊዜ በግብይት ወቅት ለሚገጥማችሁ ችግርም ይሁን ቅሬታ በከተማዋ ንግድ ቢሮ የጥቆማ መስጫ በ8588 መስመር እንዲሁም በአካል በመቅረብ ቅሬታው ቢቀርብልን ባለሙያዎች መድበን የሸማቹን መብት ለማስጠበቅ ዝግጁ መሆኑን ተናግሯል፡፡

የምጣኔ ሃብት ባለሙያዎች በበኩላቸው ንግድ በህግና ስርዓት እየተመራ ባለመሆኑ ሸማቹ ለከፍተኛ ችግር ተጋልጧል፤ ሸማቹን ይጠብቃል ተብሎ ተቋቁሞ  የነበረው ከንግድ ውድድርና የሸማቾች ጥበቃ ባለስልጣን ወደ ነበረበት መመለስ እንዳለበት ጠቁመዋል፡፡

ምንታምር ፀጋው